حبيت نخصص التدوينة هاذي باش نحكي على القصبة 3. الإعتصام أو محاولة الإعتصام إلي بائت بالفشل وانتهت ب"أدمينات الثورة" إلى وضعية ولاو يعيطو فيها: "أرجوكم أرجوكم ! انضموا ! تبا تبا لقد تحشالنا ".
قبل كل شي، نحب نذكر انو الإعتصام هذا أثار جدل كبير وإستطلاعات الرأي إلي شملت ما يقارب 35 ألف مواطن إفتراضي بينت انو العباد كانت مقسومة إلى مساند ومعارض بنسب ياسر متقاربة مع تفوق طفيف جدا للعباد إلي ضد (51،4%). وهذا من قبل الإعتصام، الشيء إلي يلزم المساندين للإعتصام بأنهم يكونو أكثر حذرا في إستعمال الشعارات من نوع "الشعب يريد". في مثل هذه الحالات، شعار "نحن نريد" يكون أكثر موضوعية ودقة. إلي ماشي يعيط "لا للإلتفاف على إرادة الشعب " لازمو أول ما يبدا، يبدا بروحو وما ينتحلش صفة الشعب كي يبدا في بالو إلي ثمة نسبة كبيرة من الناس ماهياش موافقتو في التمشي متاعو. ومع هذا الكل لازمني نأكد انو حق العباد في التظاهر ما فيهش نقاش. تحب تخرج تعمل مظاهرة على التصحر في الصين الشعبية ما يسالك حد ! كون مقنع وصادق تاو تجي العباد. هذا من ناحية مبدئية. أما من ناحية عملية فإنو كما قال البيغ، وهوني باش نقتبس كلامو : "القصبة 3 أو عندما تكتشف حركة النهضة أنّ التونسي الزوالي ينجّم يمشي معاك لإجتماع شعبي باش يعبّي الصالة مقابل كستروت وعشرين دينار وركبة في كار كليماتيزي، أما كيف تحبّ تهزّو في غرغور القايلة ياكل العصا في بلاصتك ويزحف على القصبة بالملايين يقلّك من أنتم؟ (اللهمّ يكون ينتمي لحزب المؤتمر هههه)..."برشة ناس مشى في بالهم إلي أنا، وهوني باش نحكي على روحي على خاطر ما نعرفش الاخرين كيفاه يخممو، ضد الإعتصام على أساس أنو النهضة وراه، ولأني "ضد" النهضة وبالتالي لازمني نكون ضد الإعتصام... أولا نحب نوضح إلي أنا عمري ما كنت ضد النهضة كأشخاص، الإسلاميين الكل توانسة قبل كل شيء -إلا من رحم ربي و يحس في روحو عثماني ولا من السلاجقة كيف بسيكو آم-. بطريقة أخرى لا أعارض النهضة على خاطر فلان وفلان ولكن لأسباب فكرية، وعمري ما نبني أفكاري باش تكون ديما ضد النهضة. أما ثانيا وهو الأهم فأنو معارضتي لإعتصام القصبة 3 ناتجة عن معارضتي لأغلب المطالب شكلا ومضمونا و خاصة توقيتا. و هاو باش نفركو الرمانة مطلب مطلب كما وردت في الإعلان متاع الإعتصام في هذا الرابط.
1- محاسبة المجرمين والفاسدين.
