lundi 20 décembre 2010

القنوات و عم عمارة وقلة الحياء: حرية التعبير أم حرية التشهير...



في عام سبعة وثمانين نتفكر كان ثمة واحد معروف برشة وقف وقال في الراديون :إن شعبنا بلغ درجة من الوعي  مـا يسمـح لكـلّ أبنائـه وفئاتـه بالمشاركة البنّاءة في تصـريف شؤونه... الكلام هذا بالطبيعة عندو أكثر من 23 سنة و ممكن تقولو  ثلاثة و عشرين سنا برشة أما نحترم رأي الناس إلي تراها حاجة قليلة و تحب تزيد شوية ثماش ما ننساو... وبغض الطرف على شكون قالوا وإلا في أنا إطار سياسي / تاريخي / فكاهي (اختاروا الإطار إلي يعجبكم). الإطار الجغرافي ما تبدلش برشة : الكلام هذا يحكي على الشعب التونسي متاع عام 87...

من غير محقرانية، الكلام هذا ماهواش صحيح إذا كان تعتمد الإحصائيات  متاع نسبة اللاوعي إلي نشوفو فيها كل يوم على المواقع اللاإجتماعية بالمرة كيف الفايسبوك وغيرو ....

اللاوعي ماهواش بالضرورة مرادف للبهامة إلي هي حاجة أخرى وضاهرة ياسر متوفرة في دولة القانون و المؤسسات.، اللاوعي حسب تعريفي الفلسفي هو أنك تتحرك/تتكلم/تعيط  من غير ما تخمم قبل، بغض النظر عن النتيجة إلي ممكن تعبر عن بهامة فطرية  بدرجات مختلفة أو عن ذكاء فطري نسبي. اللاوعي عند الأمريكان يجسدوه بالمقولة : Shoot first، think later

من انعكاسات اللاوعي الكبرى هي التجوبر وقلة الحياء. وهنا مرة أخرى ولضمان وصول الفكرة نلقى روحي مجبر أن نعطي تعريف لقلة الحياء. قلة ألحياء حاشاكم وحاشا قدركم هو أنك تحكي على حاجة ما تعرفهاش وتقول جهار بهار أنك ما شفتهاش وخاصة يبدا في كلامك نوع من الفخر والإعتزاز و الثقة في أنك قاعد تقوم بالشيء الصحيح. قلة الحياء هاذي  تلقاها بياسر عند نوع من الناس إلي نعيطولهم في لوغتنا السوقية بالجعب!
 
الجعبة هو هاك الفرخ - فكريا - إلي يفهم في كل شيء وعندو رأي في كل شيء من غير ما يحتاج انو يطلع وإلا يحاول يمشي يفركس وحدو على المواضيع إلي يحب يتجوعب فيها. وهو كي تجي تشوف الواحد كي يبدا ما يعرفش حاجة - وهذا مش معناها تقييمو للحاجة هذي غالط بل بمعنى ما إطلعش عليها أصلا - هذا في الظروف العادية نسميوه جهل  وماهواش عيب وكل واحد منا يجهل برشة حاجات- أما كي يولي واحد يتعمد يحكي في الحاجات إلي يجهلها هذا يولي اسمو  تجوعيب! والأكيد أنو كل واحد عندو في معارفو واحد وإلا إثنين من النوع هذا! إلي يعلق ويعاند على ماتش كورة ما شافوش وإلي يسب في كاتب ما قرالوش كتابو و إلي يحكي على الجنة تقولش عليه يحكي على جنينة دار بوه وكل واحد وين يجي التجوعيب متاعو...

