أخي المواطن، بينك وبين الجمهورية بطاقة تعريف، شوية سخانة و شوية صف... وتقييدة!

   عيد الجمهورية، نهار من النهارات إلي كان - وممكن مازال -  ما يعني شيء لعامّـة التوانسة، وهو في الحقيقة نهار عندو رمزيّـة كبيرة. نهار تم فيه الإنتقال و لو صوريّـا من نظام ملكي أي نظام البايات، إلى نظام جمهوري. و بما انو من ضمن الأهداف إلي تحققت في الثورة هاذي هي إسترجاع الرموز الوطنية، كيف العلم والنشيد الرسمي والمواطنة فإنو مافيها باس كان نسترجعو معنى الجمهورية من جملة الحاجات إلي تسرقت و غارو عليها التجمّـعيين الي تنكّـرو توّة في ثوب الدستوريين، و خربوا الجمهورية وما خلو حد يقول كلمة معاهم  بتعلّـة أنهم هم من خلّـص البلاد من الإستعمار وهاك اللوغة إلي بدات بمنطق شدوني لا ندوخ عليكم ووفات بمنطق سكّـر فمك و احمد ربي إلي إنت عايش.

   باهي، آش معناها الجمهورية؟ الجمهورية بكل بساطة هو نظام حكم يختار فيه الشعب ممثّـليه على عكس أنظمة أخرى يكون فيها الحاكم فارض الشرعية متاعو يا بالوراثة كيما في الأنظمة الملكية وإلا بالدين كيما في الدولة الدينية وإلا بقوة السلاح كيما في الأنظمة العسكريّـة (على فكرة التعريف هذا أثار حوار مهم ما بيني  أنا و عزيز عمامي تلقاوه منشور في التعليق الثاني المصاحب للتدوينة هاذي). مفهوم الجمهورية في المطلق حاجة باهية و مثالية و في الحقيقة ماهواش جديد ويرجع لعهد الإغريق من زمان جمهورية أفلاطون ولكن تطبيقو و تفعيلو على أرض الميدان هو إلي يعمل الفارق. مفهوم الجمهورية ينجر عنو مفهوم المواطنة إلي يربط أفراد الشعب، على عكس مفهوم الرعية إلي يكون مربوط بالأنظمة الملكية. حسب التعريف هذا، تونس عمرها ما كانت جمهورية من عهد القرطاجيين، وخاصة في الخمسين سنة الأخرانين لأنو لا بورقيبة اختاروا الشعب ولا بن علي... 

   إذا كانت الديمقراطية تضمن تكافو الحقوق، فإنو الجمهورية تضمن تكافو الفرص. بطريقة أخرى، في نظام جمهوري ما ثماش طبقة قارة -بالمعنى السوسيولوجي- تحكم وطبقة محكوم عليها. الجمهورية لازمها تضمن أقصى حد من تكافؤ الفرص باش أي مواطن يتولد فيها يكون عندو نفس الحظوظ لتلقي تعليم ذو مستوى و الرعاية الصحية وفرص التشغيل  وكل الضروريات اللازمة  باش ينجم هو زادة يولي يختارو الشعب لتمثيلو. وباش تعرف هل انو بلاد نظامها جمهوري لازمك تشوف حاجتين : هل الطبقة الحاكمة تم إختيارها وتجديدها من الشعب وإلا موجودة من قبل ولا دخل للشعب في ذلك. وهل يوجد نوع من السوبر-مواطنين، إلي عندهم حقوق و امتيازات أكثر من غيرهم يتوارثوها فيما بينهم.

   المنتقـدين متاع النظريّـات التطبيقية لمفهوم الجمهورية يقولو أنو في الواقع ماثماش جمهورية بل أولقارشية، وهي تعني انو الحكم يقعد مابين أفراد معينين وهي غالبا الطبقة الغنيّـة ورجال الأعمال و النخب الثقافية و العلميّـة و عامة الناس  عمرها  ما تمارس السلطة، والشعب ديما يظهرلو انو عندو الإختيار ولكنو  في الواقع ماعندوش برشة إختيار لأنو ما يختارش بين كل مواطنيه و لكن يختار عباد من شريحة معيّـنة. الكلام هذا مهواش غالط و لكنو ماهواش صحيح ميا بالميا. المناصب كيف الرئاسة وإلا الوزارة وإلا قيادة الجيش ماهياش مناصب إلي يجي ينجّـم ياخوها. لازمها مؤهّـلات علمية وتقنيّـة وقيادية باش الواحد ينجم يقدها كما ينبغي، ولازمها زادة إمكانيات مالية باش الناس تنجم تعرف على القليلة انو الشخص المترشح للمنصب هاذا موجود و ينجم وقتها يعرّف بروحو وبمؤهّـلاتو. والشيء هذا ممكن يفسر علاش ديما في الجمهوريات نختارو بين عباد تظهر لا علاقة بأسفل السلم الإجتماعي والطبقات المهمشة. وهذا ما يعيبوه برشة ناس على احزاب كيما آفاق إلي أعضائها يظهروا ياسر بعاد على واقع الشعب التونسي.

   ولكن رجل السياسة كيما قال ماكسيموس دسميوس ميريديوس ماهواش رجل من عامة الشعب و لكنو رجل يعمل من أجل الشعب (je ne prétends pas être un homme du peuple, mais un homme pour le peuple) . و باش تتنظم الحكاية هاذي أكثر،  تخلقت الأحزاب إلي يكون العمل  متاعها بالسياسة وتقدم برامج للناس و كذلك تطلّـع عباد أو رجال سياسة يولّـيو واجهة الحزب وأفكارو  باش يختاروهم الناس لمناصب الدولة  حسب انسجامهم مع البرامج متاعهم و أفكار الأحزاب هاذي. وباش تكون الجمهورية أقرب ما يكون للطّـرح هذا، لازم الجمهورية توفر كل الظروف اللازمة باش أي مواطن يكون عندو الفرص السانحة لإثبات جدارتو و لنشر أفكارو وبرامجو على الشعب. و لذا التحليل الطبقي لمفهوم الجمهورية والسلطة هو  تفسير غير مناسب  لأنو مش بالظرورة كي تبدا زوالي  وولد الشعب معناها كي تشد الكرسي باش تكون تحس بالشعب وباش ترعالو مصالحو.  الفكرة هاذي تطرحت برشة مرات على أساس انو "شباب الثورة" ماهواش في الحكم... ولهنا نحب نذكر الشيوعيين إلي عندهم النّـزعة هاذي  انو ستالين كان فقري وولد الشعب والطبقة الكادحة المظلومة وهذا ما منعوش من قمع الشعب و تهميشو و الزيادة على مرمّـتو. وعلاش نمشيو لبعيد؟ هاو عندنا مثال يحتذى به: الطرابلسية كانوا أفقر عباد ربي، زواولة وما في حالهمش... هذا ما منعهمش باش يسيبو الجوع متاعهم و قلة المعروف على شعب بأكمله.

