الحريات واللائكية : حسن وحسين !

   باهي الحديث في المواضيع هاذي طويل  (التدوينة تشهد بذلك) و شيّق و التدوينة هاذي مانتصورش باش تضيف مفاهيم جديدة بل الهدف منها توضيح وتبسيطها للناس إلي تعرفها و إلا على الأقل تسمع بيها و  للناس إلي للأسف عندها فكرة غالطة على المفاهيم هاذي.

   الحريّات من أجلها قامت الثورة، و لو انو قرائتي الأولية للثورة هاذي تخليني نوصفها بثورة الإنعتاق أكثر من أن ننعتها بثورة الحريّة. فإنو إنتقادي هذا  الهدف منو ماهواش الاستنقاص من قيمتها كحدث تاريخي هام بل بالعكس هو إنتقاد نابع من آمال باش تكون الثورة هاذي بالرسمي ثورة الحرية.

    أولا مفهوم الحرية هو مفهوم فردي، ولذلك القول بأنو تونس حرة أو شعب تونس حر أو مجموعة من الأفراد احرار يقعد ديما تعبير مجازي، الحرية تاخو معناها على مستوى الأفراد. و على عكس المفاهيم المطلقة الأخرى  (كالعدالة و التآخي والحب) مفهوم الحريّة هو المفهوم الوحيد تقريبا إلي ما يحتاجش لإطار أو لمفاهيم أخرى باش يتعرّف على خاطر الحرية تعرّف نفسها بنفسها و تاخو حدودها زادة من تعريفها: حريتك الشخصية تاخو حدودها بمجرد تجاوزها لحرّيات الآخرين. إذا كان الناس الكل تفهم التعريف هذا و تعمل بيه و تحطو فوق كل إعتبار آخر مهما كان فإنها تتوصل بطريقة شبه آلية للمفهوم إلي تقوم عليه الدولة الحديثة و هو المواطنة.

   المواطنة تلغي جميع الفروق بين أفراد الوطن الواحد إلي تنرتب عن الإختلاف في الجنس، في العرق، في اللغة، أو في الدين، و كنتيجة آلية فإنو الدولة الحديثة تتعامل مع مواطنين متساوين في الحقوق و الواجبات و تحاول تضمنلهم الحد الأقصى من  الحريات الفردية. وتعامل الدولة مع المواطن يكون على زوز مستويات : الخدمات و القوانين،  و هذا التعامل ما يرقى للمستوى هذا متاع ضمان الحريات  إلا باللائكية أو العلمانية  أو بالأحرى فصل الدولة (كقوانين و مؤسسات) عن الايديولوجيات عموما و يتم عادة تعريفو بفصل الدين عن الدولة. 

ما ننكرش إلي المفهوم هذا برشة ناس تخلطوا عن جهل أو عن قصد بالإلحاد إلي هو للتذكير موقف ايديولوجي من الدين (ناس قررت انها تكتب في خانة الديانة متاع فايسبوك : لا شيء ) وثمة زادة شكون ماشي في بالو إلي اللائكية من اهدافها المعلنة أو الخفية محاربة الدين. بالطبيعة التعريفات هاذي غالطة  كي نشوفو إلي الإسلام ما تنشر في أوروبا إلا بفضل حياد الدولة و عدم تدخلها لفائدة الدين المسيحي  السائد  و نتصور انو أفضل حاجة  تبسط الحكاية هي أن نعطي أمثلة باش نوضح أكثر الإضافة متاع اللائكية وخلينا نخرجو من النظري الممل أحيانا و  إلي ليه جماعتو... 

