samedi 19 janvier 2013

Qnet، Forever Living أو المتحيلون القانونيون ... إلى متى ؟

171 commentaires
 أكيد راهو العديد منكم سمع ب QNET وإلا Forever Living  ويسر للتنمية  وغيرها من الشركات إلي عندها صبغة عالمية و أصبحت تنشط في تونس و تضرب في فلوس أمها كلب من غير لا رقابة ولا سند قانوني واضح. وأمام إنتشار نوع من البروباغندا حول طريقة عمل هذه الشركات، وخاصة بعد ما  إلي الطش خلط لدارنا، قررت أني نبعث السياسة تقضي لوهلة أو لبرهة و نحكيلكم اليوم على عملية تحيل كبيرة قاعدة تحصل في تونس منذ عدة سنوات، بغطاء قانوني، أو بالأحرى في غياب الغطاء القانوني.


قبل كل شيء، لازمنا نتعرضو لشوية مفاهيم أولها وأهمها : التركيب  الهرمي (montage pyramidal).  التركيب هذا ممنوع في برشة دول كيما فرانسا و أمريكا وهو جريمة يعاقب عليها القانون بقسوة. إبتدعو واحد أمريكاني في العشرينات اسمو شارل بونزي. التركيب هذا من السهل فهمه، ولكن الخباثة متاع الناس والسهولة متاع تغليفو بحكايات أخرى تخلي من الصعب ساعات انو الواحد يفيق بوجودو.

باهي باش تفهموا المبدأ باش نعطي مثالو المبسط : نجي نقترح على عزيز عمامي الفقري انو يعطيني عشرة الآف اليوم باش نخدمهملو في أفار مضروب بالسفود وبعد جمعة نرجعلو 15 ألف سيقورو، عزيز يقبل وتعجبو الحكاية وتغريه، في الأثناء نمشي لواحد آخر فقري ونقترح عليه نفس الحكاية، يعطيني هاك العشرة الآف، ولى عندي عشرين، نعطي لعزيز  15 ألف كيما وعدتو، نضرب 5 الآف، ونتصرف باش نلقى عباد اخرين تعجبهم الحكاية باش نخلص القدم... بطريقة أخرى : الداخلين الجدد يخلصوا القدم وأنا نضرب ضربتي في كل عملية. المشكلة في النظام هذا، انو يجي نهار و عدد الناس إلي ممكن يدخلوا في اللعبة هذي يقل ووقتها نسكر الشركة و إلي دخلوا الجمعة إلي فاتت الكل تحشالهم في فلوسهم. وفي الأثناء، على كل واحد دخل في المنظومة، أو عاود دخل فيها، نكون أنا ضارب 5 الآف.

بالطبيعة السيستام هذا  ما ينجمش يتلهى بيه  شخص واحد، ولذلك مولى العملة  ديما يختار معاونين ليه والمعاونين تحتهم "مديرين" إلي تحتهم "متصرفين" إلي تحتهم "عملاء" و"وكلاء" وكل عميل لازمو يدخل معاه 10 من الناس مثلا  باش يترقى ويولي متصرف يضرب في كومسيون. مثلا اذا كان نجيب  عزيز عمامي و معاه عشرة من الناس وعزيز عمامي يجيب معاه ناس اخرين عزيز يترقى  و أنا  نترقى و نضرب بأكثر كومسيون في جرة إلي دخلوا تحتي الكل   وهذاكة  علاش النظام هذا يوصف بالهرمي. وعندما يتوقف الناس عن الدخول في هذا الهرم، المنظومة الكل تطيح و تفلس لأنها ما عادش قادرة توفي بوعودها.

يقول القايل هاو ثمة إفلاس إذا ثمة سند قانوني وتنجم تطالب بحقوق قدام القضاء... في الحقيقة، لما تدخل في المنظومة هاذي، إنت ما تتسماش تخدم عند الشركة، وانما إنت مجرد متعامل مع الشركة، بطريقة غير مباشرة عن طريق الوسطاء إلي هوما المديرين و المتصرفين والوكلاء وإلي هي في الواقع ماهياش مناصب إدارية وانما رتب وهمية في الهرم. الشركات هذي مثلا ما تصبش CNSS على العباد إلي يخدموا معاها وماهمش مؤمنين على حوادث الشغل وما يتمتعوش ببطاقة خلاص (fiche de paie)

المنظومة الهرمية، ولأسباب تتراوح من العقلانية (غش / تحيل) إلى الدينية (ربا)، مفضوحة ولذا وجب تغليفها كيف البنوك الإسلامية بغطاء يظهرها على أنها عملية تجارية وبيع وشراء وطريقة عصرية في التسويق (البيع المباشر)، وتسميتها بأسامي أخرى متاع تتليف كيف "البيع على مستويات متعددة" (vente multiniveaux). في الحقيقة، طرق التغطية عديدة ومتنوعة، ولكنها تشترك في خصائص وطرق تقديم ديما حاضرة في الندوات إلي يعملوها الشركات هاذي باش يلنسيو عملية التحيل:
- أولا الندوات هاذي يسميوها ندوات تكوينية، على أساس كي باش تخرج من هاك الحصة متاع تقديم طريقة العمل، باش تكون متكون بما فيه الكفاية وتنجم تبدا تخدم من حينك، وهذاك علاش الدخول بالفلوس (الدخلة لندوة Qnet بخمسة الآف مثلا)
- ثانيا: أول حاجة يسخطوك بيها في "التكوين" هذا هي أمثلة متاع عباد نجحت وولات كرز هاك إلي بالظبط، يوريوك تصويرة واحد قدام BMW و يحكيولك كيفاش خدم عام وصور 100 مليون، والسيد إلي يحكي ويعمل في التقديم أو التكوين يقولك : أنا مثلا في الشهر إلي فات صورت عشرة ملاين... كأنو من سبرنا انو نقولوا قداش نصورو بكل أريحية.
- ثالثا: بالنسبة للعباد إلي ممكن تخرج تثبت في الأنترنات، الشركات هاذي تعتمد على إستراتيجية الإجتياح حيث عندها ريزو كامل متاع عباد نهار كامل وهي تشكر وتمجد في الشركة و في المنتوج إلي تبيع فيه على الانترنات ومع صحابها لدرجة انو التشكيات تولي أقلية ولازمك تمشي للصفحة الثالثة أو الرابعة من نتائج البحث على قوقل باش تلقى أول نتائج تخرج الخرم متاع المتحيلين هاذم.
- رابعا يقدمولك المنتوج على انو حاجة من وراء الخيال، إبداع، شيء فريد من نوعه، ما ثمة كان شركة واحدة تخدم فيه، إلي هي الشركة العالمية لتوزيع هذا المنتوج. مثلا Forever Living إلي هو إسم من مرقتو باينة عشاه (العيش إلى الأبد ...) تبيع في "دواء" متاع كل شيء مستخلص من الصبار وهاو باش نرجعلو لاحقا.
- يقنعوك انو المنتوج هذا نادر، ويجيبو فيه بالسيف لتونس، وأنهم عاملين عليك مزية كي باش يجيبولك منو، لدرجة أنك تولي تحس روحك ياسر قافز وواصل كي توصل تاخو منو.
- يوريوك انو ثمة اساتذة وجامعيين و أطباء و محامين دخلوا في السيستام وثمة منهم إلي وصل حتى بطل خدمتو الأصلية تالمون يضرب في العط ومستكرز...
- في الأخير، وعادة في الخمسة دقائق الأخيرة متاع التكوين، وبعد ما حلولك في الجنة ذراع، يعلموك انو باش تولي عندك رخصة البيع (وهذي هي العلاقة متاعك مع الشركة) لازمك تدفع سوم  إستغلال حقوق براءة المنتوج (licence de vente) و إلي تقدر في Qnet و إلا في Forever living بمليون، و ما تولي تخلص وتضرب في الكوميسيون كان ما تدخل معاك عشرة من الناس (هوما بيدهم يخلصوا هاك المليون) وهذا هو النظام الهرمي... وبطبيعة الحال ما يقولولكش انو إذا فشلت في أنك تدخل عشرة عباد، أو في حال انو العباد إلي دخلتهم ما عادش يدخلوا في العباد فإنك ما تخلصش.


نرجعو الآن للمنتوج بيدو، ومثال الحال باش يكون Forever Living إلي تبيع في منتوج تقدم فيه على أساس انو دواء متاع كل شيء... من  الجدير بالذكر أنو  طبيعة المنظومة إلي تعتمد على البيع المباشر تخلي انو اي واحد عطى هاك المليون ويلوج انو يدخل عباد معاه باش يولي يخلص كيما وعدوه، تخليه يتجه بطريقة آلية للأصدقاء والأقارب، ويستغل بذلك عامل الثقة وكنتيجة حتمية الإقناع باش يولي يعتمد على الإلحاح والإستعطاف والترغيب  وساعات التبرويل  و هاك الكذب إلي تحشم أنك تقول انو كذب على خاطرهم صحابك ويمكن حتى يجد عليك. الوالدة مثلا عندها صاحبتها من إلي دخلت في المعمعة متاع Forever Living ولات كل ما تجينا للدار هذاك هو الموضوع : مزايا الدواء هذا إلي يداوي كل يشيء، وإلي ينظف البدن من الأكسيد، و تحكيلها كيفاش  قابلت مرا  في إجتماع متاع Forever Living من غير سابق معرفة وحكاتلها كيفاش كانت تعاني من الوجايع وتخرجلها المادة من جبينها ومناظر تردد... ومن نهار إلي خذات الدواء هذا ولات سابقة وجراية (مش شفيق ) وما تاكلش الشعير.

عادة الجمعة إلي فاتت، قاعد في الدار و نسمع في صاحبة الوالدة  تحكي في الحكاية المعجزة  هاذي في الصالة... وكأي إنسان مرامدي ويحرن ويثبت في الشقيقة والدقيقة،  مشيت طلبت منها باش نشوف  هالمنتوج الهايل. مدتلي دبوزة... كي قريت التركيبة متاعها : فيتامين  C (إيفيرالقون معناها) عصير مركز متاع تفاح، عصير مركز متاع صبار وفقط.  بالطبيعة بالنسبة لإنسان ماهوش مريض، المشروب هذا لا ينفع لا يضر، لا يمرض لا يداوي، ولكن يتسب في ظاهرة بسيكولوجية تدعى effet  placebo  أي أن تحسن الحالة هو رهين مدى إعتقاد الشخص إلي يتناول في المشروب انو ياخو في دواء  باش يداويه بالرسمي. وكي سألتها بقداش الدبوزة قالتلي ب60 ألف وبالوقت عرضت عليا باش ننظم  تقولش عليا بوكيمون. كي كبشت وقلتلهم انو هذا مجرد فيتامين C وعصير تفاح و هندي... جبدولي قلم الطب النبوي وكيفاش الرسول عمل و فعل وقال ... والحق أنا ما حبيتش نكبش، و مانيش باش نكبش زادة هوني في أساطير الطب النبوي والعلاج بالقرآن وبول البعير... نهار إلي تضربوا انجين(angine)، داويوها بالحشيش و طيش عليكم من الأنتيبيوتيك. و باش ما نسكرش الموضوع هذا على "كفريات" والعياذ بالله اكتفي بملاحظتين:
- كان جاء دواء بالرسمي راهو في الفارماسي...
- وثانيا الصبار هذا إلي بقدرة قادر ولى يداوي السيدا و العذر والأمراض المستعصية الكل راهو معروف من عهد الفراعنة وكانوا يداويو بيه في الجروح... يعني مش يجيني اليوم  واحد متحيل   ويعمل منو عصير ويبدا ماشي في بالو جايب الصيد من وذنو...

الحاصل،  في عوض ما إنكبش و نقلب المرا على دينها، قلت ما فيها باس نزيد نصقصي مدامها جبدتلي على الإنضمام... أول سؤال ظهرلي بديهي هو "ويني  البلاصة إلي تنجم تشري منها السلعة". وبالرغم من البديهية متاع السؤال هذا  فإنو الإجابات (خاطرهم برشة ) كانت معقدة : في هاو ما عندهمش بيرو، في هاو ما تنجم تاخو كان ما يضمن فيك واحد سيديجا في المنظومة (ياخي زطلة هي، ما تنجم تسلع كان ما يضمن فيك واحد ؟) وكي سألتها  علاش لازم يضمن فيا واحد  ؟ قالت هذيكة هي طريقة خدمتهم وهي طريقة عصرية ومبتكرة في التسويق  وبدا التجغجيغ... وبالطبيعة نفس الحديث إلي حكيتو قبل والغمة وحلان ذراع في الجنة الكلو تقال  وأنا من داخل نغلي ونادم على تدخلي في حكاية ما تعنينيش...