المطلب الوحيد إلي يقعد شرعي و ديما في وقتوا طول ما هو ما تحققش... ولو كان جاء الإعتصام متاع القصبة 3 فيه كان المطلب هذا راهو صار توافق أكبر بياسر لكن الله غالب، منظمي الإعتصام حطوا المطلب هذا باش يعطيو الإعتصام صبغة شرعية، شوية الناس ما مشاتش في الخط. ولهنا نحب نذكر إلي العدو الفعلي للعدالة ماهواش طول المدة وإنما النسيان... وماناش باش ننساو، ولذا طال الزمان أو قصر، كيما قال فوزي بن قمرة : "نجيبك نجيبك يا القناصة... مدام أنا نريدك، نجيبك نجيبك"
2- إعادة هيكلة الهيئة العليا للإلتفاف على الثورة بإقصاء دعاة التطبيع
هذا هو أكثر مطلب "مندس"... للي ما تبعش المسلسل، الهيئة هاذي ولات بيها وعليها و "أحل" (بضم الألف) إطلاق النار عليها من نهار إلي خرجت منها النهضة... وبالله قيلونا من حكاية التطبيع ... رب عذر أقبح من ذنب! هاذي حكاية يحكيولنا فيها ؟ اش ما دخل التطبيع من أصلو في الثورة... المطلب هذا رفعتو النهضة و النسخة الاوريجينال متاعو هي "إعادة تشكيل الهيئة بما يضمن التوازن الحقيقي للقوى داخلها" معناها نحبو يكون عندنا أكثر بلايص ونحبو ما يتعدى شيء من غير موافقتنا عليه ... بالطبيعة الحكاية هاذي خرجت وقت إلي تجبد قانون الأحزاب ومصادر تمويلها... أي بعد 5 شهر من إنطلاق أعمال الهيئة هاذي وإنضمام النهضة ليها. ولذا من غير تنوفيق قالوا تطبيع و راس لمبوط وهات الصحيح تاو نتفاهمو. أما مطلب كيف هذا وراه مصلحة حزبية ضيقة تعيط يا بابا يا أمي، من المستحيل أنك تضفي عليه شرعية مش كي تعيط على دماء الشهداء من عهد قرطاج!
3- ضرورة تشريك الشباب
أنا موافق على المبدأ، أما شكونهم ها الشباب.... كانهم "لا نفاق" متاع كورة تونس وإلا "بسيكو آم" وإلا الجعبة الآخر متاع "الحقاق الخفية"، السماح ! كان ثمة شاب وكفء يتفضل مرحبا... أما على حد علمي وقت إلي جاو الشباب الإطارات إلي كانوا في الخارج باش يخدموا في الحكومة الإنتقالية قالوا هاذم عملاء فرانسا... عدى ذلك ما نراش شكون من "الشباب" عندو الكفاءة والقدرة متاع أخذ القرار و يحصل عليه إجماع كبير باش يتحمل المسؤلية ويكون فاعل و عموما حتى حد ماهو غير قابل للتعويض. وهذا لا يعني انو الباجي قايد السبسي أحسن ما فمة باش يتحمل المسؤليات، عمي الباجي ياسر تاعب قدام الإعلام التونسي... ويتعامل بالمنطق القديم متاع ناس بكري ولغة "أنا بوك ونعرف مصلحتك و نخاف عليك" وكي تلوي العصا في يدو يجبد العكاز ويعطيك ! أما الله غالب، هاي كاترال شادين بيها رواحنا للي نخلطو الحي نهار 23 أكتوبر ووقتها يعمل ربي دليل!
4- إقالة وزيري العدل والداخلية.
المطلب هذا مفرغ من معانيه ومن اهدافه. خلينا نكونو واقعين: البوليس متاع تونس خامج، ومش كي يعملوا ألف إضراب وألف مظاهرة ويبكيو دموع التماسيح، وهذا سواء كان الصيد في الداخلية وإلا الراجحي. وعلى فكرة، كي شد الراجحي الداخلية، ما تتذكروش كيفاه طاحت فيه العباد ركبة قال شنوة القمع متواصل للي ولات اقالتو ساهلة ياسر وبعد رجعت العباد لطحينها العادي متاع "نريد "مسيو بروبر" وزيرا للداخلية؟
ثم الحبيب الصيد ما عملش حاجة معينة بل إكتفى بأنو ما عمل شيء! وأثبت عدم الكفاءة متاعو في أحداث المتلوي وين الجهاز الأمني فشل في حفظ الأمن إلي هو مسؤول عليه بالأساس. أما إلي ماشي في بالو انو كي يتبدل وزير الداخلية باش يولي الحاكم يفرق في النوار فهو واهم. البوليس متاع تونس في أحسن الأحوال جادور، مش متربي، عضروط، قبيح، وهذا على خاطرو مهواش متكون! تكوينو الوحيد أنهم يصدمو 10 كونتر زوز ويفشخو العباد بطريحة وبذلك يتم حفظ الأمن. والأساليب هاذي متاع الهوكش والقطعية باش تقعد فيهم إلى أن تتم رسكلتهم في إطار برنامج كامل متاع إعادة هيكلة للجهاز هذا باش يفهم سي البوشلط معني الكلام إلي حاطينو في كواترووات في المراكز وإلي عنوانو "الإلتزام بخدمة المواطن".
