mardi 13 novembre 2012

نداء اليأس : إلي تعرفوا خير ملي ما تعرفوش.

عدنا، بعد مدة طويلة من الغياب على التدوين والدوانة، وعدنا اليوم بقرارات ثورية تتمثل في تفريك رمانة نداء تونس، أو بالأحرى علاش نجح نداء تونس أين فشل الآخرون.  نداء  تونس يمثل بالنسبة لبرشة ناس، وهذا واضح من طريقة كلامهم، الحل الأوحد والخيار الأنجع للخروج من اليأس والجمود السياسي ولإنقاذ البلاد من عدم كفاءة النهضة باش ما نقولوش من مشروعها المجتمعي...


خلي نرجعو للحكاية من الأول... الثورة... الثورة كي جات على غرادة، برشة ناس صارلهم كيف إلي صار للي سمع انو ربح في البرومسبور، بدا وقتها يخطط ويهندس ويحلم وكي مشى  باش ياخو بايو، لقا روحو يقسم في الكانيوت مع مليون رابح كيفو و في نهاية الأمر ما صور كان هاك العشرة آلاف فرنك إلي سميناها إصطلاحا حرية التعبير... عدى ذلك، ما تبدل شيء بصفة ملحوظة وهذا بشهادة الناس الكل. بطريقة أخرى، كيف نتفكر مستوى الآمال متاع الناس بعد 14 جانفي، وخاصة من اصدقائي الافتراضيين إلي نلقاهم اليوم من أشرس المدافعين على نداء تونس، ما انجم كان نحس بالأسف، على الأقل على حالة اليأس إلي وصلولها وإلي بالطبيعة ماهمش مسؤولين عليها.

باش نكونو واضحين، هاك التهم اللايثة متاع تجمعي و نظام بائد و راس لمبوط، أو كل المصطلحات من إنتاج شركة المؤتمر من أجل رئاسة الجمهورية وتوزيع شباب حركة النهضة على الفايسبوك وبعض الثورجيين من جماعة اليسار المغفل، راهي حكاية بيدونة ومكرزة و تخليني نحس في بعض الأحيان أني  في عركة متاع ملاهط و كل مرة تجي ملهط تحكي  بلغة "شفتها هاك الملهط شنوة تعمل" و تستنى منك  أنك تجي معاها ضد الملاهط الاخرين... و يمكن كنت انجم نلخص الوضعية هاذي بكلمة وحدة وهي "مزايدات" أما مافيها باس كان من حين إلى آخر نفسرو  لجمهور القراء معنى هذه الكلمة إلي ولات على كل لسان.

أنا واحد من الناس ما ننساش كيفاش كان معظم التونسيين يعيشوا ويتصرفوا تحت بن علي، ويمكن ألفة الرياحي تكون أحسن مثال على العقلية متاع التونسي في عهد بن علي: أخطاني نخطاك، ابعد على الشر وغنيلو، على قد لحافك مد ساقيك، شكون يقول للصيد فمك أبخر... ناس بكري ما خلاو ما قالوا باش يسهلولنا التأقلم مع نظام بن علي. وفعلا كانت الناس متأقلمة إلى حد كبير مع نظام بن علي الأمني إلي حتى وإن كان بوليسي بالأساس فإنو الناس كان تعرف كيفاش تربح منو طرف الأمن والأمان إلي كانت نتيجة حتمية لبوليس في كل رونبوان. وكانت العياشة تخرج تسهر في الليل، تمشي للقهاوي، تلعب طرح كارطة في الحومة... يعني بطريقة أخرى كان عند التونسي  هامش من الفضاء الخاص إلي ما يتدخل فيه حد ما دام ما يتدخلش في الأمور إلي ما تعنيهش، وإلي كان من بينها السياسة... اليوم نحكيو في السياسة في القهاوي، أما القهوة تسكر العشرة متاع الليل، نحكيو في السياسة مع التاكسيست، أما صعيب باش تلقى تاكسي في الليل...