باهي نرجعو توا للشركات (قداش معبية  بالعباد إلي جايبينها متدينين على فكرة)  وكيما بينتلكم، يجي نهار وما عادش يدخلوا فيها عباد - على خاطر العباد الكل دخلت -  والمنظومة الكل تطيح. العباد إلي تحل شركات كيما هاذي كي تخلط للنقطة المفصلية (point critique) تسكر الشركة وتوقف الدعاية متاعها وبين ليلة وضحاها تمشي باش تسلع من هاك البيرو باش تبيع لصحابك تلقاه سكر ومولاه لا حس ولا خبر. والعباد إلي قايمة على الشركات هاذي كل مرة تجيب منتوج جديد (ماكينة فيها حجرة عجيبة تصفي ماء السبالة، الكترونيك، دواء متاع كل شيء...) وتعاود نفس السيستام بشركة جديدة، وبإسم جديد و إلي يعجبك فيه ديما يمشي.

وهاو مثال على شركة حلت وتوا لا حس لا خبر : TVI Express ... هذا سكرينشوت على إلي كان في الموقع متاعها في سبتمبر  2012. توة tviexpress.com/ar ماهوش موجود أصلا !

كيف كيف بالنسبة ل qnet-tunisie إلي الموقع متاعها سكر...


المقال هذا كتبتو لأنو عندو زوز أهداف : 
- نحاول على ما نقدر أني نوعي الناس، على الأقل إلي تقرالي، بخطورة عملية التحيل هاذي.
- دعوة للسياسيين والقانونيين أنهم يأطروا الحكاية هاذي قانونيا، لأنو الظاهرة هاذي استفحلت بطريقة مهولة في العامين الأخيرين، و لأنو وصلت حتى تعاركت مع واحد من  أصحابي دخل في المعمعة  على خاطرني حاولت نقنعو انو باش يتحشالو ... ماشي في بالو غاير منو وما نحبلوش الخير.

ونحب نختم بمثال من القانون الفرنسي إلي يمنع منعا باتا هذه الأساليب المتحيلة :


Extrait du code de la consommation Français:
Art. L. 122-6 :
« Sont interdits :
1° La vente pratiquée par le procédé dit « de la boule de neige » ou tous autres procédés analogues consistant en particulier à offrir des marchandises au public en lui faisant espérer l’obtention de ces marchandises à titre gratuit ou contre remise d’une somme inférieure à leur valeur réelle et en subordonnant les ventes au placement de bons ou de tickets à des tiers ou à la collecte d’adhésions ou inscriptions ;

2° Le fait de proposer à une personne de collecter des adhésions ou de s'inscrire sur une liste en exigeant d'elle le versement d'une contrepartie quelconque et en lui faisant espérer des gains financiers résultant d'une progression du nombre de personnes recrutées ou inscrites plutôt que de la vente, de la fourniture ou de la consommation de biens ou services.

Dans le cas de réseaux de vente constitués par recrutement en chaîne d'adhérents ou d'affiliés, il est interdit d'obtenir d'un adhérent ou affilié du réseau le versement d'une somme correspondant à un droit d'entrée ou à l'acquisition de matériels ou de services à vocation pédagogique, de formation, de démonstration ou de vente ou tout autre matériel ou service analogue, lorsque ce versement conduit à un paiement ou à l'attribution d'un avantage bénéficiant à un ou plusieurs adhérents ou affiliés du réseau.

En outre, il est interdit, dans ces mêmes réseaux, d'obtenir d'un adhérent ou affilié l'acquisition d'un stock de marchandises destinées à la revente, sans garantie de reprise du stock aux conditions de l'achat, déduction faite éventuellement d'une somme n'excédant pas 10 p. 100 du prix correspondant. Cette garantie de reprise peut toutefois être limitée à une période d'un an après l'achat. »

mardi 13 novembre 2012

نداء اليأس : إلي تعرفوا خير ملي ما تعرفوش.

27 commentaires
عدنا، بعد مدة طويلة من الغياب على التدوين والدوانة، وعدنا اليوم بقرارات ثورية تتمثل في تفريك رمانة نداء تونس، أو بالأحرى علاش نجح نداء تونس أين فشل الآخرون.  نداء  تونس يمثل بالنسبة لبرشة ناس، وهذا واضح من طريقة كلامهم، الحل الأوحد والخيار الأنجع للخروج من اليأس والجمود السياسي ولإنقاذ البلاد من عدم كفاءة النهضة باش ما نقولوش من مشروعها المجتمعي...


خلي نرجعو للحكاية من الأول... الثورة... الثورة كي جات على غرادة، برشة ناس صارلهم كيف إلي صار للي سمع انو ربح في البرومسبور، بدا وقتها يخطط ويهندس ويحلم وكي مشى  باش ياخو بايو، لقا روحو يقسم في الكانيوت مع مليون رابح كيفو و في نهاية الأمر ما صور كان هاك العشرة آلاف فرنك إلي سميناها إصطلاحا حرية التعبير... عدى ذلك، ما تبدل شيء بصفة ملحوظة وهذا بشهادة الناس الكل. بطريقة أخرى، كيف نتفكر مستوى الآمال متاع الناس بعد 14 جانفي، وخاصة من اصدقائي الافتراضيين إلي نلقاهم اليوم من أشرس المدافعين على نداء تونس، ما انجم كان نحس بالأسف، على الأقل على حالة اليأس إلي وصلولها وإلي بالطبيعة ماهمش مسؤولين عليها.

باش نكونو واضحين، هاك التهم اللايثة متاع تجمعي و نظام بائد و راس لمبوط، أو كل المصطلحات من إنتاج شركة المؤتمر من أجل رئاسة الجمهورية وتوزيع شباب حركة النهضة على الفايسبوك وبعض الثورجيين من جماعة اليسار المغفل، راهي حكاية بيدونة ومكرزة و تخليني نحس في بعض الأحيان أني  في عركة متاع ملاهط و كل مرة تجي ملهط تحكي  بلغة "شفتها هاك الملهط شنوة تعمل" و تستنى منك  أنك تجي معاها ضد الملاهط الاخرين... و يمكن كنت انجم نلخص الوضعية هاذي بكلمة وحدة وهي "مزايدات" أما مافيها باس كان من حين إلى آخر نفسرو  لجمهور القراء معنى هذه الكلمة إلي ولات على كل لسان.

أنا واحد من الناس ما ننساش كيفاش كان معظم التونسيين يعيشوا ويتصرفوا تحت بن علي، ويمكن ألفة الرياحي تكون أحسن مثال على العقلية متاع التونسي في عهد بن علي: أخطاني نخطاك، ابعد على الشر وغنيلو، على قد لحافك مد ساقيك، شكون يقول للصيد فمك أبخر... ناس بكري ما خلاو ما قالوا باش يسهلولنا التأقلم مع نظام بن علي. وفعلا كانت الناس متأقلمة إلى حد كبير مع نظام بن علي الأمني إلي حتى وإن كان بوليسي بالأساس فإنو الناس كان تعرف كيفاش تربح منو طرف الأمن والأمان إلي كانت نتيجة حتمية لبوليس في كل رونبوان. وكانت العياشة تخرج تسهر في الليل، تمشي للقهاوي، تلعب طرح كارطة في الحومة... يعني بطريقة أخرى كان عند التونسي  هامش من الفضاء الخاص إلي ما يتدخل فيه حد ما دام ما يتدخلش في الأمور إلي ما تعنيهش، وإلي كان من بينها السياسة... اليوم نحكيو في السياسة في القهاوي، أما القهوة تسكر العشرة متاع الليل، نحكيو في السياسة مع التاكسيست، أما صعيب باش تلقى تاكسي في الليل...

بالإضافة إلى هذا الكل، التوانسة تأقلمو مع منظومة الإدارة الموازية و المحسوبية و ولات جزء من ممارساتهم اليومية إلي تبدأ من عدم شدان الصف إلى الرشوة، والجدير بالذكر انو حتى السلم القيمي تبدل بمفعول هذا النظام، فالرجال الكبار أو الجينراسيون إلي خرجت إنتريت عندها عشرة سنين توة، ومن ضمنهم الوالد، وهي الجينيراسيون إلي ساهمت في بناء تونس ما بعد الإستقلال، كانت تتميز بميل طبيعي للنظام والإنظباط. ما كانش جيل متاع أخذ قرارات بقدر ما كان جيل متاع تطبيق القرارات و الإنظباط التام للقانون إلي كان يحطو الحاكم لدرجة انو الشعارات إلي كانت ترفع بدون أي خجل في عهد بن علي كان من نوع "وفاء وولاء لصانع التغيير". الكبار هاذم هوما إلي بناو الإدارة التونسية يعطيهم الصحة لكن هوما زادة إلي بثو فيها عقلية : مادام المدير ماهوش هوني، ما إنجمش نقضيلك القضية متاعك ولو أنها من صلاحياتي. و بما أن الحاجة هي أم الإختراع، جات هاك المحسوبية و الرشوة و تشكل مجمع المعرفة وصار عادي وأخلاقيا مقبول انو مثلا قبل ما تمشي لسبيطار تفركس على واحد معرفة يسقدك ويقضيلك أمورك، وصار زادة عادي أنو الواحد ينظم للتجمع باش يلقى أكثر معارف وينجم يخدم ولادو و إلا ياخو رخصة بناء في ظرف جمعة في بلاصة ما يقعد عام وهو يجري وراها... وفي المقابل، السيد إلي في إدارة وما يقضيش يولي مكروه ومنعوت بالصبع... وباش تشوفو قداش المسألة معقدة، اسألوا على عبد العزيز بن ضياء في المكنين وعايلتو.. من الناس المحبوبين على خاطرو إلي يقصدوا يقضيلو...

التونسي يقعد قبل كل شيء إنسان، والإنسان ماذابيه يكون ديما خير من الناس، ويكرز كي يكون أقل من الناس، و هذاكا علاش الناس في المجمل ترفض عقلية المعارف والتدخلات ولكنها تقبل التعامل بها كلما واتات الفرصة على أساس انهم ضميرهم مرتاح وما ضروا حتى حد. و الخلاصة من كل هذا، انو الظاهرة هاذي ماهيش مربوطة بالتجمع، التجمع كان عبارة على نادي يتلم فيه الريزو الكل... لكن بإنحلال التجمع الريزو قعد لاباس بيه وخدام. وخذا فورمات أخرى: إلي مشى  للنهضة، إلي لقى حظو في النقابات، إلي كلمو كمال اللطيف، إلي كلمو شفيق الجراية... ياخي إلي حلو رياض أطفال قرآنية في ليلة وضحاها بالكش إستناو العام ونص إجراءات إدارية باش يرخصولهم... ماهو فلان يعرف فلان وتحت غطاء نعاونو في الوخيان تتقضى أمورهم لف لف.

المشكلة انو بعد ما جات الثورة وهرب بن علي اللي  كانت الناس   تجسد من خلالو   كل النظام البائد، برشة ناس بدات تحلم في أحلام وردية، مع شوية منومات ثورجية من قبيل "السلطة ملك الشعب" و "الشعب يريد"... برشة ناس ولات تحلم و ترا في أنها على قاب قوسين أو أدنى من دولة نظيفة متحضرة عصرية، شعب واعي، النرويج أصل! ترفعت شعارات كيف العلمانية، الشفافية، الأوبن قوف... إلي ناقصنا الكل باش نوليو دولة من دول السكنديناف بربشناه. والحاجة الفريدة من نوعها مجتمعيا على الأقل، إنو الناس إلي اشتركت في الأحلام هاذي كانت تعرف بعضها مسبقا، و هوما عادة أصحاب كانوا يتقابلو من قبل حتى في عهد بن علي وكانوا عايشين بما تيسر من حريات فردية وجماعية في ذلك الوقت. لكن في المقابل، ومباشرة بعد الثورة، خرجوا عباد يناديو بقيم ومبادئ ومشروع مجتمعي آخر: الدين والأخلاق والفضيلة، لكن انحصر خطابهم وتركيزهم على مستوى الفرد... يعني يناديو بمنظمة دينية - أخلاقية فيها عادي جدا انو وزير يكون عندو جنان و زوز  شوفرة و هيلمان... فيها عادي جدا انو "وخيان يقضيو لبعضهم" بإستعمال أجهزة الدولة... وهذا علاش حتى شيء ما تبدل في يوم التونسي من ناحية الممارسات. والجدير  بالذكر انو الناس إلي عندها نزعة أخلاقية-دينية في رؤيتها للمجتمع (على عكس الناس إلي عندها نظرة مؤسساتية)  ما كانوش يظهرو في الساحة العامة قبل 14 جانفي ويمكن أكثرهم تعرفوا على بعضهم بعد ما تعاود تشكل تنظيم الخوانجية. و هكا لقينا رواحنا في خضم صراع بين ناس منظمة عندها نظرة أخلاقية - دينية للمجتمع وناس غير منظمة عندها نظرة مؤسساتية-إنسانية وكان هذا بداية المغالطة الكبرى إلي عشناها حيث جزء من الشق الثاني رفض التنظم على أساس انو يدفع نحو  إستقطاب هو سيديجا موجود... و في هذا الإطار متاع التردد في التنظيم مشاو التوانسة  لإنتخابات بدون قانون احزاب، بدون ضوابط للتمويل وساعات بدون برنامج واضح للناس بخلاف انو برنامج معادي للنهضة. وفي الخضم هذا الكل، الناس الكل تحلم، الخوانجي يحلم بإنتصار الإسلام والعلماني يحلم بإنتصار قيم الحرية وكل واحد وتصوراتو ليها... الوحيدين إلي حشواه وكانوا أكثر واقعية من الحالمين الكل و أكثر عباد عندهم  قراءة سياسية براجماتية للواقع والمستقبل، هوما إلي حرقوا للطليان الأيامات الأولى بعد الثورة.

