jeudi 6 janvier 2011

بوزيد مكسي ... بوزيد عريان

عامكم مبروك ! أما عامهم هوما مش برشة ... زايد نبدى نحمم في القلوب أكثر ملي هي فيه. أما ما فيها باس كي نركب شوية على الأحداث، العباد الكل ركبتلها قعدت كان آنا ؟
مات المسكين و هوما يحكيولي على العناية الموصولة... تي العباد من الهم والحقرة ماتت بالحمصة و دخلت للعناية المركزة وهوما يحكيو على تكريس المواطنة ودولة القانون و المؤسسات ؟ تي إحشم، ماهو كي تغلط،على الأقل سكر جلغتك! كان قلة الحياء وقلة المعروف.

الشعب، و مانيش محتاج نحكي بإسمو، أهوكة فضايحنا في البلايص الكل، فد من الحقرة و من الرشوة و قلة العدل و انتوما لاهين تفركسو على المحرضين و العملاء وخالقي البلبلة و المتآمرين على مستقبل البلاد... هذا الكل وما فقتوش إلي المحرضين هما انتوما بالطرق الفاسدة لتعاملكم مع الأحداث ؟ 

تراه خممو شوية في شنوة إحساس واحد من فريانة وإلا من منزل بوزيان كي يمشي يداوي في تونس و إلا في سوسة ؟ ويشوف الدنيا والعباد كيفاه عايشة غادي وهو كيفاش يستنى في الاوناس باش تقبل مطلب متاع ربطوا بشبكة التطهير... شنوة إحساس واحد من قفصة يقرا و بشهايدو و عندو عشرة سنين مقدم مطلب باش يخدم في شركة  الفسفاط وفي الأخر يخدمو واحد من صفاقس على خاطر المسؤول يحب يخدم قريب وإلا ولد صاحبو ... 

وقتاش باش تفهموا إلي الحكاية ماهياش مسألة فلوس وإلا إستثمار بقدر ماهي حكاية رد إعتبار لعباد عاشو محقورين ومهمشين. و بيناتنا الحكاية حكاية ثقة... بكل صراحة أغلبية التوانسة ماعادش عندهم الثقة فيكم... تعملوا وإلا ما تعملوش، العباد ولات تحرق في رواحها، فقدت الأمل في حياة كريمة، و هذا كلام موجه للعباد الكل، إلي يحكم وإلي يعارض... كان جاء في المعارضة- إلي ساعات تفددني بتمسكينها و لعبها دور الضحية أكثر من اللازم- كان جاء فيهم خير أو خلاص لمشاكل المواطن العادي الزوالي ، زايد الفكرة هذي منغير ما نكملها، ربي معاكم كيما يقولو و انشالله هذاكا حد الباس  ... العباد يئست منكم، انتوما في واد والشعب في واد...

التونسي المتواضع لا حاجتو لا بحرية صحافة ولا ديمقراطية ولا والو، أو بطريقة أخرى الكلام هذا الكل متاع تكريس حقوق الإنسان والنظرة الإستشرافية و قيم  التعددية و تتبوء مراتب وتنوه بالمكتسبات... هذا الكل ما يعنعيهش، التونسي كان طول عمرو خبزيست. أعطيه  ياكل يشرب يعيش بشعار "الحمد لله ودفع الله ما كان أعظم و إلي تعرفوا خير ملي ما تعرفوش وأخطا راس واضرب و على قد لحافك مد ساقيك ..." نهار إلي يحس روحو مضروب في خبزتو نهاراتها يشنعلك....

تي هاو شعب ليكس ! باش تلقاو خير منو ؟ تحبو تزيد برلنقاسيون ما يهموش... السرقة بارتو وهو عامل عين رات وعين مع راتش، مادامو واكل شارب مايهموش في شكون يسرق، وبيناتنا ياخي بداو يسرقوا من البارح وإلا معلومة جديدة عرفناها بالويكيليكس ؟ تسكرت شطر الأنترنات، ثمة عباد عيطت شوية إفتراضيا أما الشوارع مازلت معبية بالعلمات و الناس متقبلة الوضع بشوية تذمر لكن عقلية اش لز حمة يغني من أعز ما تلقى في ها الشعب الزوالي... ونهارة إلي يتضرب في خبزتو و في أساسيات حياتو تبهتو في انو ثمة عباد عايشة كي الهوايش كاينو ماكمش عايشين في ها البلاد... وأول حاجة تفكروا فيها : صورة البلاد و التصدي للراكبين على الأحدات و لغة الوطنية الزائفة و هاو الجزيرة تتآمر على المكتسبات... راهو ولد الشعب الزوالي ما راهاش المكتسبات هاذي ... موجودة ممكن، للي  تكشفلو علم الغيب، أما الشعب الزوالي البطال ما يهموش، تحب تحكي معاه أحكيلو على خدمة محلولة، على مشروع عندو فيه باي مش كلام وبرة كيما سماء دبي... أحكيلو على زيادة في الشهريات... أما لغة التكريس أو بالأحرى لغة التكريز زايدة. كي ماكمش قادرين تقولو إلي السماء فيها شوية سحاب، مش لازم النشرة الجوية!


4 commentaires:

  1. Na9ess mel ser9a wela 7ot el source mte3 el titre

    RépondreSupprimer
  2. la source est un proverbe tunisien
    merci pour ton souci!

    RépondreSupprimer
  3. Ah je viens de réaliser qui tu étais en regardant ton avatar... et en parlant de ça, tu peux aussi gentiment fermer ta gueule vu ton sombre passé et présent de plagiat que toute la blogosphère connaît!

    Note bien que toi en particulier je t'autorise pas, au cas ou ça te passerait par la cervelle, de me citer, ou même que tu me republies, je dis bien au cas où! on sait jamais! t'as bien plagié BTB en t'appropriant les textes tout en l'insultant derrière...

    En te remerciant cordialement de passer nous voir, moi qui suis censuré sur ta page de demeurés pour avoir révélé tes pratiques mesquines d'auto-plébiscite, tu peux gentiment, Monsieur qui se fait élire l'administrateur de la meilleure page facebook de la Tunisie (LOLZ) accepter mon petit cadeau suivant!

    http://www.therightperspective.org/wp-content/uploads/2009/11/STFU_and_GTFO.jpg

    Bienvenu chez moi, en fait tu peux rester, mais on m'ôtera pas l'idée que t'es un petit e-trou du cul! bref! J'en profite que tu m'avais lancé sur le sujet pour te dire ce que j'en pense!

    Salulol! et fin du Hors-sujet!

    RépondreSupprimer
  4. c'est qui ce bas les masques ? ne me dis pas le fameux HBJ !!!

    RépondreSupprimer

إجتنب قدر الإمكان السبان خويا وإلا أختي الفاضلة، قد ما يكون دمك بارد قد ما تكون مقنع و تسمعك العباد ! وكان تعمل مزية حاول كي تعلق إختار لروحك إسم مستعار! كي يكثر الآنونيم ما عاد نفهمو شي !