السؤال إلي يطرح نفسو هو كيفاش تديتكتي النوع هذا من الثدييات ؟ الحكاية ماهياش ساهلة على عكس ما ممكن يبدو للبعض على خاطر تطلب قدرة على مراجعة الذات لفصل كل ماهو شخصي ممكن يحدد علاقتك بالمضنون فيه عن كلامو. عادة الجعبة ما يعرفش يحكي! بطريقة أخرى كلامو كلو أغلاط نحوية خاصة كي يبدى يتجوعب بالسوري، و إذا كان كلامو شكلو مثالي أكثر من اللازم أعمل ضربة كوبي كولي على قوقل الكاشف الرسمي للجعب و ممكن ياسر تلقى المصادر إلي نقل منها كلامو... ووقتها تنجم تفهم السيد هذا علاش يمشي و علاش يجي. يقول القايل علاش إنركز على الشكل ونهمل الفكرة، الفكرة كان مولاها متمكن منها و عارف على شنوة يحكي ما يستحقش يسرق من غير ما يحط المصدر. أما الأغلاط النحوية الفادحة فهي تبينلك المستوى المعرفي الهزيل وقداش السيد إلي يتجوعب عليك فقير فكريا. على خاطر كان جاء قرا كتب وإلا مقالات على الموضوع إلي يتجوعب فيه وإلا كان جاء يقرا من أصلو ما يغلطش في كتابة الكلمات المفاتيح وهنا ما نحكيش على أغلاط عادية تصير عند الناس الكل أما ثمة أغلاط تخليك تعرف انو مخاطبك عمرو ما حل كتاب!  

المشكل انو الجعب هاذم ما تنجمش تقوللهم  يا ولادي إحشمو على رواحكم و سكرو أفامكم راكم عملتوالريحة و ذلك لعدة أسباب أولها الكثرة تغلب الشجاعة وثانيها الرهوط هاذي سمعت بحاجة اسمها حرية التعبير و ولات كي اللوبانة في أفامهم. وثالثها وهو الأتعس انو التجوعيب  تطورفي بعض الحالات  إلى تجلطيم بمنطق أنا نسبك - في إطار حقي في التعبير - وإنت قارعني الحجة بالحجة.

نرجع توا لمشكلة حرية التعبير باش ما ناقفش عند ويل للجعب ! الناس الكل عندها الحق تعبر على افكارها بما فيهم الجعب، ولكن كلمة فكرة كي تجي تفكر فيها تلقاها  كلمة مجردة ومطلقة و ماعندهاش نسبية للأشخاص. معناها كي يجي واحد كيف بسيكو آم المثال الأكبر للتجوعيب في تونس في نظري ويقول : " سوسن معالج لازمها تتعالج " وإلا "سوسن معالج أكتريس تقود في الأمة بالشمباني والباستيس "  هذي ماهياش فكرة،  خاصة كي يجي يقول إلي ما تفرجش في الفيلم إلي جايبها قاعد ينتقد فيه بالكلام متاعو.

حرية التعبير في بلاد متاع ناس واعية تعطيك الحق في أنك تقول إلي تحب عليه أما زادة تلزمك بأنك تتحمل مسؤولية كلامك والتبعات والأضرار بالأشخاص إلي ممكن يتسبب فيها. و لهنا لاحظت إلي برشة ناس تخلط في برشة مفاهيم. كيما إلي يجي ويقلك " الكلام إلي قاعد تقول فيه يقلقني -على خاطر ما نيش موافق عليه - إذاً فإنت  تعديت عليا" وهذا نشوف فيه خاصة كي يبدا حديث على الدين و إلا على السياسة . وتولي الحكاية ساهلة برشة وفوضى تامة، أي مسالة نربطوها بالدين وتولي أي رأي مخالف هو رأي ضد الدين والإسلامفوبيا و هات من هاك اللاوي... يعني كل الطرق تولي مشروعة باش نتهمك بالمعاداة للدين رقم واحد في مجرة درب التبانة  و إلا بالاستقواء بالأجنبي ضد الدولة رقم واحد في جميع المجالات و كافة المستويات على الصعيد الأرضي والفضائي... أما باش تناقش الفكرة في حد ذاتها لا ! والأغرب في هذا الكل العباد هاذم ماشي في بالهم بالرسمي إلي هوما قاعدين يقارعو في الحجة بالحجة و أنهم يمارسو في حقهم متاع التعبير على رأيهم و هو كي تجي تشوف الكلام هذا ينطبق عليه كل مواصفات التجلطيم وقلة الحياء إلي ينجم يعاقب عليها القانون والعود و أحيانا دبابز القازوز في دولة القازوز والشنقالات.