عام بعد الإنتخابات، شيء ما تبدل في الطبقة السياسية إلي تمثل الديمقراطيين، نفس الإنقسامات، نفس الوصولية، و نفس البهامة... خلات جزء كبير من التوانسة يشعرو باليأس، بعد إلي كنا نحكيو على علمانية، طحنا لمدنية وشوف وشوف، بعد ما كنا نحكيو على إستقبال الحاكم بالورود، رجع الحاكم بالماتراك، ولينا نحكيو على تعليم قال شنوة زيتوني... تي حتى عيد الشجرة رجع! في مثل هذه الظروف، برشة توانسة، وأنا هنا عكس الثورجيين لا أحكم، لقاو انو باش ينقذو ما يجب انقاذه... لازمهم يتنظمو تحت شعار واحد قوي ورنان ومافيهش العيب ... الوطنية... إلي لخصوها في شخص الباجي قايد السبسي وفي معجمه البورقيبي.

الاشكال في الناس إلي نلقاوهم إنظمو إلى نداء تونس اليوم ليس كونهم تجمعيين، بل الوضع إلي خلاهم يلاحظو اننا بصدد التحول من مجتمع كل واحد يشك في جارو على أساس  انو عساس و صباب لمنظومة بوليسية تؤطر المجتمع، إلى مجتمع كل واحد فيه عساس على أخلاق جارو  و على منظومة دينية - أخلاقية ماشي في بالو انو  مطالب بحمايتها، وهنا تندرج كل الأطياف المجتمعية المتنوعة من ظواهر فكاهية كيف البحري الجلاصي إلى ظواهر جدية كيف السلفية. وكيما قلت سابقا يتميز الوضع هذا و كل المدافعين عنه برؤية لا مؤسساتية ربما قد تتشكل مؤسساتيا لاحقا إذا لم تجد مقاومة. بطريقة أخرى، جارك إلي باش يبعثلك الحاكم على خاطر تسكر في رمضان على الشط ماهوش يدافع على مؤسسة قائمة الذات، اسمها مؤسسة الأخلاق الحميدة عندها ممثلين وبيروات... وانما هكاكة، عندو مشروع مجتمعي لا مجال فيه للحريات إلي هو لا يمارسها. وبالطبيعة التونسي راهو ديما حاجة وحويجة، منها يفرض قناعاتو، ومنها يدبرش حويجة كيف فتحي العيوني وبن حسانة الزوز محامين إلي إشتهرو برفع القضايا متاع الأخلاق الحميدة.

الاشكال الثاني في نداء تونس، هو انو الناس إلي تدافع عليه، تعتقد بطريقة ساعات علنية أو سرية بأن المجتمع التونسي ليس كله جدير بالديمقراطية، وهذا صحيح إلى حد ما. الزوالي إلي يبيع صوتو في الإنتخابات انجمو نلقاولو الأعذار الكل، لكن يقعد غير جدير بالديمقراطية. وفي مثل هذه الظروف الحل هو العودة لصور متاع سلطة نقبلوها مجتمعيا: سلطة الأب. وهو ما يمثله البجبوج بالنسبة لأحباء نداء تونس: البو إلي يعرف مصلحتك أكثر منك، وإلي تحت سقفو الأخوات المتعاركين والمتنابزين الكل يسكرو أفامهم، ويبوسو بعضهم  ويسمعوا الكلام... وهذا ما يفسر الميل الطبيعي عند نداء تونس  للمفردات من نوع "الوحدة الوطنية" "مصلحة تونس العليا" " يجمعنا الإيمان بتونس"...

منطق الأبوية paternalisme هذا عندو أعراضو الجانبية إلي من الضروري الوقوف عليه. مطالب كيف الشفافية و التشريك في القرار من المطالب التي ستقع التضحية بها... عمركشي شفت بو يشاور أولادو وإلا يشركهم في أخذ القرار ؟ الحق الشيء هذا ماهواش في سبرنا. حكومة النهضة تظهر شفافة وذلك لكثرة المتتبعين لها، حكومة الباجي قايد السبسي، وبحكم تجربتها الإدارية باش تكون كيما كانت قبل : الضو لا ! القرارات يمكن تكون في صالح تونس، أما ما تسمع بيها كان بعد ما تنفذت.

يقول القايل علاش  نداء تونس بالذات تلموا عليه الناس؟ ولهنا مع كامل احتراماتي للميا وسبعطاش خيار ثالث إلي طلعوا وإلي باش يقعدوا طول اعمارهم يستقيلو ويشكلو في الخيارات الثالثة.
-  أولا نداء تونس تخلق في ظرف إلي استنزفت فيه الشرعية النضالية و عوضتها شرعية إنتخابية... لغة النضال ماعادش توكل.
- ثانيا نداء تونس هو والنهضة الأحزاب الوحيدة إلي فيها إنضباط حزبي ومافيهش دخول وخروج كيما مقهى التكتل وإلا نادي المؤتمر وإلا روضة البيدبي.
- ثالثا نداء تونس يمثل حاجة للتوانسة : خبرة و تجربة الدولة إلي مهما كانت قابلة للمسائلة فهي خير بياسر من اللخبطة الحكومية إلي نشوفو فيها كل نهار. و بالموازاة، حركة النهضة تمثل عند جزء من التوانسة الدين و الأخلاق... أما بقية الأحزاب والخيارات الثالثة الكل فهي لا تمثل شيئا ذا قيمة عند التونسي وهو بالتالي يجد نفسه بصدد القيام بتقييمات شخصية لحمة الهمامي وإلا لحمد براهيم عند الحديث على الحزب بكله وبالتالي منطق إلي تعرفوا خير من إلي ما تعرفوش هو الغالب.
- رابعا:  الكاريزما التي يتمتع بها الباجي قايد السبسي والتي تجعله شأنه شأن راشد الغنوشي، إعلاميا على الأقل، فوق الجميع، حتى الحضور الإعلامي لهما هو حضور إنفرادي وعمرك ما تلقاهم في عركة على بلاتو متاع تلفزة مع لطفي زيتون وإلا مع المزوغي.

لهذه الأسباب المتوقعة، المشهد السياسي التونسي باش يتجه نحو تشكيل قطبين: قطب مركزه النهضة وقطب مركزه نداء تونس، بالطبيعة كلمة "إستقطاب" الناس الكل تتفجع منها، ولكنها ليست بهذا السوء إذا الناس إلي إنظمو لمعسكر أو لآخر ما ينساوش مبادئهم.

في الختام، أنا واحد من الناس ماذابيا انو الباجي قايد السبسي ونداء تونس يكونو  أكثر من نداء يأس، نظرا لأنو الكثير من الكفاءات والوجوه الحقوقية و السياسية إلي ممكن تكون فاعلة انظمت ليه. و متخوف من انو يستغل الشعور باليأس العام  لتحييد هالكفاءات إلي إنظمتلو عن مواقع القرار السياسي في صلبه في مرحلة أولى ثم إذا صعد إلى الحكم في مرحلة ثانية...
 نعرف زادة إلي شخصية الباجي قايد السبسي عند العديد من الناس عندها مرتبة الأب إلي نفرحو ياسر بيه كي يمشي يعمل مشكلة مع الجيران على خاطرنا وإلي يدافع علينا ضد  البراينية وإلي في نفس الوقت ممكن يكرزو من بعض مواقفو المتسلطة ويبداو يغليو عليه من داخل كيف يبدا شاد التيليكوموند في يدو و ما ثمة فرجة في التلفزة كان على إلي يقررو هو ولكن آسف في نفس الوقت للعودة لمثل هذه النظم الرجعية... أما انشالله كي يقولوا كما قالوا  ناس بكري : ما يلزك على المر كان إلي أمر منو، يتفكروا أنهم اختارو حاجة مرة، و أقل بياسر من طموحاتهم الأولية.



 

mercredi 27 juin 2012

محافظ البنك المركزي و أقوى حكومة عرفاتها تونس.

49 commentaires
 تبدأ حكايتنا من بعد الإنتخابات بشوية، حيث  مصطفى كمال النابلي محافظ البنك المركزي بعد الإنتخابات بشوية  في  نوفمبر تقريب  أصدر تقرير يحذر فيه من ان تونس بدات تقرب من خط 90 يوم متاع التوريد وانو لازمنا نفكرو في مصادر تمويل من توة على خاطر في مارس عندنا كمبيال من قرض قديم لازمو يخلص، وبالطبيعة القروضات ما تخلص كان بالعملة الصعبة. في هاك الوقت، الجماعة بعثوه، وقالوا انو تقريرو سياسي يهدف إلى حطان العصا في العجلة و في هذا الرابط مثال على هذه الردود من أناس نجدهم مسؤولين اليوم. و كما هو  معلوم برنامج النهضة الإقتصادي كان  هو نفسو تقريبا برنامج السبسي إلي خدمو النابلي، مع إختلاف مصادر التمويل حيث انو النهضة قررت أنها تبعث الجي 8 والبلدان الأوروبية و تتلفت لإخوانها في الدين والله : بنو كشطة... و هذاكا علاش تقرير النابلي حطوه على جناب على أساس أنو إلي صحابو قطر والسعودية، ينجم يرقد و يتهنى في الثنية ولا خوف لا على فلوس ولا على مالية !

بعد ما تسلمت  الحكم، مشات الحكومة النهضاوية لقطر ياخي سي حمد  القاعد عليه للصباح قاللهم حاجتنا بيكم في قضية صغيرة : مؤتمر أصدقاء سوريا يرحم الوالد،  نحبو نستغلو صورة تونس مهد الربيع العربي و الثورات القوية جدا باش نفضوها مع سي بشار. الجماعة وافقوا من غير ما يحسبوا الحسبةو إلا يقراو العواقب متاع خطوة كيما هاذي... باش تشوفو كفاءة سي بوشلاكة.



جات العالم الكلو لتونس، وكانت قطر و صحابها يستناو في انو البيان الختامي يخرج بأنو المؤتمرين يعترفوا بالمجلس الوطني السوري كممثل شرعي للشعب السوري، لكن كلينتون اجتمعت في الليل بالمرزوقي وقالتلو انو هاذي خطوة تعني التدخل العسكري وأنهم ماهمش باش يصدمو هكا في حكاية مدخلة فيها خشمها روسيا والصين وإيران  لا سيما أنهم ماعادش حربيين كيما قبل، وحتى ليبيا كان تتفكروا فرانسا القدام وأمريكا لتالي، عملة من عمايل ساركوزي ماشي في بالو كي باش يربح حرب باش ينتخبوه الفرانسيس ... ملخص الهدرة القطريين والخليجيين يحبوا على التدخل العسكري والأمريكان ما عينهمش ويحكيو على خطة  عنان متاع عندكشي  عندي..

يجي المرزوقي  نهار العرس و يبطل  ويخرج بيان دون مستوى آمال بني شلفوح : نعترف بالمجلس الوطني سوري كممثل لقوة المعارضة في سوريا... فدوا منو الخليجيين ومن النهضة عموما وقالولهم حتى الفلوس أنساو... هذا الكلو صار في فيفري... وليناش شهر قبل موعد الكمبيال وما عندناش منين ... يرجع الجبالي للسعودية وكان تتفكروا هاك التوسل و التمسكين وأرجوكم هبة وإن لم يمكن فبوديعة ... وبالرغم من التذلل هذاك الكل السعودية قالتلو آسف ...

الحاصل تكبسو كبسة باهية وحربطو للي لقاو البنك الكويتي إلي عطاهم قرض ب300 مليار بأنتيريس 3.5% كان تتفكروه  باش خرجوا من الحكاية، قرض بنسبة عالية لدرجة  انو  حتى بن علي ما عمرو ما خذاه ... هاذم اخواننا في الدين هاكم شفتوهم اش يعملوا، مقارنة بعبدى الأصنام من الجابونيين إلي يعطيو فينا في قروضات  بنسبة 0.95%.

 و  هاو سي وزير المالية يأكد الكلام هذا في الدقيقة 55 من الحوار إلي اجراه في قناة حنبعل:


المهم... وين يجي دورو  سي كمال النابلي في المسرحية هاذي  ... سي كمال النابلي يقال انو هو من كشف الحكاية هاذي ... يعني انو هو من كشف انو القرض هاذا ماخذينو باش نخلصو كمبيال... وبالطبيعة كي تولي معروف أنك من النوع إلي يكردي باش يخلص الكريدي القديم فمن الطبيعي جدا انو وكالات التصنيف العالمية، ومنها ستاندارز اند بور تطيحلك في تصنيفك الإئتماني إلى أقل درجة تسمحلك بالإقتراض : BBB - و هي طريقة إقتصادية باش تحذر الناس من أنها تسلفك فلوس لأنك ما عندكش باش تخلص، أو بالأحرى تخلص في الكريدي بالكريدي...