ثم الحبيب الصيد ما عملش حاجة معينة بل إكتفى بأنو ما عمل شيء! وأثبت عدم الكفاءة متاعو في أحداث المتلوي وين الجهاز الأمني فشل في حفظ الأمن إلي هو مسؤول عليه بالأساس. أما إلي ماشي في بالو انو كي يتبدل وزير الداخلية باش يولي الحاكم يفرق في النوار فهو واهم. البوليس متاع تونس في أحسن الأحوال جادور، مش متربي، عضروط، قبيح، وهذا على خاطرو مهواش متكون! تكوينو الوحيد أنهم يصدمو 10 كونتر زوز ويفشخو العباد بطريحة وبذلك يتم حفظ الأمن. والأساليب هاذي متاع الهوكش والقطعية باش تقعد فيهم إلى أن تتم رسكلتهم في إطار برنامج كامل متاع إعادة هيكلة للجهاز هذا باش يفهم سي البوشلط معني الكلام إلي حاطينو في كواترووات في المراكز وإلي عنوانو "الإلتزام بخدمة المواطن".
5- استقلال القضاء
بالنسبة للجهاز القضائي، فكما بينت في مقال سابق، المؤسسة القضائية باش تقعد مجموعة متاع bras cassés من غير كفاءة سواء كان لزهر القروي في الوزارة وإلا عمر بن الخطاب! وهاك تشوفو في الخدمة الزبالة : 5 شهور باش يحضروا قضية متاع زطلة على بن علي... و المهزلة متاع ما يعرف بقضية بن حسانة على المواقع الإباحية. حيث انو القاضي حكم في القضية هاذي بتفويض سلطاته لل ATI باش هي تقرر حجب ما تراه صالحا ! وهذا في القانون يتسمى تجاوز للسلطات عن جهل وعن نقص حاد في الكفاءة. جهل يخلي القاضي بطريقة غير قانونية يمنح سلطاتو للوكالة متاع الأنترنات في حين انو إلي لازم يعملوا انو يحكم بحجب ليستة يكون هو محددها مسبقا والوكالة تكتفي بالتطبيق، هذا إذا تجاهلنا التعدي الواضح على الحريات الشخصية و حق العباد باش تتفرج في إلي تحب عليه من غير وصاية.هذا بالإنجليزية يقولولو : fail on failure . معناها نهار آخر ال ATI تقرر حجب الفايسبوك على خاطر رات إلي فيه أشياء منافية للاخلاق تاو تضربولها على الطيارة، كان قبل الحجب يتم دون مبرر، توا ولى عندو تفويض قضائي ...
من الأخر، حكاية إستقلال القضاء هاذي حكاية بيدونة، الي يحب على الإستقلالية يتصرف بإستقلالية... وديجا مشكلة القضاء الكبيرة هي نقص الكفاءة إلي يغطيو فيه برميان الكورة في ملعب الحكومة، كيف مؤخرا جمعية القضاة إلي عاملة بيان تدين فيه عنف البوليس و - شدو رواحكم - تطلب من الحكومة فتح تحقيق قضائي لتحديد المسؤولين ومعاقبتهم ... ياخي شكون إلي يحلو البحث ؟ ياخي مش من صلاحيات القضاء إنو يفتح تحقيق، وانو يعاقب ؟ في بالي القضاء هو الجهة الوحيدة إلي عندها صلاحيات العقاب ... وهذا مش قاضي مش ثنين ... هاذي جمعية قضاة ! من غير ما نزيد نطول في هالنقطة... عملوا العار !
6- تفعيل العفو التشريعي العام
في بالي المربوطين لكل تسيبو... حتى من جماعة سليمان... الوحيد إلي لازمهم يسيبوه ما جبدوش عليه واسمو سمير الفرياني... وفي إنتظار النداء لإعتصام من أجل إطلاق سراح سمير الفرياني ... هانا نتفرجو وساكتين.