   باهي ! هل  نحنا توا في جمهوريّـة ؟ لا! مازلنا راكشين في المدخل متاعها:  فؤاد المبزع ما اختاروا حدّ، هيئة الإصلاح السياسي كيف كيف. وزادة  ثمة نوع من المواطنين تحسهم  فوق الشعب، وهوما رجال الأمن. وهذا وضع إنتقالي، قد ما يقصار قد ما يكون خير، ولذلك  نهار إلي نختارو ممثلينا ونهار إلي رجل الأمن يسترجع صفة المواطن كيف أي مواطن آخر و يتعاقب على تجاوزو للسلطة متاعو و إلا للقانون، ونهار إلي العباد الكل تكون عندها نفس الحظوظ باش تروّح من مظاهرة لاباس عليها، مش كيف أمان الله المنصوري إلي رفّـلوه على خاطر كلامو ماعجبش... وقتها تولي عندنا جمهورية بالرسمي.

   أمان الله المنصوري - للتذكير - هو مواطن تونسي و أدمين في صفحة الحقائق الخفية وهي من أكبر الصفحات الناشرة للبهامة و الأنتوكس، ويمكن القاسم المشترك الوحيد بيناتي أنا وياه هو اننا نحكيو الزوز بالدارجة التونسية وتولدنا الزوز في هالجمهورية التونسية. أمان الله المنصوري، شُـهر فايسبوكر حر، تشد وترفّـل على خلفية محاولة إعتصام القصبة 3 وتم تحويلو للخدمة العسكرية الإجبارية في حين انو مازال يقرا. و اختلافي الفكري التام معاه لا يمنع انو لازمنا نطالبو بتوقيف الأساليب الرخيصة هاذي إلي تصنع شهداء من ورق وإلي فيها تعسّـف وبهامة كبيرة ياسر. لأنو تأثير السّـيد هذا في الرأي العام باللي باش يكون، باش يكون أقل وقعا كي يبدا مسيب من انو يبدا مربوط، ولأن الأفكار مهما كانت تفاهتها، تولي مزيانة و جديرة بالإهتمام و الفضول في عيون الناس لما يتم قمعها بالقوة. ولذا، و في الذكرى الرابعة والخمسين لإعلان شبه الجمهورية نتوجه بنداء لكل من :

- السلطة المؤقتة : سيّـبو أمان الله المنصوري وكل المعتقلين على خلفية أفكارهم إلي ما تتوافقش مع التمشي متاعكم للإنتقال الديمقراطي. وكان عندكم ما تشدّو عليه من نشر لأخبار زائفة وإلا تشهير، قدّموه للقضاء المدني ووقتها تولّـي حكاية أخرى! أما أساليب الرّافل راهي أساليب ستالينيّـة  ما تليقش بثورة.

- الحاكم والجهاز الأمني : تفكّـر إلي إنت مواطن، وطول ماك حاسب روحك فوق المواطن راهو باش تقعد مكروه و منبوذ. أما الفاسدين والمجرمين منكم، فالحساب تحت التوتة، نهار إلي تولي عندنا جمهورية بالرسمي وهذا مش بعيد.

- أخي المواطن : كان حلم الجمهورية هاذا عاجبك وكان تحب العام الجاي نحتفلو لأوّل مرّة بعيد الجمهورية على قاعدة : برّى قيد روحك باش تنتخب، لأنّـو  باش تكون عندك جمهورية لازمك تختار شكون يمثّـلك و ياخذلك حقك من إلي ظلمك. وحتى كان مازلت ما تعرفش شكون تحب يمثّـلك فإني متأكد أنك تعرف على الأقل شكون ما تحبش يمثّـلك، وهذا في حدّ ذاتو سبب كافي باش تمشي تنتخب. ولذا ساهلة ياسر: هزّ بطاقة تعريف، برى لأقرب بلديّـة، شد الصف كان لزم ميسالش، شوية سخانة وتتعدى، كلو يهون مقارنة بالعباد إلي ماتت و ضحات في سبيل هالحلمة إلي اسمها جمهوريّـة تونس.

Photo de jackson Fajjari

   أخي المواطن، بينك وبين الجمهورية بطاقة تعريف، شويّـة سخانة و شوية صف... وتقييدة! وما ضاع حق وراءه طالب.

________________
   هذا المقال في إطار حملة توعوية باش الناس تمشي تقيد، لمزيد من المعلومات على الحملة هاذي انقر هنا

القاضي مختار اليحياوي : إلي دارو بلار... ما يحدفش الناس بالحجر !

   القاضي مختار اليحياوي قرر دخول عالم  السياسة من الباب الغالط، وهو الباب متاع أنا مناضل قديم والأخرين عملاء النظام السابق. وهو في الحقيقة ماهواش وحدو إلي عندو الهواية هاذي، عندك زادة جماعة المؤتمر إلي ساعات تحسهم انو النضال عندهم هو أنك تقول لا - كيف باعث الثورة - وترفض و أي واحد ما يعملش كيفك فهو عميل ومتواطئ مع ازلام النظام البائد، آش خلى سي المرزوقي يخرجلنا بليستة متاع الأحزاب المناضلة وعددهم خمسة على حسابو  و ما وقفش عند هذا الحد بل وصف الأحزاب الأخرى وعلى رأسهم التجديد والبيديبي بأنهم احزاب بن علي...

  هذا ما يمنعش إلي  ثمة زادة هواية ثانية عند احزاب أخرى كيف النهضة، وهي ممارسة السياسة عبر التيتّـم: قعدوا كان يحسبوا في عدد المساجين والمنفيّـين، لدرجة انو اجتماعاتهم ولاّت من مستوى المسامح كريم، و الدموع إلي ثهبطوا في ها الإجتماعات أكثر من إلي ثهبطوا في مظاهرة من جرة اللاكريموجان... الحاصل،  ربي يصبّـركم أما لا اليتم ولا التاريخ النضالي متاعكم باش يحلّ مشاكل الناس متاع توا ! وثم موغابي، الدكتاتور الحالي متاع الزيمبابوي راهو كان مناضل كبير وحارب النظام إلي كان قبلو ...ولذا راس المال هذا راهو فالس!

   و نظرا لدرجة الإفلاس الفكري و خاصّـة على مستوى البرامج الحزبيّـة إلي وصلو المشهد السياسي التونسي، فحبيت نغتنم الفرصة باش نذكر رجال السياسة في تونس انو السياسة هي علم الحاضر و المستقبل في ما يخص الشّـأن العام ... أما التّـاريخ متاعكم الشخصي فأكثر ما يمكن انو نقولولكم عليه  هو "شكر الله سعيكـم!". الله غالب عالم السياسة عالم ما فيهش الإعتراف بالجميل، مش كيما كان مفهّـمنا بن علي حيث  كنا ملزومين بالإعتراف بالجميل لصانع التغيير إلي أنقذ البلاد من مهب الرياح وقام بتضحيات جسيمة في سبيل انو يضع البلاد في الطريق الصحيح على درب النموّ والنّـماء والتّـنمية وجعلنا نتبوأ مراتب، و مكاسب و كعرفان بالجميل قعد على قلوب التّـوانسة 23 سنة و هوما كل مرة يتشحّـتو فيه باش يزيد شويّـة... الكرسي أو المسؤلية ما يعطيهالكش الشعب على أساس شنوة عملت قبل، بل على أساس شنوة ناوي  تعمل بعد !