وهو كان نحبو نحكيو الحق، حكايات كيما هاذي ما تحتاجش انو محافظ البان المركزي يشهر بيها، لأن الحسابات مكشوفة والقروضات علنية... وأي كونتابلي يقراها الحسابات هاذي يفيق بالحكاية فما بالك ستاندارز اند بور ... أما الحكومة مكبشة في انو مصطفى كمال النابلي هو السبب في تخفيض التصنيف متاع تونس.  و من نهار إلي تسمعت الحكاية هاذي وفاحت والحكومة والمرزوقي يحبو يطردوه  ... ما شافوش الأغلاط متاعهم و قلة الكفاءة إلي وصلتنا لوضعية ولينا نساسيو  فيها ... وكبشو في النابلي ...

المشكلة فين، المشكلة في أنهم ما عندهمش بديل، اللهم الصادق شورو، خلي ينحيلنا التي أم أم (TMM) متاع الربا، خلينا نضحك ضحكة باهية... وبما انو المرزوقي تهنتل ثنتيلة خايبة خلاص نهار الأحد بعد ما سلمو  البغدادي المحمودي من غير ما يعلم، قرر انو يرجع الفازة، جاء يبربش في صلاحياتو باش يشوف شكون ينجم يطرد، ما لقى  كان محافظ البنك المركزي... ولى دز فازتو وأعلن عن اقالتو على صفحتو في الفايسبوك (الله غالب من كثر ماهو فاضي شغل ونهار كامل راكش على الأنترنات والفايسبوك، يحساب روحو يلعب في سيتيفيل على الفايسبوك) وفي نفس إليوم يرفض التوقيع على مشروع ترفيع حصة تونس  في  صندوق النقد الدولي بتعلة انو لازمنا ننظر في القروضات إلي قاعدين نخلصو فيهم قبل  ... 

و هو باش ما ناقفوش عند الحكاية هاذي بالذات، واحقاقا للحق، المشكل بين النابلي والحكومة فيه بعد تقني زادة. البنك المركزي هو من يتحكم في ال TMM  أو قيمة السوق المالية، و هو من إختصاصو حصريا.  عموما، ومع الكثير من التبسيط، كل ما  يطيح ال TMM كل ما يكثر تدوير الفلوس و يتشجع الإستثمار، أما يكثر الريسك زادة، بما انو TMM هو نسبة الفائدة متاع السلف بين البنوك في بعضها. ال TMM هذا من عهد بن علي ماشي ويطيح، وزاد البنك المركزي خفضو بنقطة كاملة في سبتمبر إلي فات ...

 لكن من نهار إلي شدت الترويكا الحكم، ومن نهار إلي أصدر البنك المركزي تحذيرو من اننا قربنا من الخط الأحمر متاع 90 يوم توريد (طحنا من 147 في آخر 2010,  113 يوم توريد آخر 2011 إلى 101 في أفريل إلي فات) وزيد من الفوق لاحظ البنك المركزي إنخفاض هام في الإيداع و إرتفاع عدد القروض الغير ناجعة، قرر البنك المركزي الرفع من ال TMM للمحافظة على التوازنات المصرفية، أو بالأحرى قرر انو ما يتدخلش بالطريقة إلي تضمن الإستقرار متاع المؤشر هذا، لأنو سيديجا في أفريل 2012 البنك المركزي يتدخل بقيمة 3.4 مليار دينار يوميا في المعدل و قرر بالإضافة إلى ذلك المحافظة على نفس نسبة الفائدة (taux d'intérêt directeur)... الحكومة طلبت من البنك المركزي انو يضاعف الجهد متاعو باش يتوافق هذا مع سياستها الإقتصادية إلي سيديجا تضحي بالمقدرة الشرائية باش تحافظ على العجز التجاري، ولكن البنك المركزي لما لاحظ انو التضخم خلط ل 5.4%  رفض انو ياخو خطوات من شأنها أنها تزيد الطين بلة، وتزيد تعمق التضخم (طبعان الفلوس مثلا) وهذا حفاظا على التوازن متاع السوق المالية المنخرمة أصلا، وعلى المقدرة الشرائية متاع المواطن و طلب من الحكومة أنها تنتهج سياسة إقتصادية حذرة... معناها البنك المركزي بطريقة تبسيطية جدا، رفض التضحية بالمقدرة الشرائية للمواطن مقابل تشجيع الإستثمار. بالطبيعة رأي البنك المركزي عندو تعليلاتو وإلي تقييمها يختلف من إنسان إلى آخر. لكن التعليلات التقنية موجودة و عندها مصداقيتها... و هذي  هي استقلالية البنك المركزي، إلي على فكرة يحكم فيه مجلس إدارة مش مصطفى كمال النابلي وحدو. (الأرقام المذكورة في الفقرة هاذي من تقرير البنك المركزي في أفريل 2012 وهذا ملخصو)

المهم، المشكل بين البنك المركزي و الحكومة فيه جوانب تقنية، فيها ساعات تفاصيل مملة، حاولت أني نبسطها لكن على ما يبدو المشكل الشخصي هو إلي عندو الأثر الأكبر في العلاقات بين النابلي والحكومة، إلي تحب بالسيف انو البنك المركزي يطاوعها في سياستها التضخمية، و ماهمش عاملين حتى ربع تقييم لاخطأهم على مستوى الديبلوماسية، على مستوى العدالة الإنتقالية إلي خلات سوق الإستثمار في حالة ركود... ووحل كل شيء في مصطفى كمال النابلي.

تي الحاصل ... مستوى هزيل جدا، ورداءة منقطعة النظير، وسياسة ناس عايقة، متاع أنا ما نغلطش، أنا أقوى حكومة في تاريخ تونس، أنا رئيس شرعي ... وكان ثمة مشكلة راهي من الاخرين، من المعارضة، من الأحوال الجوية ... صفر تحمل للمسؤولية : حسن واصل!

dimanche 17 juin 2012

اكرمو رحمة للوالد ...

45 commentaires
عندي قرابة جمعة  لا مسّـيتش الأنترنات، ما حكيت مع حتى مخلوق إفتراضي، وإلا حتى ركّـزت مع إلي صاير في هالبلاد، إلي مستانس عوجها و نذالة ناسها حاشى صلاحها ما يوصلوني كان عبر الأنترنات لأني بطبيعتي إنسان يكره الإنسانيّـة وما عندي حتى ربع حشمة باش نقولها، ولذا طول عمري ماذابيا نكون بعيد كل البعد الوجداني على كل مخلوق ما يعنيلي شيء، والناس في الواقع ما تعنيلي شيء إلى أن يحدث ما يخالف ذلك... سرّي ديما في قلبي و مشاكلي و أحاسيسي ماذابيا ما يدور بيها حد و ما يصقصي عليها حد و ما نعمّـل على حدّ... هكّـا نجمت نعيش في بلاد إلي فيها أي واحد يعرف عليك حاجة تخصّـك يا يذلّـك عليها يا يحاول يستفاد منها وهذي هي النذالة...

في عشية من عشيّـات الجمعة إلي فاتت، كلّـمني بابا في التليفون وقالي "وينك؟ ايجاني"... كنت في المطار نشيّـع في حبابنا ماشين لعمرة ولّـيت خليتهم وطرت طيران... الوالد مريض من البارح وأحوالو مش قد بعضها وبالرغم من التقريق و التخويف و الإستعطاف ما حبّـنيش نهزو للسبيطار الليلة إلي قبلها.... دخلت مع ماضي ساعتين نلقاه يلهث... وليت هزيتو لإستعجالي المنجي سليم على خاطرو سبقلو وانو عدى أيامات في قسم القلب لغادي ويعرفوه. مجتمع المعرفة إلي يحكيو عليه لقيتو  لغادي الكل كأنهم متفاهمين وعاطين لرواحهم موعد لغادي. و بحكم إلي أنا براني لغادي ما لقيت حتى حل آخر بخلاف أني ننتحل صفة طبيب لا سيما وأني في الطب مطّـلع  بحكم أني مغروم بيه و زيد إلي أكثر صحابي أطباء و زيد بالزهر تقريبا  البنات إلي عرفتهم الكل في حياتي أطباء.

الحاصل، نجحت في أني نطفّـي بكليمتين "فغزونسي" صعاب  السوجيقات إلي في باب  الإستعجالي إلي كان ديما مسكر الباب وما يحب حد يدخل، ونجحت باش نزرب الراديولق باش عملّلنا الراديو للوالد بالوقت و نجحت أني نطلع نتائج التحاليل في أقل من  ساعة. و مشيت بنفسي هبّـطت الطبيب المقيم متاع الكارديو باش يشوف الوالد، ولو أنّـي كنت عارف بالمسبّـق شنوة الدياقنوستيك من وقت إلي شفت الراديو و نتيجة البيوشيمي. و هذا الكل ومن ماضي ثلاثة للسبعة باش تلهاو بينا على قاعدة. و وقتها زادة سمعنا إلي ثمة حضر جولان في التسعة متاع العشية. ياخي مع الثمانية ونص، بعد ما تأكد ميا بالميا انو باش يشدو الوالد بحذاهم ولينا روحنا أنا والوالدة على أساس انو بابا باش يبات في الإستعجالي ومنو غدوة بعد ما يفضى سرير في الكارديو ينقلوه.

 منّـو غدوة مع العشرة متاع الصباح نكلم في الوالد و نعاود في التليفون نطيح على الريبوندور. استغربت و قلت ممكن طاحلو الشارج، نولّـي نحرّر  ماضي ساعة  وقت الزيارة و نمشي للسبيطار أنا و الوالدة، ندخلو للإستعجالي ما نلقاوش الوالد، نطلعو للتروازيام ونفليو البيوت بيت بيت وريحتو ما ثماش، نعاودو نهبطو للإستعجالي ونزيدو نثبّـتو  وباقي شيء. يقوللنا إمشيو لمكتب القبول تاو يقولولكم، وفي مكتب القبول، السيد يقوللنا :"أنا عندي فلان الفلاني مسجّـل في الإستعجالي، كان ما لقيتوهش راهو في التروازيام"...الحاصل كوّرو بينا كي كورة البينغ بونغ من سرفيس لسارفيس وأنا طالع هابط من ماضي ساعتين لقرابات الأربعة واش... وقتها عاودت مشيت لقسم الإستعجالي وقلتلهم أعطيوني نشوف كراسة القبول متاعكم، بصفتك شنوة، بصفتي طبيب كي العادة. وبما أني مانيش مستانس نقرا كتيبة الأطباء بسرعة، الطبيبة تقرا معايا و في ظرف بسيط سكرت الكراسة وهزتها ومشات تجري للشامبر متاع الديشوكاج... وكي خرجت قالتلنا إمشيو لمكتب الناظر العام متاع السبيطار.

نقعدو في مكتب هاك الناظر و معاه فرملية متحجّـبة و فرملي آخر يحكي بعشرة وافي قال شنوة في السبيطار كلو موثّـق وما ثماش تحريكة من غير أوراق وفي هاو عندو قداش من عام خدمة، والفرملية تحكيلنا مرّة على أمبيلانص هزّت مريض في الصباح لسبيطار اريانة وممكن يكون بابا و مرة أخرى تحكيلنا على الإيمان والدين وحكم ربي و في هاو فلانة جارتها ماتولها زوز من اولادها وراجلها  بدبّـوزة قاز و حديث أنا واحد من الناس ما يعنينيش على خاطر السؤال إلي دخلنا من أجلو هو "وينو بابا". نولي نهز روحي و نمشي لدوبلاريست عرفتها نهاراتها وجرات معايا وقت إلي كنت طالع هابط، كي شافتني قالتلي : بوك الدوام لله.

 نرجع بالوقت للوالدة، نخرجها من بيرو الناظر ونقولهالها كاش، يزي ما مهطلونا: بابا توفى! و ووقتها الفرملية تقوم وتقوللنا "الله غالب، من بكري نشوف فيكم طالعين هابطين ما نجمتش نقوللكم، شفتو إليوم في بيت الموتى و قعدت شاكة إلي هو تابعكم و ماك تعرف ساعات ناس تتنرفز و تقوم تكسر"... ما لقيت بيها وين، يا نشد الوالدة المنهارة وإلا نقوم نعيط ونصيح على الاستهبال و التمشوير و أطلع أهبط و هي في بالها وراكشة على روحها تستنى وقتاش نحنا نجيوها باش تعمللنا خطبة على الإيمان و القضاء والقدر.

بالوقت نكلم ولد عمتي و خالي إلي قالي إلي لازمني نلحق على البلدية باش ناخو شهادة وفاة باش انجم نروح ببابا. ما حضرت الشهادة الطبية كان في الخمسة وربع  وبالطبيعة وكايّـها بلاد من العالم الثالث البلديّـة إلي تسكّـر الستة كي تمشي مع الخمسة و نص تلقاها سيديجا مسكرة بالكوبة. خلط خالي، نعاودو نرجعو للسيد إلي في مكتب القبول، وحيّـد متديّـن، شارب محفوف وكبوس: "ألف وأعوذ بالله كان يخرج من غير شهادة وفاة إلي لازمها تطلع من بلدية سيدي داود بالذات" و بعثنا  مرة اخرى للبلدية على أساس انو فيها واحد يخدم برمانونس و نلقاوه في القهوة المقابلة للبلدية. مشينا ما لقيناهش بالطبيعة، نعاودو نرجعو،  وقعدنا في خوذ وهات للي جاء واحد آخر  يخدم في الكاسة  عظّـملنا  الأجر وقاللنا إلي حتى بلدية الجلاز تقضي وهايكا محلولة على طول.