7- التمسك بموعد الإنتخابات في 23 أكتوبر
و لما لا نعملوا إعتصام باش نتمسكو بتونس كإسم للدولة متاعنا ؟ ياخي شكون جبد على تبديل موعد الإنتخابات؟ بالعكس توا إنت كي جاي تطالب بإعادة هيكلة الهيئة متاع بن عاشور، وبإستقالة بن عاشور، ماهو ثمة ريسك متع فسخ وعاود من الأول وجديد. هيئة الجندوبي إلي انتخبتها هيئة بن عاشور غير المتوازنة نلغيوها ونلقاو رواحنا نتناقشو مرة أخرى في الإنتخاب على الأفراد وإلا القائمات... معناها الإعتصام هاذا ينادي بحاجات تنجم تكون متناقضة، وحتى كان ظاهرها رنان وعليه توافق فأنو أغلبها مش في وقتو : شهرين وتنتخب و تنتهي صلوحية حكومة السبسي وهيئة بن عاشور. لواه الفساد ؟!
ما بعد الإعتصام
باهي نحب نرجع توا للإعتصام في حد ذاتو، وأقل حاجة انجم نقولها هي انو الحاكم متاع تونس ماهواش ناوي يراتي حتى مناسبة باش يثبت للرأي العام انو ضد الشعب. و انو مهواش يحفظ في الأمن بقدر ما انو يقمع في الناس، ولهنا كليمة لطحانة الحاكم على شاكلة هذا الرهط: ما تحشمش على روحك تطحن للبوليس؟ اليوم هاو كلاوها "أعدائك"... تهنى غدوة تاو يجي طهورك وما ينفعك طحينك وقتها! رهوط ماعندهاش مبادئ و في سبيل افكارها وقناعاتها - هذا كان عندها أفكار وقناعات من أصلو - تبرر وتدعم آلة القمع! ولذا كلمة وحدة : تفيه !
ثانيا : اللاكريموجان في الجامع ؟ ألو فيق يا حمادي ! وين ماشي ؟ بقطع النظر على مسألة إحترام المقدسات، فإني لهنا نستغرب صمت برشة عباد إلي تعيط وتناضل على إحترام الأديان وراس لمبوط و هي كان جات كنيسية تمست راهم شنعوها بالعياط. البوليس مهمتو حفظ الأمن في الأماكن العامة وفي الشوارع. و ما عندوش الحق يتدخل في جامع وإلا في جامعة وإلا في مدرسة إلا ما يطلبوا منو المسؤلين على المؤسسات هاذي انو يتدخل. لأنو الأمن طلع وإلا هبط يقعد خدمة توفرها الدولة... الحاصل ملا هوايش ... وبرى قال وظفو الجامع لإعتبارات سياسية. هذا ما يعطيكش الحق باش تضربهم بالقنابل المسيلة للدموع في وسط الجامع. وحتى كان استفزوك، خدمتك إنت كبوليس انو الشعب يستفزك، تخلص باش يكون عندك ضبط النفس، أما مادامك بوليس جبري وماكش متعلم... زايد نقريوك دروس تربية مدنية و إنت ساعات اسمك تغلط فيه كي تكتبو بالعربي !
في الختام، نحيو عليكم المنطق متاع الثنائيات، ومش على خاطر ضد الحكومة تولي تساند اعتصامات مسيسة، ومش على خاطر ضد الخوانجية تولي تبرر القمع. وبالله نقصو علينا من الإشاعات... خاصة جماعة النهضة راهو عيب وماهواش تصرف إسلامي جداااه ! كيف هوني
راهي لغة أحداث معزولة وتصرفات فردية من صفحات غير رسمية يديرها البوليس السياسي ماعادش تاكل. و الجو هذا متاع الإشاعات وهاو ضربوه وهاو إعتداء وهاو هجوم تخليني أنا واحد مالناس متملح من حكاياتكم و من البكاء متاعكم. إعلام بن علي كذب علينا للي بعثناه ... حتى كي يقول في النشرة الجوية غدوة راهو طقس مشمس نقولولو تحشي فيه ... اليوم حتى من "الثوريين" إلي "ثاروا" على كذب بن علي وهاو اعتصامات وهاو دماء الشهداء ... ولى عندهم الكذب وتزييف الحقائق ...العبرة من الحكاية هاذي الكل: مش على خاطرك تعيط باسقاط النظام البائد و ضد بن علي معناها إنت إنسان ثقة وتصلح !