الحكاية هذي الكل كي تقعد محصورة في فرد وإلا مجموعة أفراد يمكن القول عليها بأنها حالة عادية حسب قانون قوس Gauuss لتوزيع المتغيرات (Loi Normale) يعني ثمة نسبة من الجعب  قارة وعادية لازم تكون موجودة في كل مجتمع  وإن شاء الله هذاك حد الباس ! أما كي الشعب التونسي  يكذب القاعدة هذي تولي الحكاية ضاهرة تخليك قبل كل شيء تراجع روحك. ياخي بالكشي أنا هو الجعبة وما في باليش ؟ لكن كي تخمم فيها أكثر تلقى إلي الشيء ولى بالرسمي مستفحل. يكفي أنك تشوف عدد  قروبات الفايسبوك إلي كونتر شخص معين،  قريب يولي كل مواطن عندو قروب كونترو !

Source : http://darouazzane.centerblog.net/
يكفي أنك تشوف حالة ال ء-هستيريا  على المواقع الإجتماعية باش إلي تخليك تزداد يقينا انو الشعب التونسي عمارة ! إيه عمارة بأتم معنى الكلمة، غير صبلو برك وتاو يشرب وخاصة العباد إلي جايبتها فايقة بالوضع وفاهمة كل شيء وحقائق خفية وماسونية و لاعبين فيها يتصداو للمؤامرة عليهم وعلى مستقبلهم - كأنو عندهم مستقبل من أصلو- . وشوف عاده  الحلول إلي يلقاو فيها: سحب الجنسية من فلان وإلا فلتانة على خاطرو طالب بتنظيم الأذان إلي كل عام يزيد يقوى بشهادة مماتي  و إلا نبطلو المسلسلات و الأفلام إلي هي السبب في انو عباد تحاول الإنتحار حرقا (إيه ما نيش نزيد عليكم ، هالتجوعيبة هذي تلقاوها أون نايف في "صفحة تونس صوت الإسلام و العروبة " اقترحها واحد من المعلقين و تبناها الأدمين في إطار "نقاشو" للحدث *). 

غير بركة قول  مفردة من المفردات هاذم : صلاة، أذان،  صوم، لحية، حجاب، الرسول، سنة، فرض، جامع، نقاب، الليسة معروفة نتصور ... وهاو تو تشنع وقروبات بالآلاف من المعجبين  تتحل وعباد تسب قال شنوة تدافع على الإسلام و  و عباد أخرى  تناشد وتثمن في الإنجازات وتندد بالإستعمال المغرض للأحداث  في وقت إلي ناس ومدن خايضة وعباد تحرق في رواحها ومظاهرات تسمع بيها في المريخ أما تونس لا! 