الحجاب مثلا حرية شخصية، و هذا ما يردده المدافعون عنه. هايل ياسر! اللائكية تضمن للنساء الكل الحق في إرتداء الحجاب، كيف كيف بالنسبة لللحية، الدولة اللائكية تضمن للفرد إلي يحب يطبق السنة النبوية هاذي حقو في انو يتمتع بحرياتو من غير ما يجبدلو مواطن آخر في وجهو موس جيلات ماك ثري بل من حقو انو القضاء ينصفو إذا نهار تمت معاملتو بطريقة تعسفية على خاطر لحيتو. بنفس الطريقة، اللائكية تضمن انو الحق هذا ما يوليش قاعدة و يولي مفروض على العباد بإسم ايديولوجيا أو دين معين، معناها الدولة إذا كانت لائكية فإنو حتى حزب ما ينجم يمرر قانون يجبر النساء على إرتداء الحجاب و حتى حزب ما ينجم يمرر قانون يمنع إرتداء الحجاب و تقعد المسألة هاذي حرية شخصية بعيدة عن تدخل الدولة لفائدة رؤية أو موقف معين يريد فرض نفسه بالقانون و من شأنه أن يخل بمبدأ الحرية الفردية. و الدولة التونسية تحت بن علي ما كانتش لائكية من المنظور هذا لأنها لم تضمن حقوق المتدينين، واجبرت نساء على خلع الحجاب و خلات عباد تبطل المشيان للجامع باش يبعدو على  المشاكل متاع الحاكم، و خلات العياشة يندمو على النهار إلي كانوا فيه توانسة وقت إلي في رمضان ما تدخل للرايون متاع الالكول في كارفور كان كي تبدا شعرك أصفر وعينيك زرق وباسبورك أحمر (شوف العنصرية)...

أما العباد إلي من المنظور هذا ما تعجبهاش اللائكية فهي ماهياش قابلة بالأساس لمبدأ الحرية الشخصية و كان تعطيها شوية سلطة تولي تفرض قناعاتها الشخصية عليك بطريقة مباشرة أو ملتوية كيما إلي يقول انو يحب يطبق شرع ربي ويوكل روحو مسؤول على تفسير الحكمة الإلاهية و تولي معارضتو معارضة مش ليه شخصيا بل للذات الإلاهية. و تتوجد و تتبرر قوانين كيف إلي في السعودية إلي تحرم السياقة للمرا، وتمنع المرا من أنها تخدم حاجة أخرى بخلاف معلمة وإلا في الميدان الطبي... و قوانين تجبر أصحاب المحلات على غلق محلاتهم - حتى إذا تكلف ذلك طرد الزبائن - مدة 15 دقيقة إبتداء من رفع  الاذان متاع كل صلاة...

  ما نحبش  نقول إلي الشيء هذا باش يصير عندنا أما نتصورو وارد  إذا كان ثقافة اللائكية متاع الدين لله والوطن للجميع  ماهياش مترسخة  في الأذهان و في الممارسة كيما أي ديمقراطية ما تنجمش تقوم بدون التفريق بين السلط. و لذا باش يقعد الدين بعيد على الخمج متاع السياسة فمن الأفضل انو يبعد عليها  و تبعد عليه ويقعد بذلك تجربة شخصية خاصة و حميمية، ومش معناها تخبى باش تمارس دينك، أما كون رصين و أعطيه قدرو، (كي ثمة جامع قريب لواه الصلاة الإستعراضية في وسط ساحات الجامعات ؟)  و كون بالتالي مسؤول مباشرة عن ممارسة دينك بالطريقة إلي تساعدك و لنتخلص جميعا من كل أشكال وصاية الدولة على الفكر والمعتقد. 

   باهي... و إلي يحب يطبق شرع ربي ؟ يطبقوا على روحو قبل كل شيء! و إذا كان الإسلام ماهواش متعارض مع قيم الديمقراطية و الحرية و المساواة فإني  ما نتصورش انو المواطن المسلم باش  يلقى صعوبة كبيرة: تحب تصوم، صوم أما ما تجبر حد على الصيام، تحب تصلي صلي وربي يقبل، أما ما تنكدش على العباد إلي ما تصليش و تولي تعاملهم بمحقرانية و بالتمييز كيما عملوا جماعة الإخوان المسلمين في مصر وقت إلي حلو عيادات طبية لفائدة الفقراء ما يدخلولهاش كان النساء إلي لابسين حجاب و كان الرجال من مرتادي الجوامع، و من المستمعين للخطب متاع الإمام الاخواني... و ما غير ما نحكي على الأمثلة الأخرى متاع دفع الجزية  و أهل الذمة و ملك اليمين  و حكم العبد الآبق وحكم الجارية الزانية إلي نتصور إلي أغلبية التوانسة، ولو حتى  متدينين، فإنو قبل كل شي عندهم مينيموم متاع عقل باش يعرفوا إلي الشي هذا انتهى تاريخ صلوحيتو.