يعطيك آلف صحة و يرحم ولدين ولديك، مقال ينحي خمجة من على القلب، مقال رائع جدااااااااااه
RépondreSupprimerJe partage 99% de tes idées .. Ce sit in a montré au public que "Deux choses sont infinies : l’Univers et la bêtise policière .. " ainsi que le vrai visage de quelques partis .. Le ridicule ne tue plus et c'est bien dommage...
RépondreSupprimerfrax: ena m3ak fi lmawe9if elli fel article, mais je suis contre enna nestannew essebsi w ben achour 7atta ywaslouna lil elections, tou simplemen 5ater hedhom w m3ahom barcha rouss kbar w ajhza amnya w meme 3askareya 9e3din ywartou fel bled w yghar9ou fiha fedyoun bech peu importe resultat l elections, c leur politique elli temchi w bettely massala7hom teb9a ma7foudha, c pour ca, je suis persuadé elli hal 7kouma lezem etti7 w tet3awadh b 3bed clean w9wew genre l mestiri wella l fileli w ykouno mad3oumin mecha3b bech ma yerk7ouch lil irheb mte3 les monopoles wel ajhza l amneya.
RépondreSupprimerحكاية تدنيس المقدسات تولي فيها و عليها. لانو الاشخاص ما دخلوش الجامع للاحتماء فقط انما حبو يستعملوه للاعتصام فيه و يكونو هكاك استغلو بيت من بيوت الله في تسييس قضيتهم. و يكون الجامع رمز في المستقبل..و الي يحك راسو يمش يجيب جماعة و يعتصم..و برا آش باش يحزها..لذا رغم انو الكريموجان في الجوامع او الكناءس غير مقبول قانو استغلال بيوت الله في اغراض حزبية مرفوض زادة
RépondreSupprimerمتفاهمين انو مرفوض لكن مجابهة الغلط بالغلط ماتجيش خاصة من السلطة إلي لازمها تكون متعقلة.
RépondreSupprimerأموافقك على المواقف ووجهة نظر محترمة جدّا ولكن انحب انعرج على حاجة ، منذ 14 جانفي واقعة حرب امتع تزييف الحقائق ، فمّا تزييف حقائق من جهة الأدمينات الي اتكلمت عليهم وبالأخص تضخيم ولكن هناك أيضا كذب واتبلعيط من جهة التخويف بالإسلاميين وهو الكذب من طرف اخر معروف ، شاهدناهم منذ بداية هروب بن علي ألا وهي قص يد سارق في سوق في مجاز الباب ، طفلة طهروها في جنعورة ، ضرب النساء الغير محجبات ، أمير المؤمنين ، بولحية في الحمامات ، خاف الشعب لدرجة أنّ كثيرا من الشعب ندم على خروج بن علي ، والسلام
RépondreSupprimerرغم مساندتي للاعتصام اعترف أن المقال موش خايب. لكن للاسف تغافل عن نقطة مهمة جداااااا - نتمنى موش عمدااا - وهي محاولة إلتفاف الدساترة والتجمعيين على الثورة - والسبب هذا وحدو يستحق 1000 إعتصام. بقطع النظر عن من يقف ورا الاعتصام.
RépondreSupprimer«Je ne partage pas vos idées mais je me battrai jusqu'à la mort pour que vous puissiez les exprimer»,
RépondreSupprimerنهضة موش نهضة. مادام المطالب مشروعة. تحليلك يكرس القولة: هذاك المقرس هذاك المعجون. و أشرب و لاّ طيّر قرنق. وهذه الخيارات الإنهزامية و العملة الماشية في تونس من قديم الزمان. تو ولينا شامتين في الناس إلي خرجوا يعبروا سلميا عن قناعة و فكرة, وهذه كذلك من شيم الإنتهازية المغروسة في فئة كبيرة من شعب تونس. ياخي حشرات إلي تضربو؟ و من بعد تقولإشاعات, صحيح ثمة إشاعات أما من وزارة الداخلية ما نستغرب شيء.