  اليوم في تونس شنوّة عندنا؟ عندنا عباد تشتغل في السياسة، وبرامجها الوحيدة هي انو خصومها من الرجعيّين، أو انو خصومها من أعداء الدين والهويّـة أو من المطبّـعين، أو انو خصومها من ازلام النظام البائد... وبما أنا مازلنا قاعدين شويّة في النظام البائد حبيت زادة نغتنم الفرصة باش نذكر العباد إلي تمارس في السياسة، وهو في الحقيقة يقرب أكثر للتغفيص السياسي،  حبيت نذكرهم بحاجة تبدولي  مهمة:  نعت الخصوم بفلول النظام البائد وبالمتمشعين من نظام بن علي راهي لعبة مكرزة جداااه خاصة كي يبدا اكي يحب يلعبها دوسيه ماهواش نظيف.

   وهو كي تجي تشوف حتى حد ماهو نظيف، حتى إلي ما شاركش في النظام سكت عليه. ولذا بجاه والديكم،  مازالو شهرين على الإنتخابات، كمّـلوهم على خير وأخطاونا من المزايدة بالنظالية وكونو في المستوى مش كيما عصام الشابي متاع البيديبي إلي كي نغر وتنرفز خرج بالوقت كشاكشو في فمو و يفركس على الصحافة باش ينشر صابونو تقولش عليه إلي هذا شاد على خوه السماء لا تطيح. ما فيها باس كان ترتفعولنا شوية من عرك الأشخاص والحوم والتكتلات متاعكم إلى مستوى الأفكار والبرامج. وإلي مريض بالقلب وإلا نرفوزي  يبطل عليه السياسة... ديجا 6 شهر و كرهتوه  التونسي في حاجة اسمها سياسة، كل ما تحل الفايسبوك تلقى فيديو في وجهك بعنوان : تصريحات خطيرة لوجه اللوح الفلاني وإلا الفلتاني. ولذا كيما أخي المواطن وقيّـت باش تقيّـد روحك،  الأحزاب زادة وقيّـت باش تجيبولنا  شوية برامج، شوية أفكار على خاطر المزايدات هاذي متاع فلان عمل و"فلان ناشد وفلتان ما عارضش قدي أنا" راهو من الأخر ما تهمناش.

   باهي قبل ما نكمل نحب نفتح قوس على القاضي الفاضل المختار اليحياوي، ومش باش نقعد نحلل في الدوافع إلي خلاتو يتصرف بتغفيص سياسي كبير ما يليقش بيه. أما باش نكتفي بعرض شوية وقائع ثماش ما تنقص علينا العباد من المزايدة بالنضالية. أولا سي اليحياوي وبغض النظر على زلة اللسان العفوية متاع : "احنا في النهضة..." ماكاروش خرج وقال الكلام إلي قالوا، هو بالذات على لزهر العكرمي وإلا على بن عاشور و كشاكشو طالعة و أوراق في يدو يدلوح بيهم، وهذا ليس دفاعا  على العكرمي إلي يتحمل مسؤليتو في كل الأحوال،  وانما حسب المنطق إلي يقول" إلي دارو من بلار ما يحدفش الناس بالحجر"

   سي اليحياوي إلي يعيب على بن عاشور انو ماهواش مناضل مثالي وانو ما عمل شيء ضد النظام البائد، يظهرلي فيه تناسى الرسالة هاذي إلي كتبها بخط يده لبن علي (إنزل تاو تكبر)

   سي مختار اليحياوي، إلي صفحات الفايسبوك الكل ترشح فيه باش "ينظف" القضاء، الظاهر عندو وجهين. وجه السوق ووجه الدار، وجه مناضل و وجه يثمن في انجازات بن علي ثماش ما يسامحو. وجه يخليه في إجتماع الهيئة يشكر في رئيسها بن عاشور على مساعيه للوفاق - وهذا على العموم ما أنكروش وإلي حاضرين في الهيئة يأكدوه-، ووجه قدام الإعلام ما ينجمش يشد روحو و يورينا العرض إلي شفتوه في الفيديوات إلي دارت على الفايسبوك وفي هاو بن عاشور عائق أمام الوفاق، و يجب أن يقدم استقالته... مش هكا السياسة! حتى كان تتنرفز وإلا تتغشش، تذكر أنك لاهي في الشأن العام والكلمة بحسابها !

  هاو كلام اليحياوي في الهيئة - إلي كان يعملوا مزية يردوا مداولاتها علنية ومسجلة - وهذا شوية قبل مع يخرج يعمل عرعور في الصحافة.

   وباش ما نقولش مستانس، عاود عمل نفس العملة بعد ما نسمة استضافت بن عاشور إلي حكى من جملة ما حكى على اليحياوي... سيدي القاضي، من غدوة على الصباح،  طلب قناة نسمة عن طريق صحفية على أساس انو يحب على حقو في الرد - إلي على فكرة كقاضي من المفروض انو يعرف انو قانونيا حق الرد ماهو موجود  كان في الصحافة المكتوبة - الصحافية قالتلو ما ثمة حتى مشكل مبدئيا، نشوف مع إدارة البرمجة ونكلمك. ياخي طلب منها أنها تكلمو بعد ساعة، وهذاكا إلي صار، كلمتو مع العشرة ونص متاع الصباح واعلمتو أنو  إدارة البرمجة موافقة ياخي قاللها : " باهي! أما ماك تعرف نحنا القضاة هكا هاكا بالقانون، وراني بعثت ديجا عدل منفذ باش يعمللكم تنبيه عبر الطرق المباشرة"  على أساس انو طلب ذلك العديد من المرات ولم يتحصل على إجابة و قاللها انو تاو يتصرف باش يتدارك الموقف ويكلم العدل المنفذ و يقلو "سي بون"، و لكن العدل المنفذ مع نص النهار تبوانتا وجاب معاه التنبيه إلي مكتوب فيه انو إتصل بالقناة عديد المرات دون التحصل على رد...  وهذاكا إلي تنقل بعد على الفايسبوك : "القاضي الفاضل مختار اليحياوي يرسل تنبيه عن طريق العدل المنفذ لقناة نسمة حتى تمكنه من حق الرد على الهجمة الغير أخلاقية اللتي شنها عليه و على القضاء رئيس هيأة الالتفاف على ارادة الشعب بن عاشور مدة الرد 15 دقيقة"، باش في الأخير يخرج ديما ضحية ومسكين.