بالإضافة إلى هذا الكل، التوانسة تأقلمو مع منظومة الإدارة الموازية و المحسوبية و ولات جزء من ممارساتهم اليومية إلي تبدأ من عدم شدان الصف إلى الرشوة، والجدير بالذكر انو حتى السلم القيمي تبدل بمفعول هذا النظام، فالرجال الكبار أو الجينراسيون إلي خرجت إنتريت عندها عشرة سنين توة، ومن ضمنهم الوالد، وهي الجينيراسيون إلي ساهمت في بناء تونس ما بعد الإستقلال، كانت تتميز بميل طبيعي للنظام والإنظباط. ما كانش جيل متاع أخذ قرارات بقدر ما كان جيل متاع تطبيق القرارات و الإنظباط التام للقانون إلي كان يحطو الحاكم لدرجة انو الشعارات إلي كانت ترفع بدون أي خجل في عهد بن علي كان من نوع "وفاء وولاء لصانع التغيير". الكبار هاذم هوما إلي بناو الإدارة التونسية يعطيهم الصحة لكن هوما زادة إلي بثو فيها عقلية : مادام المدير ماهوش هوني، ما إنجمش نقضيلك القضية متاعك ولو أنها من صلاحياتي. و بما أن الحاجة هي أم الإختراع، جات هاك المحسوبية و الرشوة و تشكل مجمع المعرفة وصار عادي وأخلاقيا مقبول انو مثلا قبل ما تمشي لسبيطار تفركس على واحد معرفة يسقدك ويقضيلك أمورك، وصار زادة عادي أنو الواحد ينظم للتجمع باش يلقى أكثر معارف وينجم يخدم ولادو و إلا ياخو رخصة بناء في ظرف جمعة في بلاصة ما يقعد عام وهو يجري وراها... وفي المقابل، السيد إلي في إدارة وما يقضيش يولي مكروه ومنعوت بالصبع... وباش تشوفو قداش المسألة معقدة، اسألوا على عبد العزيز بن ضياء في المكنين وعايلتو.. من الناس المحبوبين على خاطرو إلي يقصدوا يقضيلو...

التونسي يقعد قبل كل شيء إنسان، والإنسان ماذابيه يكون ديما خير من الناس، ويكرز كي يكون أقل من الناس، و هذاكا علاش الناس في المجمل ترفض عقلية المعارف والتدخلات ولكنها تقبل التعامل بها كلما واتات الفرصة على أساس انهم ضميرهم مرتاح وما ضروا حتى حد. و الخلاصة من كل هذا، انو الظاهرة هاذي ماهيش مربوطة بالتجمع، التجمع كان عبارة على نادي يتلم فيه الريزو الكل... لكن بإنحلال التجمع الريزو قعد لاباس بيه وخدام. وخذا فورمات أخرى: إلي مشى  للنهضة، إلي لقى حظو في النقابات، إلي كلمو كمال اللطيف، إلي كلمو شفيق الجراية... ياخي إلي حلو رياض أطفال قرآنية في ليلة وضحاها بالكش إستناو العام ونص إجراءات إدارية باش يرخصولهم... ماهو فلان يعرف فلان وتحت غطاء نعاونو في الوخيان تتقضى أمورهم لف لف.

المشكلة انو بعد ما جات الثورة وهرب بن علي اللي  كانت الناس   تجسد من خلالو   كل النظام البائد، برشة ناس بدات تحلم في أحلام وردية، مع شوية منومات ثورجية من قبيل "السلطة ملك الشعب" و "الشعب يريد"... برشة ناس ولات تحلم و ترا في أنها على قاب قوسين أو أدنى من دولة نظيفة متحضرة عصرية، شعب واعي، النرويج أصل! ترفعت شعارات كيف العلمانية، الشفافية، الأوبن قوف... إلي ناقصنا الكل باش نوليو دولة من دول السكنديناف بربشناه. والحاجة الفريدة من نوعها مجتمعيا على الأقل، إنو الناس إلي اشتركت في الأحلام هاذي كانت تعرف بعضها مسبقا، و هوما عادة أصحاب كانوا يتقابلو من قبل حتى في عهد بن علي وكانوا عايشين بما تيسر من حريات فردية وجماعية في ذلك الوقت. لكن في المقابل، ومباشرة بعد الثورة، خرجوا عباد يناديو بقيم ومبادئ ومشروع مجتمعي آخر: الدين والأخلاق والفضيلة، لكن انحصر خطابهم وتركيزهم على مستوى الفرد... يعني يناديو بمنظمة دينية - أخلاقية فيها عادي جدا انو وزير يكون عندو جنان و زوز  شوفرة و هيلمان... فيها عادي جدا انو "وخيان يقضيو لبعضهم" بإستعمال أجهزة الدولة... وهذا علاش حتى شيء ما تبدل في يوم التونسي من ناحية الممارسات. والجدير  بالذكر انو الناس إلي عندها نزعة أخلاقية-دينية في رؤيتها للمجتمع (على عكس الناس إلي عندها نظرة مؤسساتية)  ما كانوش يظهرو في الساحة العامة قبل 14 جانفي ويمكن أكثرهم تعرفوا على بعضهم بعد ما تعاود تشكل تنظيم الخوانجية. و هكا لقينا رواحنا في خضم صراع بين ناس منظمة عندها نظرة أخلاقية - دينية للمجتمع وناس غير منظمة عندها نظرة مؤسساتية-إنسانية وكان هذا بداية المغالطة الكبرى إلي عشناها حيث جزء من الشق الثاني رفض التنظم على أساس انو يدفع نحو  إستقطاب هو سيديجا موجود... و في هذا الإطار متاع التردد في التنظيم مشاو التوانسة  لإنتخابات بدون قانون احزاب، بدون ضوابط للتمويل وساعات بدون برنامج واضح للناس بخلاف انو برنامج معادي للنهضة. وفي الخضم هذا الكل، الناس الكل تحلم، الخوانجي يحلم بإنتصار الإسلام والعلماني يحلم بإنتصار قيم الحرية وكل واحد وتصوراتو ليها... الوحيدين إلي حشواه وكانوا أكثر واقعية من الحالمين الكل و أكثر عباد عندهم  قراءة سياسية براجماتية للواقع والمستقبل، هوما إلي حرقوا للطليان الأيامات الأولى بعد الثورة.