  عادة نفس  الأسلوب يتكرر : واحد يقول كلمة من الكلمات إلي ذكرتهم أعلاه يجيو يشوفوه : عندو لحية و إلا ما عندوش ؟ لابسة حجاب وإلا موش لابسة؟ قال "عن إبن تيمية" وإلا ما قالش ؟ أجهش بالبكاء أو لم يجهش ؟ إذا كان ما إستوفاش شروط "قنوات"  الخوانجية إذن فهو إسلامفوبي و يشوه في صورة الإسلام و يهودي وصهيوني بقطع النظر عن فكرتو... و في سياق آخر يبحثوا عليه : ناشد وإلا ما ناشدش ؟ ثمن الإنجازات وإلا ما ثمنش ؟  إذا كان ما إستوفاش شروط قناة تونس ضبعة فهو متآمر على البلاد ومكتسباتها و أمنها الإقتصادي و غير وطني و عميل ...وحدة كيف الدكتورة ألفة يوسف و بقطع النظر على أفكارها  و مواقفها إلي ما  إلي ما تعنينيش، كي تقول القرآن لم يحدد كيفية أداء الصلاة كدليل على أسبقية الإنعكاسات الروحية في  سلوك المؤمن على العبادة نفسها... الكلام والفكرة يتحرفو ويولي ألفة يوسف لا تعترف بالسنة وتفتي بتغيير طريقة الصلاة ... والعباد الكل تجي و عمرها ما قرات كتبها وتبدا تسب... إيه! آش بيه ؟ حرية التشهير ! حاجة معروفة وحق مضمون في بلاد القنوات! أما في الحالة الثانية فالتشهير الإعلامي في الصحف  موجود أحيانا (كي نتفكر مقال متاع عبد العزيز الجريدي في جريدة الحدث يحكي على بن سدرين إلي حلت منزلها للدعارة...  كلام كيف ها الكلام ما ينجم يولد في نفسي كان الغثيان) وإحقاقا  للحق  كي تجي تشوف التشهير الإعلامي متداول بنسبة أقل بياسر من التعتيم الإعلامي إلي يبدع فيه عمي عمار بصفة تخلينا بالرسمي انجمو في حياتنا نكونو رقم واحد في حاجة ولو إنو كوريا الشمالية منافس صعب المراس !

أما باش تلقى واحد رايض و قاعد يعطي رأيو من غير عياط و من غير ما يجبد العباد بالعيب و إلا يحرفلهم كلامهم و أفكارهم قصدا أو عن غير قصد ... قليل ياسر ! و باج  #Tunisie  و #الحقائق الخفية   أحسن أمثلة و إلي على فكرة نحب نغتنم الفرصة باش نهني مشرفيها على الكم الهايل متاع الجعب إلي يستقطبو فيهم ! ما يكفي لإعادة هيكلة كل شبكات الري والتصريف الصحي في ها البلاد الكلبة !

هيا كي وصلت للحد هذا من التكريز  نهنيكم الكل في انكم نجحتو في تحويلي في آخر المطاف  إلى جعبة أخرى تنضاف إلى رصيدنا الهائل من القنوات ! وتحياتي لباعث القناة ! 

نحب نختم بجملة من ابداعات الزلفي ... إذا الشعب يوما أراد الحياة، فلا بد أن ينقص من تطييح القدر !


_________________________
* http://www.facebook.com/photo.php?fbid=486278005912&set=a.324510345912.159045.320877130912&comments

17 commentaires:

  1. Ce commentaire a été supprimé par un administrateur du blog.

    RépondreSupprimer
  2. C'est un peu pour celà que j'aimais pas les blogs, c'est le misérable travail de modération que ça implique.

    http://img9.imageshack.us/img9/8485/censure.jpg

    J'ai du inauguré ce sale travail avec ce clown. Je suis même parti lui parler, et je le regrette d'ailleurs, sur un salon de chat... bizarre langage de quelqu'un qui se présentait en avocat en cybercriminalité en Belgique.

    Un autre tube peut être?

    RépondreSupprimer
  3. Kifech t9oul elli mayjich n9oulou 3ala Sawssen "t9oud fel bled bel champagna wel pastiss" wenti el sayyid 9olt 3lih:

    Ja3ba, jahel, jaltam, 9lil 7yé, jabri, ...
    Brabbi chouf 9addech sabbitou men marra, we tchouf elli mayjich yejbed lalla Sawwsen?

    Ce n'est qu'une analyse très biaisée malheureusement. We manchoufou ken el jme3a "cool, hayel, ya3mel el kif" 9ouch 3lihom jme3et el 9affefa el mauves.