   الحاجة إلي تضحّـك انو  الصحفية إلي إتصل بيها كانت بارانوياك  أكثر منّـو ووكلت عدل منفذ باش يجي يعاين تليفونها وتوقيت وطول مدة الإتصالات إلي جرات بيناتها وبين سي اليحياوي قبل حتى ما يوصل العدل المنفذ متاعو.

  لهنا نحب نغلق هالقوس الكبير و نزيد نذكر انو ما حكيتش حكاية اليحياوي باش نشوهلو صورتو و إلا شماتة، و انما باش تشوفو حال السياسة إلي عندنا في تونس، و كونو متأكدين إلي فمة برشة يحياويات في النخبة السياسية من يمينها إلى يسارها بدون إستثناء. هاذي النخبة السياسية إلي في عوض ما تشجع الناس على التقييد في الإنتخابات لاهية في عرك الحوم  وفي التكمبين و المزايدة على بعضها -حتى كان جات ثمة برامج- ووحلو عندهم شهرين في هاو هذا تجمعي وهاو هذا مطبع مع الكيان الصهيوني و في التكبير وفي "لم يتغير شيء" والبكاء على الأطلال... لحد الآن حتى حزب ما أثبت انو ينجم يصلح للحكم.

   خلاصة القول، ثمة برشة عباد عندها تاريخ في النضال الحقوقي، أما كي تولي سياسة يدوروها تغفيص! السياسة وللمرة  الألف، راهي تتلهى  بالشأن العام، مش عرك الحوم ومقص هاذا وأعطي مشطة لهذاكا! ولذا سي اليحياوي وغيرو، كان عندكم ما تضيفو للبلاد مرحبا أما كان باش تولي تكمبين و متاجرة بالتاريخ النضالي متاع العباد، تاو نعطيوكم جزيرة زمبرة تنجمو تمارسو الهواية المفضلة متاعكم  وحدكم، أما نحنا توا عندنا إنتخابات وماذا بينا نشوفو شوية برامج، مش غسلان صابون! 

السبسي والثوريين : بابا عزيزي وين ماشين ؟

   كان جات الدنيا هاذي تتفسر بمنطق الأشرار والطيبون راهي ولات حكاية ساهلة ياسر من هاك الزمان. لكن ساعات ثمة فرق بين الحق والحكمة (le sage et le juste)  يخلي الناس تاخو مواقف مختلفة من نفس القضية وكل واحد يبدا ماشي في بالو إلي هذاكة هو المطلوب وهذاكا هو إلي لازمو يتعمل، ولذا باش نقدم رأيي الخاص من غير مجاملة، حب من حب، وكره من كرخ!

   باهي، الناس الكل سمعت بالأحداث إلي صارت مؤخرا إبتداء من محاولة الإعتصام بالقصبة و أحداث العنف إلي صارت في منزل بورقيبة وفي سيدي بوزيد وفي الرقاب وباب الجديد ووو ... ولهنا نحب نحلل مواقف العباد الكل دون إستثناء:

.

   السلطة وعلى رأسها عم الباجي قايد السلطة وكي العادة وكي المتوقع، تموقع في مكانه المعهود : هيبة الدولة على حساب كرامة المواطن، بطريقة أخرى : كي يموت بوليس، مستعد باش نوقف كل الأبحاث العدلية إلي تبحث في شكون قتل المواطنين وفي القناصة - هذا كان ثمة أبحاث من أصلو - ونتلها في البحث على إلي قتل رجل الدولة ممثل السلطة وهيبتها. وفي إنتظار إستكمال التحقيقات، شدوا رواحكم بشوية عصابات مفسدين هدفهم زعزعة النظام توجهم أطراف نعرفوها... بالطبيعة الحديث على التجاوزات والأخطاء متاع الجهاز الأمني لا مكان له في قاموس مدرسة  البورقيبية لأنو  الأب عمرو ما يغلط و العين عمرها ما تعلى على الحاجب و الظفر مالازمش يخرج من الجلدة. وهذا تنجمو تلاحظوه بنسب مختلفة عند أبائكم : جاكش مرة بوك وقالك سامحني راني غلطت ؟ أبدا ! يخاف لا يطيح قدرو و يفقد الهيبة متاعو!

   وبالتالي مفهوم هيبة الدولة، هو محور كل السياسات متاع الحكومة الحالية، هو  المعيار باش السلطة تقرر اناهو الإحتجاج المبرر واناهو الإحتجاج الذي يعكر صفو السلم الإجتماعي. وكيما أي راجل زمني وكبير ونرفوزي وما يحملش شكون يلوي العصا في يدو، كي يروح للدار ويلقاها  ماهياش منظمة و داخلة بعضها وممسخة، يبدا يعيط على ولادو و يحملهم المسؤلية الكاملة و تخرج هاك الجمل الفريدة من نوعها من قبيل  :" تحب تقتلني ؟ "، "تقابلتو عليا إنت وخوك باش تمرضوني؟"، "تحبو تدفنوني بالحياة"، "يا أنا يا انتوما"، وينسى بوك الحاج إلي ممكن الدار مهياش منظمة ومريقلة والعشاء ماهواش طايب على خاطر ما خلاش المصروف  وإلا ما شراش اللازم باش يطيب العشاء و باش تكون الدار مريقلة. وبالطبيعة كان الأمور ماهياش على ما يرام راهو بالضرورة ثمة مخطط كامل و مبرمج لإثارة البلبلة، و مش على خاطر كل واحد كرز من شيرتو وإلا حمشوه ياخي بدات الإضطرابات. أبتاه سامحني كان قصيت عليك و لكن: le désordre n'a pas besoin d'un mouvement ordonné pour s'installer

   حكومة السبسي ضعيفة، و مع ذلك تفضل الضعف الخارجي على الضعف الداخلي. بطريقة أخرى، عندها أكثر خبرة في التعامل مع الاحتجاج الشعبي من أنها تتعامل مع الاحتجاج الداخلي إلي لا مفر منه كان باش تاخو خطوات عملية وثورية تستهدف بيها المجرمين في وزارة الداخلية والفاسدين ككل. تفكرو مليح شنوة صار للراجحي وقت إلي صدموا عليه في بيروه ! ثمة نقص في الوقت والإمكانيات ووسع البال باش يرميو المجرمين في الحبس،  و زيد من الفوق هيبة الدولة تفرض عليه الخيار هذا. الخيار متاع انو يظهّـر الدولة و كأنها كتلة متماسكة على فرد نغمة عملا بالمقولة:  أنصر عونك ظالما أو مظلوما!