نمشيو أنا وولد عمتي للجلاز. نخلطو مع حكاية السبعة واش... نلقاو زوز رجال تقوى و سبحة وما جميعو، حكى معاه ولد عمتي ومدلو الأوراق، السيد يقرا في الأوراق و وجهو يتلوّن: "لا هاذي ما نخدموهاش..." يا حاج  في طولك، إكرام الميت دفنه... وهو مكبش : "لا عندي عرفي والله يتبع فيا بالمليمتر والمرة إلي فاتت شعرة لا اطردت على حكاية كيما هاذي بالذات ..." يا حاج إنت المعلّـم توا ونحنا قاصدينك ما تخيّـبناش، الوالد متوفي من السبعة متاع الصباح  وتوّة كي قالولنا، ومستحيل يزيد ليلة في بيت الموت، خلّـيه يبات بين أهلو  قبل ما يتدفن... الحاج يحكّ  اللحية متاعو، و يحكي بلهجة إلّـي عامل مزية : "باهي هاني باش نحاول، أما نكلّـم  عرفي قبل" ويعمل روحو يكلّـم في واحد وهو لا تكلّـم ولا راس لمبوط، المخاطب الخيالي متاعو، ذات الاهية على ما يبدو، قالوا انده أقضيلو  ... الحاصل صاحبو الحاج الآخر هزّنا للبيرو وبدا يكتب في مضمون الوفاة و يعاودلنا في نفس القلم متاع راني عامل معاكم مجهود كبير. كي كمّـل،  ولد عمّـتي يغدرني و يمدّلو عشرة الآف بالوقت يحطّـهم في جيبو ويقوللنا بالحرف الواحد: "اسمعني، السيد الآخر هو إلي حركلكم، اكرموه ويرحم الوالد" ولد عمتي استلبس : " هاوكة عشرة الآف ليكم الزوز" يجاوبو لاخر " يا راجل، برى اكرمو رحمة للوالد"... يولي ولد عمتي يخلي عشرة الآف أخرى... قعدت أنا باهت كيفاه نحنا مغصورين على مضمون وفاة والسيد يكتب في عقلو وضارب عشرين دينار في جيبو، حطّـهم بالظبط وين حط السبحة قبل ما يبدا يكتب...

ما لقيتش الوقت باش نراجع إلي صار، لازمني نهزّـ المضمون ونخرج المرحوم  ونروّح بيه، ولد عمتي تكفّـل بالصندوق و كي دخلنا لبيت الموت جسّـيت الجيب متاع سروال الوالد، نلقى تليفونو في جيبوا مسكّـرينو، بالرغم إلي مازال فيه شارج... زدت دخلت بعضي  : لها الدرجة قلة الإنسانية؟ السيّـد مات، نسكرولو تليفونو وما نعلمو حدّ من عايلتو و خلّـيهم يتبهدلو طالعين هابطين يفركسو عليه ثماش ما يفقدو وحدهم الأمل باش نحنا نستغلو الضعف والتعب متاعهم و بشوية دين وإيمان ومواعظ نعوضو التقاعس على أداء الخدمة متاعنا...

لا يا سيدي، مانيش باش نضعف، وباش نستغل آخر رمق في القوة متاعي باش نقوللكم, وأعني معشر المرتزقة، إلي أنا نحتقركم، ونحتقر الإيمان متاعكم، ونحتقر الإلاه متاعكم... إلاه التقاعس والتظاهر بالعمل، إله الزهد والقميص و الرشوة تحت شعار الإكرام، إله النذالة وقلة الإنسانية. توّة بعد ما كمل الفرق، ومشاو الناس إلي نحترمهم بدرجات متفاوتة، وفرغت الدار باش الواحد ينجم يعزي روحو بروحو من غير ما يبدا يشوف في سرسوط منافقين جايين يتدوهنو... من غير ما يبدا حالل السطوش متاعو للمقاول إلي باش يبني القبر يسربي  في روحو باش تطلع فاتورة الزيارة  ميا  وستين دينار... من غير ما يبدا يدور ويلوج على مقرئين يقراو بالرسمي لوجه الله... باش في الأخير يمدّ "النصيب إلي كتب" رحمة على الوالد... بعد هذا الكل، انجم نقوللكم يا معشر المنافقين تفيه على دين ربّـكم و هذا وعد مني على راس الوالد، إلا ما نقعد نحارب فيكم وفي ربكم الإنتهازي لآخر يوم في حياتي ... ما أرخصو هالمجتمع إلي فيه  الناس تستغل في ضعف بعضها وفي حاجتهم وتغطي عمايلها بالدين... ما أرخصكم  وما أرخص دينكم  إلي يشرّفني أن نعلمكم انّـو يسوى بالتحديد : 680 دينار وشوية صرف، وكانكم باش تكبّـشو تاو نبعثلكم دوفي وفاتورة في إطار الشفافية...

وما حاجتي بعزاء... عزايا في انقراض هالحشرات !

mardi 5 juin 2012

الجيش التونسي رضي الشعب عنه، والشهداء رحمهم الله.

8 commentaires
أكيد راكم سمعتو إلي رمزي بالطّـيبي دخل في إضراب جوع وحشي ولحقو عليه بالترتيب  حسام الحجلاوي، ياسين العياري، عزيز عمامي،  لينا بن مهني و أمين مطيراوي. وكي العادة، ماذابيّـا كان نتجاوزو الأشخاص ونتعداو للمطالب و الأفكار إلي يدافعوا عليها هالكمشة (مناضلين / انتهازيين / مش معروفين / يحبوا يتعرفوا  ... ما يهمش وين تصنّـفوهم)

الإضراب هذا دخل فيه رمزي بالطيبي على اثر افتكاك الكاميرا متاعو من قبل المؤســّـسة العسكرية عندما كان لاهي يغطي في إحدى قضايا ما يسمى بقضايا "قتلة الشهداء" وإلي يتكفل بيها القضاء العسكري. ويمكن برشة ناس عن حسن نية أو عن محاولة مقصودة للتمييع استغلوا الإسم متاع الحركة الإفتراضيّـة  إلي انطلقت على التويتر تحت الطاق "رجّـع الكاميرا" باش تحصر المطالب وتقدمها على أنو واحد مسكين نطروه في بورتابل ياخي عمل قاوق باش يتلهاو بيه ويرجّـعهولو.

 
 باهي، من غير لف ولا دوران، المطلب الرئيسي هو انو الجيش أو المؤسسة العسكرية يوقّـفوا التعتيم الإعلامي على قضايا أجمع الناس الكل على أنها من أهم القضايا بعد سقوط نظام بن علي. خاصة وإنو المتهمين فيها بحذانا وماهمش في قطر و إلا السعودية. و من غير تبهليل، نعرفو الناس الكل انو رفع التعتيم باش ينجر عنه ظاهرة الدومينو حيث برشة ملفات باش تخرج من دائرة المسكوت عنها وتولي على انظار العالم والصحافة و خاصة عائلات الضحايا. و هذا في حد ذاتو المضربين عن الطعام والصحافيين ماهمش مسؤولين عنّـو. كون شوية الشفافية إلي نبرحو  عليها باش تأدي إلى إقامة الدليل على انو القضاء  العسكري غير قادر ربّـما  على التكفل بدوسي قتلة الشهداء فهذا مشكل القضاء وليس مشكل الصحافيين لأنو من الغباء التصور بأن التوانسة أغبياء على القليلة في امور كيما هاذي، و  إلي يسمع حديث القهاوي على المسألة هاذي يفيق انو الأفلام الزايدة القائمة على الوهم متاع بن علي بأنو طول ما نحكيوش على الحكاية فإنو الحكاية ما ثماش منها، هي أفلام ما عندها وين توصل. لأنها قائمة على إفتراض غير واقعي بالأساس، وهو انو الناس ماهياش تحكي على دور الجيش في القضية هاذي. و لذا الوضعية الفكاهية هذي إلي عندها أكثر من عام ونص تحت شعار "الجيش التونسي رضي الشعب عنه والشهداء رحمهم الله" راهي ماعادش تنجم تطوّل.

حسب تحليلي الشخصي، نتصور انو المؤسسة العسكرية تحب تلم الحكاية سكّـوتي، مستغلة الحالة متاع (التملق / الخوف / الطمع ...) إلي تعرفها كل الأحزاب السياسية بدون إستثناء، بحيث قاعدين بطريقة غير مباشرة يلعبوا في لعبة أخطاني نخطاك. وفي هذا السياق، نحب نذكر الأحزاب هذي الكل انو اللعبة هذي ما تعنيناش برشة، وانو في إطار الشفافية و خاصة في إطار القطع مع سياسة الإستبلاه والاستهبال، ماذابيه الحزب إلي ما عندو ما يصنع في حياتو ويحب يلعب اللعبة هاذي مع المؤسسة العسكرية يخطانا من هنا فصاعدا من لغة "أهذاف الثورة التي أتت بها دماء الشهداء" و يجيبها برجلة ويحكيلنا على "أهدافو السياسية إلي ماذابيه المؤسسة العسكرية تكون راضية عليها".

 نجي توا لراس الداء، الصحافيين انفسهم، وهنا نحكي على نقابة الصحافيين، وإلي أقاموا الحجة على أنهم غير معنيين بحرية الصحافة، على القليلة بالدرجة إلي يحبو يقنعونا بيها. حرية الصحافة تتلخص عند الكثير منهم  في حرية الحديث عما يشاؤون، في حين أنو الخطوة الأولى من حرية الصحافة هي حرية النفاذ إلى المعلومة... يعني كان باش نقعدو نمشيو على خطوة الكسلى هاذم، باش نرجعو للوضع إلي فيه الصحافيين عندهم الحق يعطيو رأيهم بكل حرية، أما كان في مواضيع كيما التصحر في الصين الشعبية، و إلا الإنحباس الحراري ... وكان حبوا يعطيو رأهم في مشكل ذو بعد وطني، باش ياقفو في حكايات كيما الأمبوتياج في الروت ايكس، أو ما يعبر عنه بكل ضمار ثوري ماسط: شارع محمد البوعزيزي.

 شيء يحشم انو نقعدو نستناو  جمعة بعد دخول رمزي بالطيبي في إضراب الجوع باش تحكي أول وسيلة إعلام سمعية بصرية "موزاييك" ثم "نسمة" كان صدقني ربي على الإضراب، وكأنو من المتفرقات، بين زوز مقاطع متاع إشهار  وفي إطار متاع حصة يحكيو فيها على مشكل بين سليم بن حميدان و شوقي الطبيب... إضراب الجوع عمرو ما كان الهدف منو الإعلام بوجود إنسان قرر إنو الكمّـونية ما عادش تغريه، وانو صحن ملوخية بالرند ما عادش يحرك فيه حتى شعرة. إضراب الجوع هو وسيلة ضغط قصوى موجهة لزوز أطراف: المؤسسة إلي بسببها بدا هذا الإحتجاج بدرجة ثانية، والإعلام بدرجة أولى إلي مطلوب منو إنو يكون في مستوى الحدث، خاصة وانو الحكاية تهمّـو بالأساس. وكيفاش يكون في مستوى الحدث ؟ يعمللنا طاولة وأربعة كراسي وخلينا نفركو هالرمانة متع قداسة المؤسسة العسكرية، وحرية النفاذ للمعلومة. على خاطر لو كان ما ثماش إعلام وطاولة وأربعة كراسي، ما نتصورش  علاش باش يتقلّـق المعني بالأمر من واحد يحب يقتل روحو بالجوع، ووقتها يتعامل معاه كأيها صومالي وإلا رواندي خفف الله عن معاناته ويمكن حتى ما يحسّـش بروحو مسؤول حتى طرف.

 مذابيا نرجع لردود الفعل متاع الأحزاب سواء كانت ردود علنية و إلا في الكواليس... نحب نشكر حزب المؤتمر ورئاسة الجمهورية وخاصة  القائد الأعلى للقوات المسلحة - نظريا -  السيد المنصف المرزوقي   على التعاطف متاعو الشكلي مع القضية و نحبو نشكروه لأنو لا يبلّ لا يعلّ، و ما فيها باس كان في إطار الشفافية يقولها بالحرف الواحد : نحن رئاسة الجمهورية، برئيسنا، وبمستشارينا الواش وعشرين أقصى حاجة انجم نعملوها هو اننا إنظمو  رحلات لعائلات الشهداء للقصر، و نجيبو سمير الوافي يعمللنا إشهار لنزل المرزوقي الفخم في إطار الدعاية متاعنا لتشجيع الشهداء على نسيان الكرب متاعهم ودعوتهم إلى الترفيه على أنفسهم." ومذابينا كان يكفو  عن إحراج أنفسهم عبر تمييع الحكاية و تحويلها إلى مجرد نطرة متاع الكترونيك، و نشكروهم على سعيهم باش يرجعوا الكاميرا... كما قال رمزي : خوذو الكاميرا وهاتو الحقيقة.