عام بعد الإنتخابات، شيء ما تبدل في الطبقة السياسية إلي تمثل الديمقراطيين، نفس الإنقسامات، نفس الوصولية، و نفس البهامة... خلات جزء كبير من التوانسة يشعرو باليأس، بعد إلي كنا نحكيو على علمانية، طحنا لمدنية وشوف وشوف، بعد ما كنا نحكيو على إستقبال الحاكم بالورود، رجع الحاكم بالماتراك، ولينا نحكيو على تعليم قال شنوة زيتوني... تي حتى عيد الشجرة رجع! في مثل هذه الظروف، برشة توانسة، وأنا هنا عكس الثورجيين لا أحكم، لقاو انو باش ينقذو ما يجب انقاذه... لازمهم يتنظمو تحت شعار واحد قوي ورنان ومافيهش العيب ... الوطنية... إلي لخصوها في شخص الباجي قايد السبسي وفي معجمه البورقيبي.

الاشكال في الناس إلي نلقاوهم إنظمو إلى نداء تونس اليوم ليس كونهم تجمعيين، بل الوضع إلي خلاهم يلاحظو اننا بصدد التحول من مجتمع كل واحد يشك في جارو على أساس  انو عساس و صباب لمنظومة بوليسية تؤطر المجتمع، إلى مجتمع كل واحد فيه عساس على أخلاق جارو  و على منظومة دينية - أخلاقية ماشي في بالو انو  مطالب بحمايتها، وهنا تندرج كل الأطياف المجتمعية المتنوعة من ظواهر فكاهية كيف البحري الجلاصي إلى ظواهر جدية كيف السلفية. وكيما قلت سابقا يتميز الوضع هذا و كل المدافعين عنه برؤية لا مؤسساتية ربما قد تتشكل مؤسساتيا لاحقا إذا لم تجد مقاومة. بطريقة أخرى، جارك إلي باش يبعثلك الحاكم على خاطر تسكر في رمضان على الشط ماهوش يدافع على مؤسسة قائمة الذات، اسمها مؤسسة الأخلاق الحميدة عندها ممثلين وبيروات... وانما هكاكة، عندو مشروع مجتمعي لا مجال فيه للحريات إلي هو لا يمارسها. وبالطبيعة التونسي راهو ديما حاجة وحويجة، منها يفرض قناعاتو، ومنها يدبرش حويجة كيف فتحي العيوني وبن حسانة الزوز محامين إلي إشتهرو برفع القضايا متاع الأخلاق الحميدة.