  في الواقع هذا نوع من العروشية لا أكثر ولا أقل. و تهنّـاو العروشيّـة هاذي موجودة في الشعب التونسي الكل بدرجات مختلفة : الخوانجي عمرو ما يقول انو صاحبو الخوانجي غلط كي إستعمل العنف في الأفريكار. إلي جايبها علماني، عمرو ما يقول انو الحاكم غلط كي ضرب اللاكريموجان في وسط الجامع، الثوري أكثر من اللازم عمرو ما يقول انو صاحبو الثوري غلط كي نشر معلومات كاذبة وإشاعات  يهدف بيها إلى تحريض النّـاس... في أحسن الأحوال يطفّـيو الضو على الغلط... في متوسط الأحوال يحاول يبرّروه.  النهضة عاملة بيان قال شنوّة احنا ضد العنف وبعد عاملة جريدة كاملة على استفزاز المشاعر الدينية.  الجماعة إلي ضد إعتصام القصبة 3 يبرّرو ضربان اللاكريموجان في وسط الجامع بأنو العباد توظّـف في المساجد للسياسة. والحاكم إلي يجي يقلك استفزّونا بالسبّان ياخي فرّقناهم بالقوة.... أما في أتعس الأحوال فإنو هذا النوع من العروشية يدفع العباد إلى رمي مسؤلية الغلط على الطرف المعادي : السلطة تقول مجموعات منظمة وملثمة، الخوانجي يقلك لا هاذوكم تجمعين مركبين لحية... وين المبادئ ؟ وين الصدق في القول والإخلاص في العمل ؟ وين الإسلام فيه حلول عميقة جدااه ؟ وين تونس ليك تونس ليا ؟ الناس الكل تتحمل المسؤليّـة، و لذا زايد عرك الفروخ متاع إنت تتحمل أكثر مني المسؤلية، وإلا هذاكا هو راس الفتلة...

  كي نجيو نشوفو نلقاو إلي أوضاع كيف هاذي، في غياب العقل وفي حضور الإنفعال ما تنجم تفرز كان مزيد من الإستقطاب والثنائيات وكل واحد والدوافع متاعو. الحاجة الباهية ( أو الخايبة زادة) انو الناس إلي صوتهم مشرقع في جميع أرجاء العالم الإفتراضي الكلهم من الشباب المراهق سياسيا، إلي إكتشف السياسة عندو 5  شهر وولات هوايتو الأولى. أمّـا الكبار، وإلي هوما مواطنين كيفناكيفهم ، فماهمش قاعدين يتكلّموا، لاهين في تحصيل الخبزة لأولادهم ابطال الديجيتال باش ينجمو يخلّـصوا حق الكونيكسيون...  ولو كان كل واحد توا يمشي يسأل بوه وإلا امو على رايو في إلي صاير في تونس تاو يتصدم و يحس إلي ماهواش أغلبية  حتى في عايلتو كيما ماشي في بالو. أما الله غالب، الحوار مع الشباب في غياب الكبار والعقلاء ما قعد منو كان التبلبيز والبعد عن الواقعية... والنتيجة شنوة؟ فروخ عمرهم 14 سنة تموت، و شوف عجب ربي، ما يموتوا كان ولاد الزواولة والفقراء... وابطال الثورة من هواة "جام وجو بارتاج" و إلا "نعمل فيديو أعلن فيها أني باعث الثورة وأني صفعت بن علي"  راكشين ما يصيرلهم شيء ! و الكبار، في أغلب الأحيان يبدا ما فيبالهم بشيء من إلي صاير، يخدم ويكلت على جد بوه باش في الأخر يروح ويتصدم ويقولولو ولدك مات بكرتوشة حولة   عندها تراجكتوار حلزونية.

   أنا واحد من الناس مانيش ثوري و عمري ما كنت ثوري ولا مناضل لا قبل و لا بعد بن علي لأنو الحقوق و الحريات يا تمارسها و إلا تنساها، كثر الكلام على الحريات والحقوق زايد. ولكن اليوم، كان يخيروني ما بين انو حتى قناص ما يتشدّ في مقابل انّـو يتوقف العنف ويتنهي مسلسل الموتى إلي عمرهم  14 سنة نوافق من غير شروط. أما الله غالب ما خيّـرونيش، وهاني نتفرج كيفكم على المسرحية سيئة الإخراج متاع كيفاه باش تتعاود سيناريوات كنت نتصوّر انّو الشعب التونسي بأحزابو، بالثوريّـين وبالسلطة متاعو أذكى من انو يدفع في إتجاه اعادتها.

   حبيت نلقى تفسير للعباد الثورية هاذي إلي ما تترددش باش تنتهج التضليل، الكذب، المزايدة، التهويل باش تحرض الناس على الخروج للشارع. ممكن ياسر غايضتهم كيفاه التحرك الشّـعبي الأول إلي انتهى بهروب بن علي كان من غير قيادة وما صنعـلناش قائد الثورة. هروب بن علي فاجأهم، ياخي قالوا هاو فرصة توة نعاوودها ونوليو الربوبة وقادة الثورة و نكونو نحنا القادة، كيف ياسين العياري إلي طلع البارح بحكاية من الحيط يقول فيها انو قرر كشف سر كان باش يخليه لحفّـار قبرو والغاية من الكشف متاعو للحقائق في الوقت هذا بالذات  هو منع رشيد عمار من إعلان البيان رقم واحد ... سي ياسين، المخطط متاعك نجح، رشيد عمار تراجع عن إعلان البيان رقم واحد بعد سماعه لتصريحاتكم النارية، و لا يسعني من موقعي هذا إلا أن اشكر باعث الثورة ياسين العياري على التدخل متاعو باش ينقذ الثورة مرة أخرى من إلتفاف آخر تصدى له هو ببراعة صحبة رفاق بررة!

   ممكن زادة هالثورية الزايدة والمفرطة جاية من انو ثمة عباد عندها فكر وايديولوجية  معينة، قعدت مكرزة كيفاه لقات رواحها تقسم في ثمار الثورة مع عباد هوما ما يحملوهمش... عادة هاو نوليو نعملوا القصبة 3 و نعلنو ثورة أخرى صافية من الأعداء حتى كان  أكثر العباد ماهياش موافقة، وإلي ما يتبعناش خائن وتجمعي ومع الدكتاتورية... بطريقة أخرى : أنا ثوري زبور، أما ماذبيا نكون الزبور الوحيد !

   ثمة زادة نو آخر من الثوريين الجدد كانت تطحّـن لبن علي كيف سي لا نفاق متاع كورة تونس،  إلي في ليلة 13 جانفي كاتب " ليس من مصلحة تونس تغيير الرئيس الآن" وكي تغدر بهروب رئيسه المفدى قرر انو يغسل الذنوب متاعو بالدعوة إلى الثورة، وديما يزيد على العباد ثماش ما ينساو ماضيه التافه.