في نفس الإطار  نشكرو حركة  النهضة زادة على زيارتها لرمزي بالطيبي ممثلة في شخص السيدة يمينة  الزغلامي و إلي على فكرة جات بصفتها نائمة في المجلس التأسيسي و رئيسة لجنة متابعة ملف الشهداء والجرحى و مش بصفتها الحزبية. ولكننا  ماناش في مرحلة تعظيم الأجر، إلي باش يعاون وهو في موقع قرار، ينجم يعاون بأكثر من انو ياخو تاكسي ويجي ل 42 شارع باب بنات. خاصة وانو التاكسي متاعو خالصة من المجلس التأسيسي.

أما بالنسبة لأحزاب "المعارضة" فهي فرصة تاريخية باش تضغطو في إتجاه يخرجكم من دائرة الإتهامات بالإنتهازيّـة، كان تحبو تحسبوها من ناحية سياسويّـة بحتة بما انو المبادئ تحضر وتغيب عند برشة منكم. وهذا الكلام ينطبق بشكل كبير ياسر على الإعلاميين في شكلهم التنظيمي ومش في اطارهم الفردي. على خاطر كان ما تعملوش القاوق إلي مستانسين تعملوا فيه كي مدير جريدة يتحاكم على خاطرو حطّ شطر بزولة في الصفحة الأولى متاعو، فإنو أول من باش يتضرر هي المصداقيّـة متاعكم.

في الختام، رانا عشرة ملاين و تقريبا الناس الكل نعرفو بعضنا ولذا زايد التخبية وتخديم المخ، خاصة في ملف كيما ملف قتلة "الشهداء". بطريقة أخرى كي يحكي محامي الدفاع بلغة "العباد إلي تحاكمو فيهم إليوم يجي نهار وتستحقوهم وماكمش باش تلقاوهم"، فتأكدو إلي نحنا عندنا زوز حلول : يا ندخلو  في لعبة ماسطة خلاص متاع كول ووكل أو ما يعبر عنها بالإنتهازية،  وإلا انجمو نتفاداوها بالحوار المفتوح... على خاطر كيما يدور في الشارع التونسي انو الجيش متورط، يدور زادة انو كان باش نتّـبعو  الناس الكل قضائيا، باش نحطو تونس الكل في الحبس إلا من رحم ربي، وعلى خاطر من ناحية أخرى، منطق كول ووكل ينجم يتقلب، ويولي ياكلوا ويوكّـلوك للعباد... و لهنا نحكي خاصة على جزء من الرأي العام إلي جايبها ديموقراطي و يرفض الحديث على دور الجيش، أو على الأقل يبدا يسفّـه في الحكاية لا لشيء إلا لأنو ثمة شكون قالوا إلي رشيد عمار قال للسلفية "سوف أعلن إنتهاء الفسحة". أمّـا  الجزء الآخر من الرأي العام -الإفتراضي خاصة-  إلي يرفض الحديث عن الموضوع من منطلق الدفاع على حكومتو الشرعية، فزايد نحكيو عليه على خاطر نحب نقعد بعيد عن معجم السبان عبر اجتناب التعرض للظاهرة متاع الطحين الشرعي في هذه التدوينة  و إلّـي أكيد أنها ظاهرة تستحق أكثر من مقال...

المهم، إلي لازم يقعد راسخ في مخاخ الناس الكل، وهذا زاد أكّـدهولي رمزي بالطيبي عند زيارتي ليه البارح، انو الهدف ليس فتح حرب أو مواجهة مع المؤسسة العسكرية، الهدف هو بكل بساطة الدفع نحو مزيد من الشفافيّـة لأنو من منطلق أخلاقي ومبدئي، بما انو الدولة هاذي خذات أرواح توانسة، فأنو من واجبها أنها تعطيهم الحقيقة على الأقل. أمّـا ما ينجر عن ذلك من تبعات ... فهذا شأن المؤسسة العسكرية بالأساس.

jeudi 2 février 2012

القصة الكاملة لإنتحار البوليس السياسي و لإفلاس المال السياسي.

52 commentaires
القطع مع النظام البائد... ازلام النظام... البوليس السياسي... المال السياسي... الجملوكية والتطهير... التطهير ... التطهير ... المحاسبة... المحاسبة... والثورة المباركة المباركة ... ودماء الشهداء ...اش عبّـينا منهم شكاير. الحق أنا واحد من الناس تنفخولي لدرجة إلي وليت مدمن على أكتيفيا في فترة الحملة الإنتخابية. بالطبيعة من غير ما نحكيلكم على التسطيرة العالميّـة بنكهة  الهويّـة إليّ حتى كي تضرب كيلو إفّـيرالقون و كيلو سباسفون، وجيعة الراس والجاير إلي يتحيّـرولك يقعدوا يزنّـو عليك بنفس الريتم متاع ظهور سمير ديلو في وسائل الإعلام باش يحكيلنا بلغة "حقوق الإنسان ولكن"...

باهي هات نرجعو من الأول ونصلّـحو  شوية أفكار غالطة أو بالأحرى اثبتت غلطها بالتجربة. و أول المسلّـمات انو "العلمانيين" هم  من أثارو  الجدال الديني في السياسة و بسبب ذلك خسرو الإنتخابات. الجدال هذا موجود من زمان ربي على الفايسبوك وعلى المدونات من قبل، من أيامات ما دخلوا علينا جماعة تيار التخونيج العلمي و بداو يعلمو فينا في الأخلاق... (تحياتي لـ"عبارات" و طابورها الخامس لمن يتذكر ذلك الزمن الجميل / الرديء.) و بما انو الجماعة هاذم تسيّـبو من جملة ما تسيب بعد 14 جانفي، وبما انو مطالعاتهم كاتن تقتصر على حاجتين : الكورة وفيديوات محمد حسان فبالطبيعة، وكنتيجة حتمية باش يكون إنعكاس ذلك على مستوى النقاش في الرأي العام إنعكاس آني وكبير. و كان يمكن من خلالو تقييم مدى قابلية هذا المجتمع للدمغجة لكن بعض قيادات القوى "التقدمية" سكّـرت عينيها ووذنيها ومشى في بالها أنها  تمارس في التنافس الديمقراطي في بلاد كيما فرانسا وإلا ألمانيا....

ومن هذا المنطلق، فهم حزب المؤتمر، إلي كان يتحط نهار 15 جانفي في نقل ريفي واحد بدون احتساب السائق، انو من مصلحتو  إستغلال هذا المعطى لأنو لغة الحريّـات والعلمانية وحقوق الإنسان إلي كان يتغنىّ بيها سي المنصف المرزوقي وقت إلي كان راكش في فرنسا (وماكانش لاجئ سياسي كيما يقولوا) ولات لغة ماعادش توكل لا الخبز ولا الملاوي... وزاد تأكد من الشيء هاذا وقت إلي كلا النصيب إلي كتبلو من الخبط نهار إلي هبط للقصبة، نهارتها فهم انو الخوانجية عقارهم كبير ياسر، وإلي في أي وقت ينجّـمو يخسروا عليه فيديو في الحقائق الخفيّـة ويولي أشنع من ألفة يوسف...

سي المنصف، من جملة ما بدل، بدل المرايات متاعو إلي كسرهالو  والديسك متاع حقوق الإنسان والحرية إلي طلع مجروح، وجاب في بلاصتو الديكسيونار متاع "ازلام انظام البائد" "المال السياسي"  و"البوليس السياسي" و"التطهير" وكل هاك المفردات الإستجعابيّـة إلي تحيّـرلي الجاير. و بقدرة قدير، من إلي كانوا حداش ولاو حضبة كبيرة والناس الكل فرحانة و تحط في شعار  المراياتات (المسروق من حملة  إيفا جولي على فكرة ) على الفايسبوك.

من ناحية أخرى عمّـك حمّـة الهمامي قعد ديما يهلوس من إلي صارلو في التسعينات لدرجة انو الرفيق ياكل في الخبط في سجنان  و يفسدلو  إجتماعاتو في حي التضامن وهو يعيط بوليس سياسي، تي الحاصل، الناس الكل تتفكر  هاك الريق إلي سيّـبو علينا مدة 9 أشهر باش ما يغشّـش شباب حركة النهضة على الفايسبوك ثماش ما يتخلص من تهمة الإلحاد القاتلة إنتخابيا. وكمكافأة على المجهود إلي عملوا حمة الهمامي إعلاميا عن طريق التنبير على "التقدميين" و اتهامهم بإستقطاب التجمعييّـن و بأنهم خانوا مبادئ الثورة و دماء  الشهداء  وميدانيّـا كذلك عن طريق إفساد اجتماعات الأحزاب الأخرى، أطلق فيراج النهضة هاك الحملة إلي الناس الكل تعرفها متاع نهضة العمال من أجل الجمهورية وإلي زاد ترجمها رئيسنا الحالي سياسيا عندما دعا للتصويت لأربع احزاب : النهضة إن كنت ذو توجه إسلامي، البوكت إن كنت تحن على العمال، التكتل إذا كنت "فرنكفوني"، و المؤتمر إذا كنت "يساري قومي" (هههه)

أما مصطفى بن جعفر، فإنو ما لقى بيها وين، لوّج على المنخرطين وفهم انو الخبزة صعيبة كي تبدا حانوتك في نهج فيه أكثر من  100 واحد والكلهم صحاب صنعتك، و خاصة وإنو الكليونات  من نوع إلي أول مرة باش تتعدى من هاك النهج... لا فهم لا يعيّـط لا تريلية ولا قاروص... أيا قال الحلّ في اني نعيّـط "هاو الحوت" و كي يسألوني تبيع تريلية وإلا قاروص نقوللهم "نبيع في الحوت". و هاذاكا كيفاش عرفنا التكتل : الحزب إلي مع الناس الكل، مع وضد صنصرة الأنترنات، مع وضدّ حقوق المرأة، مع وضد الديمقراطية... حزب دون مواقف، الحاجة الوحيدة إلي سلّـكتهالو، انو ما نالش النصيب إلي نالتو الأحزاب الأخرى من التشويه الممنهج.

وفي هاذي الأجواء البهيجة، تم بالهناء و بالتراضي العرس الإنتخابي بعد ما أنا واحد من الناس خراولي في كيفي باش ما نقولش كلمة أخرى بكشف المؤامرات: ابدأ بفرحات الراجحي وصاحبو الحواّت إلي حكالو كيفاش رشيد عمار باش ينقلب على الحكم كان النهضة تربح، وتعدى على ياسين العياري إلي طلعلنا في ماي بحكاية "الرجل الذي قال لا" و عامللنا فديوات يفسرلنا فيهم كيفاش أنقذ شعر  المواطنين التونسيين من التوندوز العسكرية متاع رشيد عمار، وتعدى زادة بأحداث الروحية إلي إكتشفو أنها مؤامرة من السبسي لتأجيل الإنتخابات و التمهيد  لإلغائها جملة وحدة بعد عودة التجمعيين... و المؤامرة إلي كشفها زعيم السلفية في تونس متاع التفجيرات إلي ناوية تعملها حكومة السبسي في رمضان باش تلصقها في الإسلاميين وتعلن حالة الطوارئ وترجع الدكتاتورية... هذا الكل في إطار هزلي - درامي أصبح الحديث فيه عن تجاوزات الإسلاميين السلفيين  فزّاعة، وإلي يشدوه بالكمشة وتهبط تصاورو  في الأنترنات، يجيبلو خبير جعبة ياسر، قاري في أمريكيا في أكبر جامعة متاع علوم سينما وعندو لوجسيالات العالم الكل وإلي استعملها ببراعة باش يبرهن كيفاش انو السيد هذا بوليس سياسي وبالأمارة لحيتو مركّـبة...

امشي يا زمان وايجا يا زمان، فقنا نهار 24 أكتوبر بعد إنتهاء المباراة على فوز نادي الهوية والبوليس السياسي و لحقو معاهم بالإسعاف نادي "لا موقف لي" على أساس انو ممثل القوى التقدمية و الناس الفينو أما إلي يحترمو مقدسات الشعب الأفغاني بتونس. وفقنا كيف كيف على خبر مفاجئ: إختفى بقدرة قادر البوليس السياسي بوليسا بوليسا  و إنتحر ازلام النظام البائد زلمة زلمة، و أفلس المال السياسي دينارا دينارا (بالأمارة كمال اللطيف شافوه يعارك على بلاصة متاع نصبة في سوق بومنديل و الهادي الجيلاني يحكيو انو يسكسف في الشطوط ثماش ما يلحم قاوريّـة و يورّق بيها و يطلع للاوروب). وبعد تكذيب دام أكثر من تسعة أشهر على لهجة "لن نعقد أي تحالف مع حزب النهضة لا توة ولا غدوة (مصطفى بن جعفر)"، و "ليس لنا أي تحالف مع الإسلاميين (المنصف المرزوقي)"  شهدنا  الناس الكل على ولادة الترويكا، إلي والحق يقال تعملت في نهارين بعد النتائج الأولية،كأنو ربّـي محنّـن  القلوب والأفكار والبرامج على بعضها من زمان...