الاشكال الثاني في نداء تونس، هو انو الناس إلي تدافع عليه، تعتقد بطريقة ساعات علنية أو سرية بأن المجتمع التونسي ليس كله جدير بالديمقراطية، وهذا صحيح إلى حد ما. الزوالي إلي يبيع صوتو في الإنتخابات انجمو نلقاولو الأعذار الكل، لكن يقعد غير جدير بالديمقراطية. وفي مثل هذه الظروف الحل هو العودة لصور متاع سلطة نقبلوها مجتمعيا: سلطة الأب. وهو ما يمثله البجبوج بالنسبة لأحباء نداء تونس: البو إلي يعرف مصلحتك أكثر منك، وإلي تحت سقفو الأخوات المتعاركين والمتنابزين الكل يسكرو أفامهم، ويبوسو بعضهم  ويسمعوا الكلام... وهذا ما يفسر الميل الطبيعي عند نداء تونس  للمفردات من نوع "الوحدة الوطنية" "مصلحة تونس العليا" " يجمعنا الإيمان بتونس"...

منطق الأبوية paternalisme هذا عندو أعراضو الجانبية إلي من الضروري الوقوف عليه. مطالب كيف الشفافية و التشريك في القرار من المطالب التي ستقع التضحية بها... عمركشي شفت بو يشاور أولادو وإلا يشركهم في أخذ القرار ؟ الحق الشيء هذا ماهواش في سبرنا. حكومة النهضة تظهر شفافة وذلك لكثرة المتتبعين لها، حكومة الباجي قايد السبسي، وبحكم تجربتها الإدارية باش تكون كيما كانت قبل : الضو لا ! القرارات يمكن تكون في صالح تونس، أما ما تسمع بيها كان بعد ما تنفذت.

يقول القايل علاش  نداء تونس بالذات تلموا عليه الناس؟ ولهنا مع كامل احتراماتي للميا وسبعطاش خيار ثالث إلي طلعوا وإلي باش يقعدوا طول اعمارهم يستقيلو ويشكلو في الخيارات الثالثة.
-  أولا نداء تونس تخلق في ظرف إلي استنزفت فيه الشرعية النضالية و عوضتها شرعية إنتخابية... لغة النضال ماعادش توكل.
- ثانيا نداء تونس هو والنهضة الأحزاب الوحيدة إلي فيها إنضباط حزبي ومافيهش دخول وخروج كيما مقهى التكتل وإلا نادي المؤتمر وإلا روضة البيدبي.
- ثالثا نداء تونس يمثل حاجة للتوانسة : خبرة و تجربة الدولة إلي مهما كانت قابلة للمسائلة فهي خير بياسر من اللخبطة الحكومية إلي نشوفو فيها كل نهار. و بالموازاة، حركة النهضة تمثل عند جزء من التوانسة الدين و الأخلاق... أما بقية الأحزاب والخيارات الثالثة الكل فهي لا تمثل شيئا ذا قيمة عند التونسي وهو بالتالي يجد نفسه بصدد القيام بتقييمات شخصية لحمة الهمامي وإلا لحمد براهيم عند الحديث على الحزب بكله وبالتالي منطق إلي تعرفوا خير من إلي ما تعرفوش هو الغالب.
- رابعا:  الكاريزما التي يتمتع بها الباجي قايد السبسي والتي تجعله شأنه شأن راشد الغنوشي، إعلاميا على الأقل، فوق الجميع، حتى الحضور الإعلامي لهما هو حضور إنفرادي وعمرك ما تلقاهم في عركة على بلاتو متاع تلفزة مع لطفي زيتون وإلا مع المزوغي.

لهذه الأسباب المتوقعة، المشهد السياسي التونسي باش يتجه نحو تشكيل قطبين: قطب مركزه النهضة وقطب مركزه نداء تونس، بالطبيعة كلمة "إستقطاب" الناس الكل تتفجع منها، ولكنها ليست بهذا السوء إذا الناس إلي إنظمو لمعسكر أو لآخر ما ينساوش مبادئهم.

في الختام، أنا واحد من الناس ماذابيا انو الباجي قايد السبسي ونداء تونس يكونو  أكثر من نداء يأس، نظرا لأنو الكثير من الكفاءات والوجوه الحقوقية و السياسية إلي ممكن تكون فاعلة انظمت ليه. و متخوف من انو يستغل الشعور باليأس العام  لتحييد هالكفاءات إلي إنظمتلو عن مواقع القرار السياسي في صلبه في مرحلة أولى ثم إذا صعد إلى الحكم في مرحلة ثانية...
 نعرف زادة إلي شخصية الباجي قايد السبسي عند العديد من الناس عندها مرتبة الأب إلي نفرحو ياسر بيه كي يمشي يعمل مشكلة مع الجيران على خاطرنا وإلي يدافع علينا ضد  البراينية وإلي في نفس الوقت ممكن يكرزو من بعض مواقفو المتسلطة ويبداو يغليو عليه من داخل كيف يبدا شاد التيليكوموند في يدو و ما ثمة فرجة في التلفزة كان على إلي يقررو هو ولكن آسف في نفس الوقت للعودة لمثل هذه النظم الرجعية... أما انشالله كي يقولوا كما قالوا  ناس بكري : ما يلزك على المر كان إلي أمر منو، يتفكروا أنهم اختارو حاجة مرة، و أقل بياسر من طموحاتهم الأولية.