   وثمة زادة عباد ثوريّـة من النهار إلي تولدت فيه. الهدف من الثورة عندهم هو الثّـورة نفسها! معناها كي يوفى الإحتجاج يكرزو، يحسّـو  روحهم بدون فائدة، و لذا سياسة المراحل هذي كفر في قاموسهم، ولازم المطالب الكل تتحقق الآن مهما كلّـف ذلك من مزيد تأزيم للوضع و مهما كانت المطالب هاذي متناقضة عمليّـا. كيف بعض العباد إلي تنادي باسقاط حكومة صلوحيتها  القانونية إلي تبقات أقل من صلوحية كعبة دانات، وتندد في نفس الوقت بمشروع خيالي لتأجيل الإنتخابات. السلاح متاعهم هو الثنائيّـة القطرية متاع الأشرار والطيّـبون ونظريات المؤامرة وحكومة الظل و خاصة تحميل السلطة كل المسؤوليّـة في أي حاجة تحدث: القضاة باهين ولكن السلطة ما تحبهمش مستقلين، الإعلام كفء ولكن حكومة الظل...

   باهي نرجعو للواقع متاعنا، أنا الحل إلي نراه يكلف أقل أرواح وأقل تشنّـج هو الذهاب إلى إنتخابات، تقوم على اثرها سلطة  منتخبة تكون عندها الشرعيّـة الغير قابلة للنقاش باش تحاسب المجرمين، وتكون من إختيار الشعب باش ما يقعدش كل مرة يطلعلنا فرطاس قال شنوة هيئة بن عاشور غير شرعيّـة ولازمنا نعيدو هيكلتها باش في الأخير تقعد ديما هيئة من غير شرعيّـة إنتخابية. الله غالب، عندنا حكومة ضعيفة وعاجزة عن إتخاذ خطوات غير قابلة للإرباك من الأعوان الفاسدين متاعها. تفكروا مليح الراجحي وقت إلي بدا بإعادة هيكلة الداخلية كيفاه قامت عليه حملة تحت شعار "لا زال القمع متواصلا" و الحملة هاذي ساندوها أغلبية الثوريين من جميع الأصناف لدرجة انو تنحيتو ولات حكاية ساهلة ياسر، وبعد رجعت نفس العباد هاذي تتباكى وتنادي بإرجاع الراجحي على رأس وزارة الداخلية. أكثر العباد إلي جايبتها فايقة بالوضع هي نفسها أكثر الناس القابلة للمانيبولاتيون وللدمغجة لأنهم ما يخمموش بعقل وانما بإندفاع. وحتى كان تحقيق "أهداف الثورة" والعدالة هو الهدف متاعهم  فإنو  ينقصهم برشة نضج قانوني وسياسي، وتعوزهم الحكمة... وساعات تطيح بأشكال تقعد باهت في مستوى البهامة إلي ينجمو يخرجوها. كيف أدمين  الصفحة متاع تونس_ Tunsisie و شلتو متاع الحقائق الخفية إلي لاعبينها فايقين بالطرح قال شنوة حكومة الظل تشّـن في حملة إعلامية على السبسي على خاطر ماعادش حاجتهم بيه ويحبو يبدلوه... وفي نفس الوقت يحرضو في العباد على الخروج في  مظاهرة تنادي  بإسقاط السبسي ... توا إنت جعبة وحلّـبت بالمؤامرة، وبهيم لدرجة أنك تعمل كل شيء باش تنجح المؤامرة هاذي ؟

    في الختام،  نحب نعاود  نذكر انو العدو الحقيقي للعدالة مهواش طول المدة، وانما النسيان. نمشيو ننتخبو، يجيو جماعة يكونو مختارين من الشعب و إلي عندو حق تاو ياخذو. غير بركا إنتخب  السيد إلي باش ياخولك حقك ويحافضلك عليه على خاطر الحكومة الحالية هدفها الحفاظ على أجهزة الدولة أكثر من الحفاظ على حياة المواطن وأمنه وحقوقه. أما الثورجيين هاذم إلي بالكذب وبالمزايدة يحبو يقيمو فيها ثورة جديدة و يكونو  الزواولة و المهمشين أكثر المتضررين منها  في حين أنهم هوما راكشين في الدار قدام الحاسوب العائلي متاعهم فنحب نذكّـرهم انّـو مش أي واحد يعيط باسقاط النظام  معناها راهو باش يجيب نظام خير منو. الأمور تنجم تتحسّـن بسهولة ولكن بالشويّـة و انجمو نتجنبو الوقوع في كلاسيكية الثنائيات متاع الأخيار والأشرار. الحكومة عندها حق كي تكرز عندما يمتولها أعوانها، الثوريين عندهم حق كي يكرزو على عدم تقديم القنّـاصة للعدالة، وأنا عندي الحق كي نكرز على الوضع إلي كل واحد يبدا يبرر في الهجوم والعنف على الآخر، الحكومة إلي تبرر في القمع و البلابزية إلي يبررو في حرقان المراكز... ولذا يزينا من العروشية السياسية! امشي إنتخب و يزي بلا تشعيل للجو يا ثوري، وفّـر الظروف اللازمة للإنتخابات  ويزي بلا قمع ولغة العصابات الملثّـمة يا حاج !

القصبة 3 : حاكم جادور في مواجهة الجاردور!

   حبيت نخصص التدوينة هاذي باش نحكي على القصبة 3. الإعتصام أو محاولة الإعتصام إلي بائت بالفشل وانتهت ب"أدمينات الثورة" إلى وضعية ولاو يعيطو فيها: "أرجوكم أرجوكم ! انضموا ! تبا تبا لقد تحشالنا ".

   قبل كل شي، نحب نذكر انو الإعتصام هذا أثار جدل كبير وإستطلاعات الرأي إلي شملت ما يقارب 35 ألف مواطن إفتراضي بينت انو العباد كانت مقسومة إلى مساند  ومعارض  بنسب ياسر متقاربة مع تفوق طفيف جدا للعباد إلي ضد (51،4%). وهذا من قبل الإعتصام، الشيء إلي يلزم المساندين للإعتصام بأنهم يكونو   أكثر حذرا في إستعمال الشعارات من نوع "الشعب يريد". في مثل هذه الحالات، شعار "نحن نريد" يكون أكثر موضوعية ودقة. إلي ماشي يعيط "لا للإلتفاف على إرادة الشعب " لازمو أول ما يبدا، يبدا بروحو وما ينتحلش صفة الشعب كي يبدا في بالو إلي ثمة نسبة كبيرة من الناس ماهياش موافقتو في التمشي متاعو. ومع هذا الكل لازمني نأكد انو حق العباد في التظاهر ما فيهش نقاش. تحب تخرج تعمل مظاهرة على التصحر في الصين الشعبية ما يسالك حد ! كون مقنع وصادق تاو تجي العباد. هذا من ناحية مبدئية. أما من ناحية عملية فإنو كما قال البيغ، وهوني باش نقتبس كلامو : "القصبة 3 أو عندما تكتشف حركة النهضة أنّ التونسي الزوالي ينجّم يمشي معاك لإجتماع شعبي باش يعبّي الصالة مقابل كستروت وعشرين دينار وركبة في كار كليماتيزي، أما كيف تحبّ تهزّو في غرغور القايلة ياكل العصا في بلاصتك ويزحف على القصبة بالملايين يقلّك من أنتم؟ (اللهمّ يكون ينتمي لحزب المؤتمر هههه)..."