وبعد ما تشكّـلت الترويكا، بعثوا العالم الكل، وقعدوا قرابة شهرين وهوما يقسمو  في ثروة الثورة، تقول ثلاثة فصايل يقسمو في كعبات شراب خذاوهم من المرشي نوار. وهاوكة من البرّة النهضة تحكي بمنطق وفاق وتحالف، ولداخل تحكي بمنطق أنا جبت أكثر كعبات قزاز، أنا نقسم و انتوما تشربو وإلا تطيرو قرونكم. و بالطبيعة في البلعة الإنتخابية  هاذي ما إستدعاوش عمك حمة الهمامي على خاطرو فقير إنتخابيا و "الله غني يحب الأغنياء" على حد قول سيدنا الشيخ و ما كلموش العريضة على خاطرهم ناس ماهمش متاع بلعة سكّوتي تحت حيط. و في الإنتظار، عمك مصطفى بن جعفر قعد يمضغلنا في لوبانة "هاني معاهم باش ما يقطّـعوش بكعبات الشراب الكل و يسكرولنا وتولي عربدة في الطريق العام" و شدّلنا سي المنصف المرزوقي في قلم : نحنا باش ندخلو  في الحكومة باش نطهرو الداخلية والعدل.

بعد شهرين، وبعد ما طارت النفحة من عند العباد إلي جايبتها تتابع  في السياسة، نفيقو على رئيس، وهنا للأسف أقولها بدون أي سخرية، ليس له أي صلاحية إختصاص (معناها حاجة ينجم يعملها من غير ما يشاور عرفو)، و تخلى المؤتمر على وزارات  العدل والداخلية والبوليس السياسي  إلي عمل منهم راس مال، و لقينا رواحنا مع وزير داخلية يقول بالفم المليان : أنا ضد فتح ملفات البوليس السياسي... لقينا رواحنا مع وزير تشغيل ما عندو حتى اشكال انو يحط بنتو في ديوان وزاري بعد ما حزبو كسّـرلنا (شنوة جمع قضيب ديجا ؟) على حكاية المحسوبية والمحاباة والفساد... لا وزيد يقلك من غير حتى حشمة :هاو الوزراء الكل يعملوا فيه الشيء هذا ولذا وينو العيب ؟ و نزيدو نسمعوا انو سي المنصف إلي تالمون عندو صلاحيّـات وخدمة، عيّـن 17 مستشار منهم بنت رجل أعمال عاونو في الحملة الإنتخابية متاعو إلي كان شعارها : "هذا المنتوج خالي من المال السياسي".

وبما انو طلب العروض مازال متواصل لإنتداب مستشارين جدد لفخامة رئيس الجمهورية الفكاهية، فأنو  ما قعدناش نستناو برشة قبل ما تتصاعد  الأصوات إلي خرجت تضرب بالبونية على  " حق المسؤول في الحكومة المنتخبة بصفة شرعية و ديمقراطية و نزيهة و المترجمة لخيار الشعب التونسي (وهنا أؤكد على إكتساب هذه الحكومة للشرعية المطلقة اثر إنتخابات ديمقراطية شفافة) ، في ممارسة جميع صلاحياته التي يكفلها القانون،  فلا يجب أن تكون قرابة شخص ما من مسؤول عائقا أمام حصوله على منصب يستحقه في صورة توفر شرط الكفاءة ( ويمكن في هذا السياق أن اضرب مثال وزير الخارجية الحالي ) . بإختصار، لا يجب أن يتحول عامل القرابة إلى عامل معرقل يحرم الفرد من وظيفة ، هو يستحقها بالنظر إلى مستواه العلمي و تجربته العملية " (عن طارق الكحلاوي - بتصرف )  وفي هذا السباق أفلح البعض كعدنان المنصر و مازال البعض ينتظر دوره (ربي يواصل بالسالم يا سي طارق الكحلاوي )

بعد عام من الثورة المباركة، يعلن وزير الداخلية حليف المنصف المرزوقي فصل سمير الفرياني إلي يجي الوالد متاع فخامة رئيس الجمهورية إذا نصدقو  الصورة هاذي  إلي  أخذت في إطار القاوق إلي عملوا حزب المؤتمر من أجل  النهضة على قضية الفرياني والتكريم و الهيلمان إلي نظموه باش في الأخير يطلع جرد عميل مخابراتي حب يستغل فراغ القيادات الأمنية باش يبتزّ و يقلّـع بلاصة من البلايص إلي فرغو... معناها في كلمتين : المؤتمر خذالنا بوليس سياسي وعمل منو بطل و بعد ما خدموا بيه مع النهضة، طيّـشوه في إنتظار تحويلو رسميا من بطل قومي إلى مهدد للأمن القومي.

كذلك بعد عام من الثورة المباركة، استقالات بالجملة من حزب التكتل وهاذي نتيجة حتمية لحزب ربح مقاعدو بـبيعان الريح للمراكب و بغياب أي توجه سياسي يجعل منه حزبا قائم الذات.  فخلال الثلاثة أشهر  إليّ تلت الإنتخابات، المكتب السياسي متاع التكتل ما سمعناه كان في إطار التعليق على الإستقالات الجديدة و التخفيف من تأثيرها على مسار الحزب عبر إعتبار المستقيلين "يعرفوهم مع شكون يسهرو" و " يفضلوا يمشيو للبار على أنهم يحضرو لإجتماعات الحزب". ولذا، إذا يكملوا على هذا المنوال، فإنو التكتل بعد مدة قصيرة ماهو باش يقعد فيه كان بن جعفر هو والمطرقة متاعو والمنقالة من نوع  "كاسيو" إلي شادد بيها الحساب تقولش عليه  اربيتر على طاولة النقاطييين متاع ماتش كرة يد.

أما المؤتمر، فمباشرة بعد إعلان الحكومة، نال النصيب إلي كتبلو من الإنقسامات على أساس إنو بعض الناس إلي دخلوا مشى في بالهم انو المؤتمر حزب مستقل، لكن الحسابات السياسية لبعض القيادات خلاتو يعرف انو لا مستقبل له بدون النهضة، أو بالأحرى لا مستقبل له في إطار أي خلاف مع النهضة، آش خلى الحزب يوصل إلى حد التصويت ضد مقترح رئيسه  المنصف المرزوقي  الداعي إلى عرض الدستور على الإستفتاء، في إنضباط تام مع خيارات النهضة وفي إطار مهزلة إنتخابية منقطعة النظير.

وهو كي تجي تشوف، الفيلم إلي عشناه مازال أطول من هكا بياسر، خاصة كي نتفكر شابيتر :"تقطّـع أيديهم وأرجلهم من خلاف" متاع الصادق شورو في إطار التعامل السلمي والحضاري مع المعتصمين، وإلاّ الشابيتر متاع البارح متاع المواجهات المسلحة في ضواحي صفاقس إلي كانت محسوبة على حكومة الظل. في السابق .. وإلا الشابيتر متاع مدام بوشلاكة إلي كانت تعاير في شكري الواعر على أساس انو كوارجي يعمل في السياسة وهوما عندهم أبو يعرف المرزوقي وما ادراك، باش في الأخير نفيقو على كوارجي في الحكومة  مستواه العلمي لا يتجاوز نظرية طالس... وإلا الشابيتر متاع "شفتوني أنا أعلم رئيسكم كيف يوقف ويصافح"...  وإلا  المسلسل الدرامي الكامل متاع "ننسحب من هيئة بن عاشور لأن فيها مطبعين مع الكيان الصهيوني ..."  آش نجبد وآش نخلي؟ ...

المهازل عديدة ويمكن أرتيكل واحد لا يكفي لجمعها، وهذا عادة تلقاه بكثرة عند الأحزاب إلي تبني خطابها على دزان البيدق متاع الهوية و الدين و ما جاوره، بحيث يبيّـنو في أول فرصة انو مبادئهم وكلامهم الكل كان مجعول باش ينفخو الزبب متاع منافسيهم بلغة العفّـة و محاربة الفساد وكي يدور عليهم الشيء يوليو يتلّـفو في الجرة ويكبّـشو في لون السليب متاع زياد كريشان. هذا بالطبيعة بعد ما أقنعو المواطن إلي صوّتلهم  و إليّ  دارو على الطياح و هو يعاني في البطالة انوّ إرتفاع أسوام العظم والحليب ودبوزة القاز أمر ثانوي و تافه  أمام تصويرة كرتونية فيها  طفلة صغيرة تتخيّـل في ربي...وفي إنتظار ذلك، يموتو الناس في تالة وفي القصرين بالبرد في إطار الهدنة الشاملة تحت شعار "سكر فمك، اصبر ، يزي من الفتنة"..

أنا مانيش من هواة الدعوة للعصيان المدني وهاك الريق الثوري الزايد، أما من الداعين إلى تحمل الشعب لمسؤلياته. إلي ينجم يعاون بيه يعملو، والحمد لله في تونس الواحد ينجم يعمل على السلف، مش السلف متاع "أختاه احذري"، ولكن السلف من عند الأحباب والأقارب... و التونسي للتونسي رحمة، و يحرزلنا مازال عندنا قيمة العيلة والتضامن الإجتماعي ولا راهي شطر البلاد ماتت بالجوع والبرد. ولهنا مذابيا نغتنم الفرصة باش نزيد نأكّـد انو ثمة حملة تبرّعات تقبل كل ماهو اعانات وغطاوات ماشية للمناطق المتضررة من البرد كيف تالة، وتنجمو  تاخدوا أكثر تفاصيل هوني.

كي تجي تشوف المحصلة، تفيق انو أنصار الترويكا  سيّـبو علينا الدروشة متاعهم و حاولوا يقنعونا أننا بصدد المشاركة في حرب بين متطرفين علمانيين ومتطرفين اسلاميين، وأنا واحد من الناس في فترة من الفترات اقتنعت بذلك جزئيا.  وبالطبيعة قدموا رواحهم على أنهم الحل الوسط الذي لا مفر منه لضمان السلم الإجتماعي... آن الأوان باش نتجاوزو هذه الثنائيات الإيديولوجية التاعبة ياسر. متطرفين اسلاميين إيه موجودين، يستعملو في العنف و القوة ضد خصومهم... حصل الشيء هذا. أما متطرفين علمانيين، الحق عمري ما سمعت بعلماني تونسي شد واحد آخر و عطاه بدماغ وإلا حرقلو دارو وإلا حتى نحالو الحجاب وإلا لحيتو بالسيف. كانك على إلي مستانسين ينحيو في الحجاب متاع النساء هاو والو  تابعين حزب المدبية وهذا لم يمنعهم من إيقاف المدون زكرياء بوقرّة البارح وضربه  لا لشيء سوى انو أحد الأعوان إلي ضربوا في السابق حب يعاودلو طرح ضرب إسلامي المرة هاذي. ولذا من غير ما نكذبو على بعضنا. الوضع الحالي واضح وصريح : السلطة بلباسها الإسلامي تحتكر العنف مع مناصريها، في إنتظار دحض هذه الأطروحة أي حديث عن تطرف علماني هو تتليف للجرة و  ذر رماد في العيون.

في الختام، حبيت نقول إلي ريت إليوم قبل ما نكتب المقال هذا نسخة من المسودة متاع دستور النهضة و أغلب الظن انو المهازل لن تنتهي بعد، خاصة مع عودة منطق "حرية التعبير مضمونة ولكن" بشكل دستوري... ومع ذلك، نعاود نؤكد على إن الخطر ليس في إنفراد الإسلاميين بالحكم بتاتا، وانما في إستقالة التونسيين من المشهد السياسي. على خاطر برشة باش يقولوا " إلي عقدت فيه النوارة طلع مش ولا بد ولذا السياسة هاذي لا أمل فيها كي بيها كي بلاش، هيا نخليهم يقيمو فيها الأذان".الحكاية هاذي تبدأ ديما ب" أخطاني من وجيعة الراس" وتوفى ب "أخطى راسي واضرب".

jeudi 24 novembre 2011

الحقوق والجرة الحرفة متاع الكلب المثمول

38 commentaires
اليوم جاء لبالي باش  نحكيلكم على حكاية ، واقعيّـة أون بليس، عشتها على مدى السنين إلي قضّـيتهم في مدرسة عليا في فرنسا... في المدرسة هاذي، كان عندنا بلاصة نعيطولها الفوايي "Foyer"، مركز يجتمعوا فيه التلامذة بعد القراية، فيه   قاعة ألعاب وقاعة موسيقى و قاعة مطالعة وصالة تلفزة و بار، مجهّـز مما جميعو، وفيه حتى الدمق والكمية للي ناوي على مشروع بلعة متكامل. الفوايي كانو شادّينو التلامذة وحدهم: إلي عندو الوقت باش يتلهى بيه ما يشاورش ، يمد يدو للبركة ويعاون بلّي يقدر وهاوكة ديما التلامذة  يتعداو أفواجا أفواجا و الأمور عال العال وإلي حاجتو بمفتاح صالة الموسيقى يلقاه  ديما موجود، هذا كان مش سيديجا محلولة وفيها عباد تعمل في الآمبروفيزاسيون, وإلي حاجتو بمفتاح المكتبة يلقاه ديما موجود و كل شيء ديسبونيبل على خاطر الناس الكل لاهية بالفوايي و حتى حد ماهو لاهي بيه رسميا. يعني تجي للفوايي مع العشرة متاع الليل تلقى زوز وراء البار يسربـيو وكي يفدو يمشيو على رواحهم وإلي موجود لغادي ياخو بلاصتهم و هكذا دواليك، والبار ما يسكّـر كان ما العباد إلي في صالة الموسيقى فدّو وروّحوا وإلي في المكتبة رجعوا الكتب ومشاو تخمدو، وإلي سكرو يروحوا بيهم ويسكّـروا البار.