 

21 commentaires:

  1. Une bonne lecture de la situation actuelle, et de préciser que tout est du au cause à effet c'est très important.
    Ce qui nous arrive aujourd'hui ce n'est qu'un manque de savoir faire et d’égoïsme..
    (M.Asma)

    RépondreSupprimer
  2. هذي أتعس تدوينة قريتهالك ... مفروض تجيب ماللخر من غير لف و دوران و من غير ما تطلع بحجج و أمثلة مالحيط بش تبرر بيهم اختيارك لداء تونس

    RépondreSupprimer
    Réponses
    1. لا يا صلاح! أنا ما أخترتش نداء تونس، نفسر علاش أنا ضد نداء تونس... ونفسر علاش برشة ناس إلي لا علاقة لهم بالتجمع إلتحقو بنداء تونس.
      أما الله غالب، إلي ماهوش مع النهضة، فهو مع نداء تونس وإلا يساري مع حمة وجماعتو حسب كلامك...

      Supprimer
  3. مانيش مستانس نكتب نقرا و نحلّل و نتعدّى و كان عندي فكرة ناقشها مع الأحباب و الأصحاب في الدائرة الضيّقة باش نحافظ على ما تبقّى من أعصاب و ما نقّص مالدخان أما كيف قريتلك أول مرّة ليوم فما حاجة خلّاتني واحل و حبّيت لوكان ماعندكش مكل توضحها : " حكومة النهضة تظهر شفافة وذلك لكثرة المتتبعين لها، حكومة الباجي قايد السبسي، وبحكم تجربتها الإدارية باش تكون كيما كانت قبل : الضو لا ! القرارات يمكن تكون في صالح تونس، أما ما تسمع بيها كان بعد ما تنفذت."

    RépondreSupprimer
    Réponses
    1. le gouvernement d'Ennahdha a beaucoup de détracteurs! C'est uniquement pour ça qu'on a des informations sur des prises de décisions avant qu'elle soient faites.

      Le gouvernement BCE, je me rappelle, c'était beaucoup plus opaque.

      Supprimer
    2. الأخبار اللي تسمع فيها على الحكومة و قراراتها هي في أغلب الحالات تسريبات أو إشاعات و ليست شفافية على حدّ ما تعتقد و الإشاعات و التسريبات أخطر من المعلومة الصحيحة لأنّو ماعاد يعرف حدّ الصحيح مالغالط و زيدك لو كان فما الكثير من المتتبعين للنهضة لذلك هي شفافة فأعلم أن المتتبّعين للسبسي سيكونون أكثر بكثير.

      على كلّ هو تحليل لتقصير الوقت لأنوا في تونس يا ذنوبي كان يعملوا انتخابات. يعملوا كل شيء حرب أهلية، مجاعة، انهيار اقتصاد... ليبرّروا جلوسهم على الكراسي أما الإنتخابات فيا ذنوبي

      Supprimer
  4. <3 t'as presque mérité la photo avec bikini :) je dis bien presque ;)

    RépondreSupprimer
  5. ياخي قداه جاب التجمع محسوب المرة ألي فاتت ؟ 10 كراسي ؟ 10 كراسي هي قيمة الباجي ألي عاملينلو طاولة و كراسي و كان زادت شعبيتو الفترة ألي فاتت كلو من بهامة النهقة و الإعلام و باجات الفايسبوك ألي إتطبلو.