  برشة ناس مشى في بالهم إلي أنا، وهوني باش نحكي على روحي على خاطر ما نعرفش الاخرين كيفاه يخممو، ضد الإعتصام على أساس أنو النهضة وراه، ولأني "ضد" النهضة وبالتالي لازمني نكون ضد الإعتصام... أولا  نحب نوضح إلي أنا عمري ما كنت ضد النهضة كأشخاص، الإسلاميين الكل توانسة قبل كل شيء -إلا من رحم ربي و يحس في روحو عثماني ولا من السلاجقة كيف بسيكو آم-. بطريقة أخرى لا أعارض النهضة على خاطر فلان وفلان ولكن لأسباب فكرية، وعمري ما نبني أفكاري باش تكون ديما ضد النهضة. أما ثانيا وهو الأهم فأنو معارضتي لإعتصام القصبة 3 ناتجة عن معارضتي لأغلب المطالب شكلا ومضمونا و خاصة توقيتا. و هاو باش  نفركو الرمانة مطلب مطلب كما وردت في الإعلان متاع الإعتصام في هذا الرابط.

1- محاسبة المجرمين والفاسدين.

   المطلب الوحيد إلي يقعد شرعي و ديما في وقتوا طول ما هو ما تحققش... ولو كان جاء الإعتصام متاع القصبة 3 فيه كان المطلب هذا راهو صار توافق أكبر بياسر لكن الله غالب، منظمي الإعتصام حطوا المطلب هذا باش يعطيو الإعتصام صبغة شرعية، شوية الناس ما مشاتش في الخط. ولهنا نحب نذكر  إلي العدو الفعلي للعدالة ماهواش طول المدة وإنما النسيان...  وماناش باش ننساو، ولذا طال الزمان أو قصر، كيما قال فوزي بن قمرة : "نجيبك نجيبك يا القناصة... مدام أنا نريدك، نجيبك نجيبك"

2- إعادة هيكلة الهيئة العليا للإلتفاف على الثورة بإقصاء دعاة التطبيع

   هذا هو أكثر مطلب "مندس"... للي ما تبعش المسلسل، الهيئة هاذي ولات بيها وعليها و "أحل" (بضم الألف) إطلاق النار عليها من نهار إلي خرجت منها النهضة... وبالله قيلونا من حكاية التطبيع ... رب عذر أقبح من ذنب! هاذي حكاية يحكيولنا فيها ؟ اش ما دخل التطبيع من أصلو في الثورة... المطلب هذا رفعتو النهضة و النسخة الاوريجينال متاعو هي  "إعادة تشكيل الهيئة بما يضمن التوازن الحقيقي للقوى داخلها" معناها نحبو يكون عندنا  أكثر بلايص ونحبو ما يتعدى شيء من غير موافقتنا عليه ... بالطبيعة الحكاية هاذي خرجت وقت إلي تجبد قانون الأحزاب ومصادر تمويلها... أي بعد 5 شهر من إنطلاق أعمال الهيئة هاذي وإنضمام النهضة ليها. ولذا من غير تنوفيق قالوا تطبيع و راس لمبوط وهات الصحيح تاو نتفاهمو. أما مطلب كيف هذا وراه مصلحة حزبية ضيقة تعيط يا بابا يا أمي، من المستحيل أنك تضفي عليه شرعية مش كي تعيط على دماء الشهداء من عهد قرطاج!

3- ضرورة تشريك الشباب

   أنا موافق على المبدأ، أما شكونهم ها الشباب.... كانهم "لا نفاق" متاع كورة تونس وإلا "بسيكو آم" وإلا الجعبة الآخر متاع "الحقاق الخفية"، السماح ! كان ثمة شاب وكفء يتفضل مرحبا... أما على حد علمي وقت إلي جاو الشباب الإطارات إلي كانوا في الخارج باش يخدموا في الحكومة الإنتقالية قالوا هاذم عملاء فرانسا... عدى ذلك ما نراش شكون من "الشباب" عندو الكفاءة والقدرة متاع أخذ القرار و يحصل عليه إجماع كبير باش يتحمل المسؤلية ويكون فاعل و عموما حتى حد ماهو غير قابل للتعويض. وهذا لا يعني انو الباجي قايد السبسي أحسن ما فمة باش يتحمل المسؤليات، عمي الباجي  ياسر تاعب قدام الإعلام التونسي... ويتعامل بالمنطق القديم متاع ناس بكري ولغة "أنا بوك ونعرف مصلحتك و نخاف عليك" وكي تلوي العصا في يدو يجبد العكاز ويعطيك ! أما الله غالب، هاي كاترال شادين بيها رواحنا للي نخلطو  الحي نهار 23 أكتوبر ووقتها يعمل ربي دليل!

4- إقالة وزيري العدل والداخلية.

   المطلب هذا مفرغ من معانيه ومن اهدافه. خلينا نكونو واقعين: البوليس متاع تونس خامج، ومش كي يعملوا ألف إضراب وألف مظاهرة ويبكيو دموع التماسيح، وهذا سواء كان الصيد في الداخلية وإلا الراجحي. وعلى فكرة، كي شد الراجحي الداخلية، ما تتذكروش كيفاه طاحت فيه العباد ركبة قال شنوة القمع متواصل للي ولات اقالتو ساهلة ياسر وبعد رجعت العباد لطحينها العادي متاع "نريد "مسيو بروبر"  وزيرا للداخلية؟

   ثم الحبيب الصيد ما عملش حاجة معينة بل إكتفى بأنو ما عمل شيء! وأثبت عدم الكفاءة متاعو في أحداث المتلوي وين الجهاز الأمني فشل في حفظ الأمن إلي هو مسؤول عليه بالأساس. أما إلي ماشي في بالو انو كي يتبدل وزير الداخلية باش يولي الحاكم يفرق في النوار فهو واهم. البوليس متاع تونس في أحسن الأحوال جادور، مش متربي، عضروط، قبيح، وهذا على خاطرو مهواش متكون! تكوينو الوحيد أنهم يصدمو 10 كونتر زوز ويفشخو العباد بطريحة وبذلك يتم حفظ الأمن. والأساليب هاذي متاع الهوكش والقطعية باش تقعد فيهم إلى أن تتم رسكلتهم في إطار برنامج كامل متاع إعادة هيكلة للجهاز هذا باش يفهم سي البوشلط معني الكلام إلي حاطينو في كواترووات في المراكز وإلي عنوانو "الإلتزام بخدمة المواطن".