    RépondreSupprimer
  4. يا خويا قلقتنا بالكتب و القراية واللي حل كتاب و زوز واللي عمرو ما حل كتاب, إلخ. إلخ
    كانك مغروم بالمطالعة و بمجلة عرفان, صحة ليك. أما سيب الشعب يعيش و بأي حق تقيم راي فلان و فلتان. اختزالو في عدد المراجع و المصادر محدود ياسر يا وخي
    بلغة أخرى, و باختصار شديد, و اعترافا بقيمة الحكمة الشعبية, اللي قراو ماتوا... و اللي ما قراوش زادة...

    RépondreSupprimer
  5. و من أكبر مظاهر التجوعيب في بلادنا العزيزة, هاك الصنف اللي قرا كتاب ولا زوز ولا ثلاثة ولا ... في حياتو ويولّيلنا علاّمة
    بلغة أخرى, هاك الجماعة اللي نسمّيوهم حڨّارة

    RépondreSupprimer
  6. Sans doute le meilleur billet que j'ai lu depuis (très) longtemps sur un blog tunisien.

    Big up Astrath !

    RépondreSupprimer
  7. magnifique!!!au moins on a mis une définition sur un phénomène!
    j'ai juste pas comrpis la partie
    "الحكاية هذي الكل كي تقعد محصورة في فرد وإلا مجموعة أفراد يمكن القول عليها بأنها حالة عادية حسب قانون قوس Gauuss لتوزيع المتغيرات (Loi Normale) يعني ثمة نسبة من الجعب قارة وعادية لازم تكون موجودة في كل مجتمع وإن شاء الله هذاك حد الباس ! أما كي الشعب التونسي يكذب القاعدة هذي تولي الحكاية ضاهرة تخليك قبل كل شيء تراجع روحك. ياخي بالكشي أنا هو الجعبة وما في باليش ؟ لكن كي تخمم فيها أكثر تلقى إلي الشيء ولى بالرسمي مستفحل."

    RépondreSupprimer
  8. Bravo. Bravo. Bravo.
    Merci pour ce moment de plaisir. Je me suis régalée!

    RépondreSupprimer
  9. D'ailleurs, je partage sur ma page facebook:

    http://www.facebook.com/pages/Mon-Massir/129023097129014

    RépondreSupprimer
  10. أتتيت في تشخيصك على الجميع
    ووصلت في آخر المطاف الى الإعتراف
    "نهنيكم الكل في انكم نجحتو في تحويلي في آخر المطاف إلى جعبة أخرى "
    إيه والحل ؟
    تزيد الناس تقرأ و وقتها يمكن تتكلم عن الحل
    ثم تقول : في ها البلاد الكلبة !
    حرام عليك
    لكل عصر ظواهره
    فهي موجودة و تنتظر فرصة ظهورها و الوسيلة لا تهم بالنسبة لها....المهم تثبد وجودها
    يستحسن الإختصار في تصور واقعي بدون التركيز على الهوامش
    و من غير ما تغلط في روحك بتشجيعا من هنا او هناك
    هذا رأيي

    RépondreSupprimer
  11. echa3b ettounsi 3ana yesser me skout, min yezzi w rod belek ech t9oul w 3ib w mamnou3 w tkallem bechwaya..les reseaux sociaux aujourd hui refflete cette image d oppression ki est entrain d exploser..
    les reseaux sociaux n ont pas 20 ans, c a peine 4 ou 5ans que c est devenu a portee du peuple de s exprimer,y avait pas d espace avant,
    je suis plus optimiste ke astrath meme si j adhere en grande partie a ses deductions

    RépondreSupprimer
  12. هيا مرحبا بيكم الكل و شكرا على بعض المجاملات. وفي الحقيقة ما كانش الهدف متاعي تقديم موعظة أو حلول بقدر مع كان تسليط الضوء على عقلية أنا لاحظتها و هي الإنفعالية المفرطة للماس بوبلار في تونس و هو ما عبرت عنو بالشعب العمارة: من خوضة إلى خوضة و إلي على مستوى الأفراد تنعكس في طريقهم في التعامل مع الأحداث. وهنا نكون متوافق مع التحليل القصير والوجيه لسي محمد أمين.