طحان مالطحانة إلي عايشة لبرا و ترشق علينا بالدّيمقراطية و حقوق الحيوان كي حال زبّي معطّل و خدمتي واقفة و في الشّارع تبدى متعدّي بكرهبتك مروّح يطلعلك للكيّاس فرخ مالفروخ لكببّلة مهبّط سروالو ينيكك بحجرة يهبط الباربريز ڨزاز تو تنفع زبّي الدّيمقراطيّة متاع زك أمّهم
RépondreSupprimerشعب حيوان ما ليهم كان حاكم الرّحمة لا
على خاطر كمشة موبنة عايشين لبرّا و مصالحهم مضمونة و ماعندهم فاش يتضرّوا نخلّيو الحيوانات و الخمّاج يحرقوا لبلاد باش يرضاو على زبوبنا موبّنة الدّيمقراطيّة و حقوق الخمّاج
Bien dit!
RépondreSupprimerبالله أقراو التعليق إلي قبلي تو تفهموا أعلاش برشة ناس ما تستحقش الحرية
RépondreSupprimerالسيد قبل كل شي قمة في الذكاء - ما فهم شي من المقال - وقمة في التربية - بين السبة والسبة سبة -
وإلي ادهى من هذا أكثر حاجة مقلقتو في الدنيا الباربريز متاع كرهبتو - قمة في.... -
بالله واحد ليل ونهار حاطط وزر لبلاد على اكتفوا
وفما ناس ما تستحقش حرف الحاء متاع حرية يستاهلوا كان جنرال و بوليس نهار كامل يستفعلوا فيهم
بالله أقراو التعليق إلي قبلي -طحان مالطحانة إلي عايشة لبرا و ترشق....- تو تفهموا أعلاش برشة ناس ما تستحقش الحرية
RépondreSupprimerالسيد قبل كل شي قمة في الذكاء - ما فهم شي من المقال - وقمة في التربية - بين السبة والسبة سبة -
وإلي ادهى من هذا أكثر حاجة مقلقتو في الدنيا الباربريز متاع كرهبتو - قمة في.... -
بالله واحد ليل ونهار حاطط وزر لبلاد على اكتفوا
وفما ناس ما تستحقش حرف الحاء متاع حرية يستاهلوا كان جنرال و بوليس نهار كامل يستفعلوا فيهم
momtazzzzzzz
RépondreSupprimerBRAVO ChAt Libre :)
RépondreSupprimerOn va voir ce que vous allez faire, critiquer tout le monde le sais!!
RépondreSupprimerMais c'est une bonne analyse, logique, bravo
RépondreSupprimerLe mm anonyme de 16:59
شكرا على حيادك الواضح أثناء المقال لكن توا كي انتي ضد التصرفات الي عملها البوليس علاش ما نتوحدوش شعب كامل و نعاودوا ثورة ثانية لاجتثاث الفساد من جذوره؟
RépondreSupprimerالفكرة جدية و أرجو أن تعرضها إن أعجبتك على زملائك المدونين و الأدمينات
Bon klemek fih el ma39oul ema fih zeda barcha men 3a9liet t7in el mawroutha aban 3an jad, a9wa 7aja fel article el kol enek 3rafet kifeh twari eli enti neutre malgré vous ne l’êtes pas.
RépondreSupprimerEna rayi cha5si enha el a7zeb hia eli fazdet kol chay men nahtha lel 7ezeb Echebi srtt puisk y5amou ken fel kresi
ettaswira mte3 el bombe a gaz mfabrka w 5dhewha min intifadhit Palestine, thabbit i3ayychik 9bal ma t7ott tsawir ki hakka.
RépondreSupprimerau dernier anonyme: T'es sérieux? ahah
RépondreSupprimerExcellente analyse!!!!
RépondreSupprimerKen bech tkammil hakka Bech inna7iou il samba mte3 biga il 3athim ou n7ottou Astrath.