5- استقلال القضاء

   بالنسبة للجهاز القضائي، فكما بينت في مقال سابق، المؤسسة القضائية باش تقعد مجموعة متاع bras cassés من غير كفاءة سواء كان لزهر القروي في الوزارة وإلا عمر بن الخطاب! وهاك تشوفو في الخدمة الزبالة : 5 شهور باش يحضروا قضية متاع زطلة على بن علي... و المهزلة متاع ما يعرف بقضية بن حسانة على المواقع الإباحية. حيث انو القاضي حكم في القضية هاذي بتفويض سلطاته لل ATI باش هي تقرر حجب ما تراه صالحا ! وهذا في القانون يتسمى تجاوز للسلطات عن جهل وعن نقص حاد في الكفاءة. جهل يخلي القاضي بطريقة غير قانونية يمنح سلطاتو للوكالة متاع  الأنترنات في حين انو إلي لازم  يعملوا انو يحكم  بحجب ليستة يكون هو محددها مسبقا والوكالة تكتفي بالتطبيق، هذا إذا تجاهلنا التعدي الواضح على الحريات الشخصية و حق العباد باش تتفرج في إلي تحب عليه من غير وصاية.هذا بالإنجليزية يقولولو  : fail on failure . معناها نهار آخر ال ATI تقرر حجب الفايسبوك على خاطر رات إلي فيه أشياء منافية للاخلاق تاو تضربولها على الطيارة، كان قبل الحجب يتم دون مبرر، توا ولى عندو تفويض قضائي ...

  
   من الأخر، حكاية إستقلال القضاء هاذي حكاية بيدونة، الي يحب على الإستقلالية يتصرف بإستقلالية... وديجا مشكلة القضاء الكبيرة هي نقص الكفاءة إلي يغطيو فيه برميان الكورة في ملعب الحكومة، كيف مؤخرا جمعية القضاة إلي عاملة بيان تدين فيه عنف البوليس و - شدو رواحكم - تطلب من الحكومة فتح تحقيق قضائي لتحديد المسؤولين ومعاقبتهم ... ياخي شكون إلي يحلو البحث ؟ ياخي مش من صلاحيات القضاء إنو يفتح تحقيق، وانو يعاقب ؟ في بالي القضاء هو الجهة الوحيدة إلي عندها صلاحيات العقاب ... وهذا مش قاضي مش ثنين ... هاذي جمعية قضاة ! من غير ما نزيد نطول في هالنقطة... عملوا العار !

6- تفعيل العفو التشريعي العام

   في بالي المربوطين لكل تسيبو... حتى من جماعة سليمان... الوحيد إلي لازمهم  يسيبوه ما جبدوش عليه واسمو سمير الفرياني...  وفي إنتظار النداء لإعتصام من أجل إطلاق سراح سمير الفرياني ... هانا نتفرجو وساكتين.

7- التمسك بموعد الإنتخابات في 23 أكتوبر

   و لما لا نعملوا إعتصام باش نتمسكو بتونس كإسم للدولة متاعنا ؟ ياخي شكون جبد على تبديل موعد الإنتخابات؟  بالعكس توا إنت كي جاي تطالب بإعادة هيكلة الهيئة متاع بن عاشور، وبإستقالة بن عاشور، ماهو ثمة ريسك متع فسخ وعاود من  الأول وجديد. هيئة الجندوبي إلي انتخبتها هيئة بن عاشور غير المتوازنة نلغيوها ونلقاو رواحنا نتناقشو مرة أخرى في الإنتخاب على الأفراد وإلا القائمات... معناها الإعتصام هاذا ينادي بحاجات تنجم تكون متناقضة،  وحتى كان ظاهرها رنان وعليه توافق فأنو أغلبها مش في وقتو : شهرين وتنتخب و تنتهي صلوحية حكومة السبسي وهيئة بن عاشور. لواه الفساد ؟!

ما بعد الإعتصام

   باهي نحب نرجع توا للإعتصام في حد ذاتو، وأقل حاجة انجم نقولها هي انو الحاكم متاع تونس ماهواش ناوي يراتي حتى مناسبة باش يثبت للرأي العام انو ضد الشعب. و انو مهواش يحفظ في الأمن بقدر ما انو يقمع في الناس، ولهنا كليمة لطحانة الحاكم على شاكلة هذا الرهط: ما تحشمش على روحك تطحن للبوليس؟ اليوم هاو كلاوها "أعدائك"... تهنى غدوة تاو يجي طهورك وما ينفعك طحينك وقتها! رهوط ماعندهاش مبادئ و في سبيل افكارها وقناعاتها - هذا كان عندها أفكار وقناعات من أصلو -  تبرر وتدعم آلة القمع!  ولذا كلمة وحدة : تفيه !

ثانيا : اللاكريموجان في الجامع ؟ ألو فيق يا حمادي ! وين ماشي ؟ بقطع النظر على مسألة إحترام المقدسات، فإني لهنا نستغرب صمت برشة عباد إلي تعيط  وتناضل على إحترام الأديان وراس لمبوط و هي كان جات كنيسية تمست راهم شنعوها بالعياط. البوليس مهمتو حفظ الأمن في الأماكن العامة وفي الشوارع.  و ما عندوش الحق يتدخل في جامع وإلا في جامعة وإلا في مدرسة إلا ما يطلبوا منو المسؤلين على المؤسسات هاذي انو يتدخل. لأنو الأمن طلع وإلا هبط يقعد خدمة توفرها الدولة... الحاصل ملا هوايش ... وبرى قال وظفو الجامع لإعتبارات سياسية. هذا ما يعطيكش الحق باش تضربهم بالقنابل المسيلة للدموع في وسط الجامع. وحتى كان استفزوك، خدمتك إنت كبوليس انو الشعب يستفزك، تخلص باش يكون عندك ضبط النفس، أما مادامك بوليس جبري وماكش متعلم... زايد نقريوك دروس تربية مدنية و إنت ساعات اسمك تغلط فيه كي تكتبو بالعربي !

   في الختام، نحيو عليكم المنطق متاع الثنائيات، ومش على خاطر ضد الحكومة تولي تساند اعتصامات مسيسة، ومش على خاطر ضد الخوانجية تولي تبرر القمع. وبالله نقصو علينا من الإشاعات... خاصة جماعة النهضة راهو عيب وماهواش تصرف إسلامي جداااه  ! كيف هوني

 ولا الخبر هذا :

   راهي لغة أحداث معزولة وتصرفات فردية من صفحات غير رسمية يديرها البوليس السياسي ماعادش تاكل. و الجو هذا متاع الإشاعات وهاو ضربوه وهاو إعتداء وهاو هجوم تخليني أنا واحد مالناس متملح من حكاياتكم و من البكاء متاعكم. إعلام بن علي كذب علينا للي بعثناه ... حتى كي يقول في النشرة الجوية غدوة راهو طقس مشمس نقولولو تحشي فيه ... اليوم حتى من "الثوريين" إلي "ثاروا" على كذب بن علي وهاو اعتصامات وهاو دماء الشهداء ... ولى عندهم الكذب وتزييف الحقائق ...العبرة  من الحكاية هاذي الكل: مش على خاطرك تعيط باسقاط النظام البائد و ضد بن علي معناها إنت إنسان ثقة وتصلح !