    العباد قلوبها معبية . و الحقيقة إلي تأسفتلو في المقال المطول هذا انو قليل مستوى الحوار في أي موضوع يرقى إلى مستوى الأفكار أو حتى الأحداث بل يقعد ديما محصور في الأشخاص و هذا غالبا ما ينجر عنو المشاهد المتناقضة إلي نشوفو فيها ولات بكثرة من قبيل التعليقات على شاكلة سي wejbad إلي اضطريت أني نحذفو وممكن ما توافونيش أما أمثالو موجودين بكثرة في حين انو لازم يكونو إستثناء.

    في خصوص كلمة البلاد "الكلبة" فأنا لا أقصد السبان بقدر ما أقصد حالة التشاؤم إلي وصلتلها. ما ثماش مؤشرات متاع إنفتاح في العقليات و قبول الآخر دون الحكم عليه في تقييمي الخاص.

    أما فيما يخص التعليق إلي يخص بسيكو ام وإلي نتصور إلي برشة ناس ينجمو يرجعوه عليا بسهولة بإعتبار أني "سبيتو " كي قلت إلي هو جعبة. نحب نوضح إلي إستعمال المفردة هذي يدخل تحت إطار التعريف إلي عطيتو قبل الإستعمال. يضهرلي سي محمد الجندوبي قال بعضمة لسانو انو ما قراش كتاب ألفة يوسف و ما تفرجش في فيلم سوسن معالج و بالرغم من هذا يعطي لنفسو الحق باش ينقد وخاصة يتعرض للحياة الشخصية للأفراد هاذم. و ما نيش ثنائي (binaire) بما معناه أني كي نقول إلي الشيء هذا ما يجيش (خاصة من شخص يقدم في نفسو على انو فنان) مش معناها إلي أفكار ألفة يوسف موافق عليها. ندافع على شخص ألفة يوسف و سوسن معالج. فكرهم حاجة أخرى انجمو نحكو فيه نهار آخر كي تريض الأمور.

    كيف كيف كي يجي واحد و يقول إلي سي محمد الجندوبي إرهابي ويبدى يهول ويزيد عليه في كلام ما قالوش ما نتصورش أن باش نكون متعاطف معاه. تحب تحكي تفضل، أما باش تولي هذه عاهرة و هذا منحل أخلاقيا و نحكم عليك... لا ! انشالله الفكرة تكون وصلت.

    الكلام هذا الكل إلي قلتو يعبر عن موقفي الشخصي و ما يمثل كان شخصي المتواضع و راهو منزه عن المثاليات و ما نتصورش إلي باش نقول نهار إلي كلامي مثالي و كان تاخذو بيه تتحل مشاكلكم. هذي قناعاتي ما تلزمني كان آنا ويا حبذا يكون لكل واحد قناعات ما تلزمو كان هو ويكون قاسمها المشترك الإحترام المتبادل لا أكثر ولا أقل.

    RépondreSupprimer
  13. إذا الشعب يوما أراد الحياة، فلا بد أن ينقص من تطييح القدر
    hahahaha comme d'habitude bravo ..il y a quelque point faible mais en general c b1 ..

    RépondreSupprimer

إجتنب قدر الإمكان السبان خويا وإلا أختي الفاضلة، قد ما يكون دمك بارد قد ما تكون مقنع و تسمعك العباد ! وكان تعمل مزية حاول كي تعلق إختار لروحك إسم مستعار! كي يكثر الآنونيم ما عاد نفهمو شي !