    RépondreSupprimer
  6. علاش بربي ما حكيتش على المرجعية "البورقيبية (ان صح التعبير) للباجي قايد السبسي: اك المدرسة المسخه برشة والقذره والملطخة بدماء التوانسه الي تربى فيها الباجي وقرى فيها السياسه والتصرف في امور الدولة ؟؟
    ماهو كيف يحب يكون موضوعي شوي ما يطفيش الضو على حاجة في الاهمية هذي : ياخي بورقيبه الي يتبجحوا بيه النقب المثقفه متعنا تو : ياخي ما قتلش ؟ ما عذبش ؟ ما اعدمش خصومه ؟ ما اعدمش الفلاقه وشتتهم ؟ ما اسسش لما يسمى ب المناطق "الساحلية" واخرى "داخلية" ؟؟
    انا شخصيا كان فما حاجة تخليني ما نطيقش حتى نسمع اسم الباجي هو تاريخه وتجربته مع بورقيبه .. وصدقني فمة برشة كيفي .. وكيف نقلك برشة نقصد الالاف والالاف من التوانسه الي يبخروا بريحة بورقيبه واتباعه ..
    اخيرا ما نطولش عليك : نداء تونس كان يحب على الاقل يستقطب المزيد (بش ما نقولش كان يحب يربح الانتخابات) يبعد كل البعد على كا مايفكر التونسي بمآسيه وما عاناه من النظام البورقيبي والتجمعي

    RépondreSupprimer
  7. pour le paternalisme. BCE n'est pas plus qu'un symbole à l'intérieur de Nidaa Tounes, il n'intervient presque pas et n'a aucun rôle effectif à jouer, l'image véhiculée par les médias est totalement fausse

    RépondreSupprimer
  8. En lisant les commentaires, on s'aperçoit qu'ils y'en a qui jugent cette analyse comme pro nidaa tounes alors qu'ils y'en a d'autres qui la jugent "hostile" à ce parti :)
    c'est le parfait reflet de la paranoïa transmise de la part des politiciens (consciemment et avec préméditation)au citoyen (dans ce cas presque)lambda !!

    RépondreSupprimer
  9. Tout site devrait rejeter tels écrits kilométriqes ! Comment fait l'auteur pour se croire si intéressant ?...

    RépondreSupprimer
    Réponses
    1. il se croit intéressant au point qu'il réussisse à faire commenter quelqu'un qui le trouvait complètement inintéressant!

      Supprimer
  10. @anon, perso je ne la trouves ni pro ni anti Nidaa.. j'ai peut être eu une autre lecture, je trouves tout simplement qu'il s'agit d'une explication du pourquoi du succès de ce parti.. une analyse que je trouves pertinente et bien faite.. ces gens qui se sont tournés vers ce parti, ne sont pas tous des ex rcdistes ou des traitres.. d'ailleurs à ce sens je trouve le choix du titre "appel du désespoir" très pertinente car une très grande partie des sympathisants de ce parti le soutiennent car ils ne voient pas d'autres alternatives, dans l'esprit de "tout sauf ennahdha"

    RépondreSupprimer
  11. Je trouve que le titre, bien plus que le post est le bon résumé de la situation.
    A défaut de l’égalité ou de la prospérité, BCE est sensé garantir la sécurité, l'ordre et restaurer l'autorité de l'état.
    Et puis,vue la tournure des évènements, on oublie vite que l'immense majorité des tunisiens était plus "réformatrice" que "révolutionnaire".
    Donc un RCD "purgé" répond complètement aux attentes d'une partie de l'opinion, et pas que par défaut.

    RépondreSupprimer
  12. J'ai lu hier ce post et je voulais le commenter mais je ne savais pas comment formuler mon idée et voilà que je tombe sur une réponse qui vient de Ranajit Guha (cité par Spivak) et je crois s'applique parfaitement à la situation tunisienne : "L'historiographie du nationalisme indien a pendant longtemps été dominée par l'élitisme - l'élitisme colonialiste et l'élitisme bourgeois-nationaliste (...) partageant le préjugé selon lequel la fabrique de la nation indienne et le développement de la conscience (le nationalisme) qui confirma ce processus furent exclusivement ou principalement des réalisations de l'élite".
    Je pense que le parti qui saura mobiliser la masse populaire est celui qui triomphera, c'est-à-dire, pour le moment, malheureusement, Ennahdha!

    RépondreSupprimer
  13. Par exemple : http://iresmo.jimdo.com/2010/12/19/lu-gayatri-c-s-vidal-les-subalternes-peuvent-elles-parler/
    C,est dans ce livre dont il s'agit : Les subalternes peuvent-elles parler.
    J'ai trouvé les 40 premières pages assez difficiles, mais après l'analyse est très intéressante.

    RépondreSupprimer

إجتنب قدر الإمكان السبان خويا وإلا أختي الفاضلة، قد ما يكون دمك بارد قد ما تكون مقنع و تسمعك العباد ! وكان تعمل مزية حاول كي تعلق إختار لروحك إسم مستعار! كي يكثر الآنونيم ما عاد نفهمو شي !