البار هذا ماكانش عندو هدف ربحي، يعني ثمة تلامذة يشريو البيتزا المثلجة والدمق  والدخان و المشروبات الغير كحولية والكحول والكمية للناس الكل وتتباع في البار تقريبا بنفس السوم متاع الشريان. والغريب في الأمر، انو بالرغم من انو ما ثماش مسؤول واحد لاهي بالفوياي، عمرها ما صارت مشاكل، لا مع التلامذة ولا مع الإدارة إلي كانت والحق يقال مطفّـية الضو - عن مضض- على البار إلي كان يبيع في الكحول القوية (ويسكي / فودكا / روم ...) وكان زادة يبيع في الدخان بالتفصيل. وكانت  سياسة الإدارة  تقول إنو من الأفضل انو الطلبة يشربوا في الفوايي خير من إلي ياخذوا كراهبهم ويمشيو للسنتر فيل وترصّـيلهم في مشاكل مع الحاكم  لا سيّـما وانو الكومبيس بعيد يجي عشرة كيلوماتر على أول بار و 3 كيلوماتر على أقرب حماص يبيع الدخان. و الشرطة والحماية المدنية إلي كنا تابعينهم إداريا كانو زادة في بالهم و يتعاملوا مع الوضع بتفهم خاصة وانهم متعودين على توقيف تلامذة  يسوقو في حالة سكر لكن سيرتنا معاهم نحنا بالذات كانت رطبة.

وكانت من الشروط والتعهدات - غير الرسمية بالطبيعة - متاعنا مع الإدارة والشرطة  انو كي إنـضّمو سهريات في الفوايي مع طلبة من جامعات أخرى، نخبيو الكحول باش ما نوليوش نبيعو للعموم، وكان هذا الشرط محترم بدرجة كبيرة. ونهار من النهارات، صارت مشكلة...

في سهرية منظمينها في المدرسة، في الجيمناز، يعني بعيدة جملة على الفوايي، وقعت المأساة... والحادث هذا يتمثل - شدوا رواحكم مليح-  في انو عباد مثمولة، والغالب انهم برانية، عطاو الشراب، إلي ما سربيناهش نحنا،  لكلب! اي نعم كلب! سي الكلب ترهوج ورمى الأربعة من الشيخة...  و الله حتى كان جاء كلب  مربّـي نقولو صحة... الكلب هذا طلع من الفوق كلب سايب ...  برا عاااد... من غير ما نوصفلكم  تشقنيس الفرنسيس و أحاسيسهم المرهفة: التلامذة ماكانوش من العاكسين، كلموا الحماية المدنية، والحماية المدنية في فرانسا ما تجيش وحدها، جابت معاها الحرس، والحرس إلي جاو، طلعو من العمادة المجاورة، يعني ما في بالهمش بالوضع الخاص متاعنا.

وكيما يقولو في الشمال الغربي:"أرنب يكرّ على حلّـوف"،  في جراير سي الكلب المثمول، الإدارة اغتنمت الفرصة وسكّـرت  الفوايي مدة  أربع شهر، و  سكّـتت التلامذة بلوغة هاني باش نعمل فيه أشغال متاع  تحسينات و ناخذلكم رخصة، وبالطبيعة الرخص المسموح بها في مؤسسة تربوية ما تنجمش تفوت الرخصة 2, يعني ما عندك الحق تييع كان  الكحول الخفيفة (بيرة وسيدر) وماعادش عندك الحق تبيع الدخان. لكن قلنا ميسالش، واشبيه و آش خص، مادام أمورنا باش تولي قانونية جداا.

الوضع الجديد ما تأقلموش معاه العباد الكل، و الناس ماعادش تجي كيما قبل، على خاطر لا عاد ثمّـة لا دخان يتباع ولا كحول قوية وزيد الناس فدّت من البيرة و زيد القانون الجديد يمنع انك تجب مشروباتك للفوايي، حتى كان ماهياش شراب. و لذا ما  قعدوا يجيو ديما كان  كعبات من الصّـحاح إلي ديما تيتولار و موجودين عندهم عامين.

ومع قلّـة المستهلكين، بدات مشاكل السرقة من البار تظهر. هو في الحقيقة السرقة في المشروبات (عباد تسربي رواحها بلّـوشي) كانت موجودة من قبل، وكان إلي نفيقو بيه يتفضح وماعادش يخليوه يسربي. أما كانت الكحول القوية تغطي السرقة: دبوزة الويسكي ب 15 اورو يدخّـل منها البار 20 و تتباع الكاس ب 1,20 اورو، سوم مرفق ومساعد الناس الكل... أما من إلي تقطع الدخان والكحول القوية، بطلت الناس تجي وولات السرقة ظاهرة في الميزانية متاع البار. و لذلك الإدارة اقترحت انها تحطّـلنا متصرّف في الفوايي، عندو المفاتح الكل، وهاوكة الأمور تكون أكثر صرامة من الناحية الإدارية. و مقابل هذا العرض السخي في ظاهرو، التلامذة إلي كانوا في مكتب الطلبة (إلي انتخبناه) ما خمموش برشة وقبلو العرض. قالوا "ابري تو"  الفوايي ماعادش يجيوه برشة ناس والتلامذة ولات كي تشد البار تقولش عليها عاملة مزية، مافيها باس كان يولي عندنا متصرف إداري على الذمة باش ينظّملنا  الأمور.

هيا العام إلي بعدو، وبما أن الزبراطة الصحاح وأصحاب الجو ولاو هاربين من الفوايي ويعملوا في سهرياتهم في ديارهم، الجمهور إلي قعد يمشي للفوايي ولّـى معظمو من هاك الناس البايخة و بعابص الكبار، و إلي بالزهر، لا يعملوا فنّ في صالة الموسيقى، ولا يتكيّـفوا دخان، تي هاك الفرانسيس إلي عاقدينها قراية و تفدليكهم كيف وجوههم - لا يورّيهم لعدوّ - وبالطبيعة بداو يحكموا بأحكامهم. فبداو بمنع الدخان في السهريات، قال شنوة ما يحبوش يروحوا دبشهم ريحتو بالدخان، قلنا الله يبارك. وبعد طلعوا بطلعة أخرى : علاش ما نعملوش مسؤول على صالة الموسيقى هو إلي عندو المفاتح، ومسؤول على المكتبة و نحطو مسؤلين على البار هوما الوحيدين إلي عندهم الحق يسربيو و هكا نحصروا المسؤوليات و تنقص السرقة؟ و من الإقتراح ولات الحكاية هاذي ممارسة ثمة قاعدة: ما تنجمش تحل صالة الموسيقى كان كي يحلّـلك التلميذ المسؤول عليها. برى عاد كلموا في التليفون وشوفو موجود في الكومبيس وإلا لا. هذا كان جاوب على التليفون وكان حب يتقرقش من بلاصتو ويجيك باش يحلك الصالة...

يا سيدي قلنا مش مشكل، على كل حال صالة الموسيقى نهايتو تاليفون والسيد إلي لاهي بيها ما عليه كان يتحمل مسؤليتو تحت شعار : إلي  يركب على البهيم يحمل بصّـو. ولكنهم  طلعولنا بطلعة أخرى: ممنوع الدخان في صالة الألعاب إلي كانت كبيرة ومروحة. قال شنوة، السواقر تهلك "التابي" متاع البيار... قلنا يا سيدي مش مشكل كيف كيف، واحد يعمل تنقيزة يجي البره، يعمل سويقرو ويدخل يكمل طرح البيار ...

نهار وأنا  قاعد نلعب في طرح بيلوت في الصالة الكبيرة متاع الفوايي (تعمل يجي 300 ميترو ) جاني  سي المتصرف، إلي هو بحبوح و ناس طيبة والحق يقال:
- علاش ما تخرجش تعمل سيقاروك معايا لبرة من الفوايي... مش خير ؟
- علاش؟ زادوا منعوا الدخان في الصالة الكبيرة زادة وين فمة البار ؟
- لا ماهواش ممنوع، مسموح به، أما ما فيها باس كان تخرج معايا نعملو سيقارو وكان تحب نعطيك دخان... (متاع واحد يحب يعمل سيقارو وما يحبش يعملوا لبرّه وحدو)
- باهي هاني خارج! حتى أنا نفركس على شعول كان عندك...

وقعدت مديدة ما مشيتش للفوايي  بحكم أني مشيت في ستاج، وكي رجعت، الفوايي تبدل جملة. البار ولى يسكر مع نص الليل خاطر ماعاد ثمة حتى حد من "المكلفين رسميا" يحب يسهر بعد هالوقت لأنو ماعادش الناس تجي كيما قبل، والنتيجة انو التلامذة ما عادش تجي جملة: آش باش تعمل في فوايي فارغ؟ قبل بالقليلة فيه 30 فرطاس، توا كي تلقى فيه خمسة من الناس  في وقت الذروة بعد العشاء يتسمّـى جمهور عريض. أما الصدمة كانت كي مشيت للبار و نلقى البيرة براسيون غلات بعشرين سنتيم من إلي كانت ب 1 اورو  ... ماهو لاباس ؟ قالك  هذاكة  الحل إلي لقاوه باش يجابهو العجز في الميزانية الناتج على السرقة، العجز إلي قعد  هو هو بالرغم من تطليع الأسوام على فكرة.

 لعنت  الشيطان، و قلت زماني ماهوش زمانهم، خلي نرجع نكوّن شلّـتي متاع البلوت و بقلة ليها، ياخي قاعدلهم محسوب؟ و مع أول سيقارو طرشقتو جاني المتصرف:
- استرات، اخرج  تكيف بره !
- توا هكا نقصّ على طرح كارطة مع ثلاثة رجال باش نتكيف البره ؟
- إي لازمك  تختار، ثم الناس تتقلّـق من الدخان ...
- شكونهم الناس، تلفتت لصحابي،  تتقلّـقو انتوما ؟
(قعدوا باهتين وسكتو )
- حد ماهو متقلّق، ثم من حقّي أني نتكيف هوني، الصالة كبيرة وثمة 5 بعابص كبّـار بالحساب، ما تحاولش تقنعني انو السيد إلي بعيد عليا 15 ميترو متقلّق من سيقارويا.
- تعرف إلي الفوايي هذا في التعريف القانوني : "مؤسسة تستقبل العموم" معناها حسب الشرع الدخان ممنوع فيها،  أما نحنا نتساهلو في القانون  ونأولو فيه ونقبلو التدخين بصفة إستثنائية ...
- بالله فكّ علينا يا باتريك، قالوا مؤسسة تستقبل العموم وشرع، تي تلامذة في بعضنا آش مادخّـل الحاكم؟ أسمع مش في وجهك أما مادامو مازال من حقي - حسب البلايك متاع منع التدخين المعلّـقة -  أنّي نتكيف في الصالة الكبيرة، فإني مانيش باش نتنازل عليه وباش نمارسو.
- في بالك إلي إنت الوحيد إلي قعدت تتكيف في وسط الصالة الكبيرة؟ الناس الكل تخرج باش تتكيف وإلا بطّلت الدخان ...
- قول الكيّـافة عافو الفوايي وماعادش يجيو ، أما تأكد مادامني نجي هوني حقي نمارسو لآخر لحظة، وحتى كان وليت منعوت بالصبع على خاطرني الوحيد إلي نمارس فيه...


يقول القائل، لواش تحكيلنا في الحكاية هاذي ؟  الحكاية هاذي نحكيها  على خاطر العبرة إلي فيها عشتها وجرّبتها:  الحقوق تُـخسَر بالتساهل فيها، إلى أن يصبح ممارسوها أقليّـة، ثم يُقضى عليها بعدم الممارسة و تُـجرَّم ممارستها تحت ضغط العرف و السائد. ولذا أخي المواطن، مارس حقوقك إلى آخر رمق وآش عليك في إلي يقلك إلي إنت أقليّـة و و "خارج عن المألوف" و"حالة شاذة" و "لا تمثل الشعب التونسي"، خاصة كي تبدأ الحكاية الكل جاية  في جرّة حرفة متاع  كلب مثمول ما يعرفش يشرب من غير ما يدوخ عليك...

وحديثنا قياس.