   وبنفس الطريقة، تحب تِسكر عوم بحرك، أما مش باش تخوّضها في الطريق العام، و تولي شمشون الجبار وعربدة وتقلق في راحة العباد، وإلا تسوق وإنتي مثمول... الأمور هاذي القانون يحدها لأنك بكل بساطة تعديت على أبسط حريات الأفراد وحقوقهم و هو حقهم في أنك ما تعرضش حياتهم للخطر بالتصرفات اللامسؤولة. 

    ما تحبش البورنو، ما تتفرجش، أو إختتار الأوبتيون متاع  رقابة الآباء (control parental) باش تحمي ولادك من الشيء هذا. أما الدولة ما تتدخلش! لازم تتنحى من بالنا فكرة الدولة الرقيب على أخلاق وأفكار المواطن. الدولة تخدم المواطن وتتعامل معاه كإنسان راشد يعرف مصلحتو، و تكتفي بضمان الحريات ما لاكانش نوليو نبررو بنفس التبريرات إلي بن علي سكر بيهم اليوتوب و المدونات بحجة أنهم كانوا يمسو بمصلحة الوطن ياخي طلعت مصلحة الوطن تبعد عليه بعد بوحجر على مكة.، عفوا جدة ! (ناس بكري هموم جامدة على فكرة)

   ما نتصورش كي يتفرج زيد وإلا عمر في البورنو إنتي حياتك باش تتبدل وإلا باش تتأثر، وما نتصورش الدولة تجبر في العباد باش تتفرج في البورنو، ثم أغلبية  الشعب كان مش  الكل يتفرج في البورنو،  ما نعرفش آنا عام قريت إلي في ترتيب المواقع لي يزوروها التوانسة  ثمة موع إباحي تركي ياخو المرتبة 16. و زيد انتوما ولاد الثورة وتعرفوا إلي التسكير حكاية فارغة، تغطية شمس بالغربال... إلي حاجتو بسيت، ولو كان يديرولو باب حديد، ينقزه ويجيك ها الحبيب!

   بالنسبة للنقطة الأخيرة و إلي ديما يدور ويرجع فيها الخلاف، وهي حكاية الميراث، فإنو تونس صادقت على معاهدات دولية واتفاقات تضمن المساواة بين جميع الأفراد (بمؤنتهم و مذكرهم ). و في الحقيقة ما نحبش ندخل توا في الإجتهادات إلي تقلك إلي الأصل في  الميراث الإنفاق و المرا تاخو ساعات أكثر من الراجل  و الجدالات الفقهية .إلي يحلوها علماء الدين بيناتهم كان حبوا، الكلام هذا ما يهمش الدولة إلي باش تكون محايدة دينيا (بالله تصوروا واحد ديانتو تقول إلي الميراث متاعو يمشي الكل لأكبر ابنائه...) الحل في نظري بسيط، إذا كان الأطراف يحبو يطبقوا حكم الشريعة ومتفاهمين آش ما دخلها الدولة فيهم ؟ باش تجبرهم على القسمة كيما هي تحب ؟ ديما نعاود نرجع ونكرر على مسألة الحريات : هوما احرار... أما إذا كان ثمة طرف ماهواش موافق وما يحبش يحكم الشريعة، ما تنجمش تجبرو انو يلتزم بتعاليم ديانتك، والدولة تتدخل من خلال القانون الذي يضمن المساواة... الحكاية ما أسهلش منها، لازمها برك شوية وسع بال، وتشيّشة حسن نيّة و غرام إلتزام بالمبادئ بمتاع الحرية، و مش نقعدو في النفاق الإجتماعي متاع العباد إلي تتفكر الحرية و العدالة وهاك القيم إلي جابها الغرب الكافر الماسوني كان كي نبداو ضحايا التمييز و العنصرية و التهميش والإقصاء.

   في الختام، نحب نذكر أي واحد يتعدى من هوني إلي ثمة مسيرة لمساندة الحريات واللائكية يوم السبت الجاي قدام المسرح البلدي تبدا مع ماضي ساعة ، وثمة برشة وجوه إعلامية وثقافية و حتى جامعية وحقوقية، وفنانين زادة،  تنجم تقابلوهم ومبعد ما تاخذو منهم اوتوغراف تنجمو تحكيو معاهم وتعطيو آرائكم حول كل شي عندو علاقة بالموضوع : من دور الذباب الكادح في إسقاط نظام الفاتح، إلى دور وليد الزراع في وتيرة  التصحر المتسارع...