مع كامل احتراماتي و ان عجبني المقال عموما فانو عندي بعض الاعتراضات اهمها حكاية البوليس و انو الي موش مع المتضاهرين يولي طحان حاكم :) لكلنا نكنا اللاكريموجان و الضرب قبل 14 جانفي و نعرفو الي لبوليس جادور اما اذا كان انسان ينظم اعتصام و مايوافقولوش عليه و يجي يمد وجهو فانو مخالف للقانون و من حق الامن الي هو احد اجهزة الدولة انو يدخل باعتبار انو الدولة شنوة السلطة لعندها ؟ حفظ الامن و ينجم حفظ الامن يمر ضرورة باستعمال force publiqueالقوة العامة الي يقولولها
RépondreSupprimerArticle 431-3 du Code Pénal, « tout rassemblement de personnes sur la voie publique ou dans un lieu public susceptible de porter atteinte à l'ordre public peut être dissipé par la force publique »
بلغة اخرى انا كنت انجم نعارض اي تهجم يصير على المعتصمين هاذوما لو تم الاعتداء عليهم و هوما في بلاصة بعيدة ماتقلق حد اما اذا تجي في بلاصة حساسة في العاصمة و تعمل اعتصام تقطع بيه ارزاق الاحياء المجاورة مما قد ينجر عليه تصادم بيناتهم (والي كان باش يصير حسب التجار و العياشة الي غادي لولا الطاف الله ) و تمنع الدخول و الخروج على عدد من الوزارات و كتابات دولة فانو نعتذر و نقلو انو سيادتهم موش ماخذين البلاد رهنية و من حقي كمواطن ضد الشيئ هذا ولا ناكل من نصبة مجاورة انو الحاكم يفرقلي الاعتصام و الي يحب يوصل صوتو فما بطحة فين وزارة الدفاع قالولهم براولها قالو الف و اعوذ بالله
ثانيا فانو حكاية الجامع فانو كي يجيك واحد و يتخبا في جامع و يبدى ينحيلك في والديك بالكرتوش (الي صارت في بنزرت مثلا في الثورة واحد متخبي في صمعة متاع جامع و يضرب طلعلو الجيش نحالو الركعة متاع والديه) موش عملو اعتصام و قالو حتى يخرج باش ماندخلوش الوخيان متخبين في الجامع و يضربو بالحجر و يسبو و الفيديووات موجودة : المساجد للصلاة والعبادة، ومن دنّسها بتحويلها إلى منابر للدعاية السّياسيّة ومنطلقا للمظاهرات والإعتصامات هو آخر من يحقّ له أن يتباكى ويتذمّر اليوم على خاطرو كلا طريحة ولا ضربوه بالغاز المسيل للدموع في بهو الجامع.. إحترموا المساجد أوّلا وبعد ذلك طالبوا غيركم بأن يحترمها.. علما و انو الحاكم حد علمي ماضربش باللاكريموجان في بهو الجامع انما الغاز الي لبرا دخل
هذا مع تمسكي الشديد بانو بوليس تونس همجي و موش متحضر و جادور و يطبق في الاوامر متاع القمع و عندهم عقدة متاع كبر هذا مما لا شك فيه و مانسامحش عالضرب الي كليتو قبل 14 اما مانحملهمش المسؤولية وقت لعباد تتعدى حدودها خاطر هذا موش ممارسة لحق تضاهر سلمي و انما ماخذ لبلاد رهنية و بوسائل غير قانونية بعيدا عن لغة الثورية المبالغ فيها والا الطحين للحاكم الزايد عن اللزوم اما نعطيو لقيصر ما لقيصر و اكاهو
je confirme elli ettaswira mahich fi touness : http://palestinianpundit.blogspot.com/2011/01/israels-deadly-tear-gas-made-in-usa_07.html
RépondreSupprimerبجاه ربي باش نحبو نفهمو راو ما هوش وقت اعتصامات ولااضرابات رانا باش نفلسو يا عباد افهموا راوما هوش معقول وماهوش مقبول باش يجي واحد قدام محل مهما كان تاكل من جرتو العباد في الخبز ونعملوا اعتصام قدامو ونسكروا عليه اللعب انا واحد من الناس الي يعمل هكة قدام محلي والله الا ما نردو فلام نضوي بيه ضلام الحومة
RépondreSupprimerبصراحة أنا مع الإعتصام أما برجوليّة كلامك موضوعي و عقلاني برشا مش كيف برشة بهايم ماإلّي معارضين و إلاّ مع الإعتصام ، إنشاء اللّة الناس الكلّ تخمم كيفك
RépondreSupprimer